ສະເຫລີມສະຫລອງວັນສ້າງຕັ້ງເມືອງວຽງໄຊຖານທີ່ໝັ້ນຂອງການປະຕິວັດລາວ ຄົບຮອບ 50 ປີ ຢ່າງຟົດຟື້ນ
ງານໂຮມຊຸມນຸມໃຫຍ່ສະເຫລີມສະຫລອງວັນສ້າງຕັ້ງເມືອງວຽງໄຊ-ຖານທີ່ໝັ້ນຂອງການປະຕິວັດລາວ ຄົບຮອບ 50 ປີ (30 ພະຈິກ 1968 – 30 ພະຈິກ 2018) ໄດ້ຈັດຂຶ້ນດ້ວຍບັນຍາກາດຟົດຟື້ນຢູ່ສະໜາມກິລາເມືອງວຽງໄຊ ແຂວງຫົວພັນ ໂດຍໄດ້ຮັບກຽດເຂົ້າຮ່ວມຂອງສະຫາຍ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ ບຸນຍັງ ວໍລະຈິດ, ມີບັນດາການນຳຂັ້ນສູງພັກ-ລັດ, ກຳລັງປະກອບອາວຸດ, ພະນັກງານປະຕິວັດອາວຸໂສ-ບຳນານ ພ້ອມດ້ວຍຊາວເມືອງວຽງໄຊເຂົ້າຮ່ວມເປັນຈຳນວນຫລວງຫລາຍ.
ໃນໂອກາດອັນມີຄວາມໝາຍສຳຄັນນີ້, ສະຫາຍ ເລຂາທິການໃຫຍ່, ປະທານປະເທດ ໄດ້ຂຶ້ນກ່າວສູນທອນພົດວ່າ: ການຈັດຕັ້ງສະເຫລີມສະຫລອງວັນສ້າງຕັ້ງເມືອງວຽງໄຊ ຄົບຮອບ 50 ປີ ພໍດີກົງກັບບັນຍາກາດສະຫລອງ ສປປ ລາວ ຄົບຮອບ 43 ປີ, ການລະນຶກວັນເກີດປະທານ ໄກສອນ ພົມວິຫານ ຄົບຮອບ 98 ປີ. ຕະຫລອດປະຫວັດສາດດັ່ງກ່າວ ພວກເຮົາສຸດທີ່ມີຄວາມເອກອ້າງທະນົງໃຈທີ່ເຫັນວ່າ ພາຍໃຕ້ການນຳພາຂອງພັກ, ຖັນແຖວພະນັກງານ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ໄດ້ເສີມຂະຫຍາຍມູນເຊື້ອຮັກຊາດ, ຕໍ່ສູ້ພິລະອາດຫານບໍ່ຍອມຈຳນົນ, ມູນເຊື້ອອອກແຮງງານດຸໝັ່ນຂະຫຍັນພຽນ ຍາກປານໃດກໍບຸກ ທຸກປານໃດກໍຜ່ານຜ່າ. ປະກອບສ່ວນຢ່າງຕັ້ງໜ້າເຂົ້າໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ ກໍຄືພາລະກິດປົກປັກຮັກສາ ແລະ ສ້າງສາປະເທດຊາດຂອງພວກເຮົາ. ປະເທດຊາດຂອງພວກເຮົາໄດ້ມີການປ່ຽນແປງຫລາຍດ້ານ, ຮັບປະກັນຄວາມໝັ້ນຄົງຂອງຊາດ ແລະ ຄວາມສະຫງົບປອດໄພໃນທົ່ວສັງຄົມ, ເສດຖະກິດຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງປະຊາຊົນລາວບັນດາເຜົ່າໄດ້ຮັບການປັບປຸງດີຂຶ້ນ ທັງດ້ານວັດຖຸ ແລະ ຈິດໃຈ, ອິດທິພົນບົດບາດຂອງ ສປປ ລາວ ນັບມື້ພົ້ນເດັ່ນຂຶ້ນໃນເວທີພາກພື້ນ ແລະ ສາກົນ.
ໄຊຊະນະຂອງການປະຕິວັດເຮົາໄດ້ຕິດພັນແໜ້ນກັບເມືອງວຽງໄຊປິຕຸພູມທີ່ລືຊື່ແຫ່ງນີ້ ເຊິ່ງເປັນທີ່ໝັ້ນອັນແຂງແກ່ນຂອງການປະຕິວັດລາວ ສະແດງອອກຢ່າງລວມສູນ ເປັນບ່ອນປະຈຳການຂອງສູນກາງພັກເຮົາ, ເປັນບ່ອນບັນຊາຊີ້ນໍາການຕໍ່ສູ້, ເປັນຖານທີ່ໝັ້ນຂອງການປະຕິວັດລາວ ຕົ້ນກຳເນີດ ລະບອບປະຊາທິປະໄຕປະຊາຊົນຢູ່ປະເທດເຮົາ, ດິນແດນສັນຍາລັກແຫ່ງອິດສະຫລະພາບ, ດິນແດນແຫ່ງການເຕົ້າໂຮມຄວາມສາມັກຄີປອງດອງຊາດ ແລະ ດິນແດນວິລະຊົນ. ປັດຈຸບັນ ເມືອງວຽງໄຊໄດ້ກາຍເປັນມໍລະດົກອັນລ້ຳຄ່າທາງປະຫວັດສາດ ແລະ ທຳມະຊາດຂອງປະເທດເຮົາ ນີ້ຄືຄວາມເອກອ້າງທະນົງໃຈ ແລະ ກຽດສັກສີອັນສູງສົ່ງຂອງປະຊາຊົນລາວບັນດາເຜົ່າໃນທົ່ວປະເທດ ກໍຄືຊາວເມືອງວຽງໄຊ ແຂວງຫົວພັນ ວິລະຊົນທີ່ຕ້ອງໄດ້ຈົດຈຳລາລຶກໄວ້ ແລະ ສືບທອດໃຫ້ຄົນຮຸ້ນຕໍ່ໄປ. ໃນໂອກາດນີ້, ທ່ານປະທານປະເທດ ໄດ້ໃຫ້ກຽດປະດັບຫລຽນດາວຄຳແຫ່ງຊາດໃຫ້ແກ່ເມືອງວຽງໄຊ.
