ເປເຣຊ ພ້ອມປ່ອຍ ວາທານ ເລັ່ງດຶງສອງນັກເຕະເປັນຕົວແທນ
ດອນ ບາລອນ ສື່ຂອງສະເປນ ລະບຸວ່າ: ຟໍເຣນຕິໂນ ເປເຣຊ ຜູ້ບໍລິຫານ ຣີລ ມາດຣິດ ພ້ອມຂາຍ ຣາຟາແອລ ວາທານ ແລ້ວ ຖ້າໄດ້ເງິນ 80 ລ້ານຢູໂຣ ໂດຍລາວຫວັງດຶງ ມິລານ ສຄຣິເນຍ ກັບ ມັດໄຣ ເດິ ລິກ ເປັນຕົວແທນຂອງ ວາທານ.
ຟໍເຣນຕິໂນ ເປເຣຊ ປະທານ ຣີລ ມາດຣິດ ສະໂມສອນຍັກໃຫຍ່ແຫ່ງ ລາ ລີກາ ສະເປນ ພ້ອມຈະປ່ອຍ ຣາຟາແອລ ວາທານ ກອງຫລັງຊາວຝຣັ່ງອອກຈາກທີມ ຖ້າໄດ້ຂໍ້ສະເໜີປະມານ 80 ລ້ານຢູໂຣ.
ວາທານ ສ້າງຜົນງານໄດ້ດີເດັ່ນໃນຫລາຍລະດູການກ່ອນໜ້ານີ້ ຈົນເຮັດໃຫ້ລາວເປັນກຳລັງຫລັກໃນເກມຫລັງຂອງ ຣີລ ມາດຣິດ ມາໂດຍຕະຫລອດ ລວມທັງຫາກໍໂຊຟອມໄດ້ດີເດັ່ນກັບທີມຊາດຝຣັ່ງ ຊຸດໄດ້ແຊ້ມບານໂລກ 2018 ມາຄອງ.
ເຖິງຢ່າງໃດກໍຕາມ, ລະດູການນີ້ ນັກເຕະໄວ 25 ປີ ຟອມຕົກ ຫລັງຈາກລາວຫລິ້ນຜິດພາດເລື້ອຍໆ ຈົນເຮັດໃຫ້ທີມເສຍປະຕູຫລາຍລູກ ແລະ ນັ້ນສົ່ງຜົນໃຫ້ ເປເຣຊ ເບິ່ງວ່າ ວາທານ ບໍ່ແມ່ນຄົນທີ່ຂາດບໍ່ໄດ້ອີກຕໍ່ໄປ ໂດຍຜ່ານມາເຄີຍມີຂ່າວວ່າ ແມນເຊັສເຕີ ຢູໄນເຕັດ ສົນໃຈຈະຄວ້າດາວເຕະເລືອດນ້ຳຫອມໄປຮ່ວມທີມ.
ດອນ ບາລອນ ລາຍງານອີກວ່າ: ເປເຣຊ ເລັ່ງຈະຄວ້າ ມິລານ ສຄຣິສເນຍ ກອງຫລັງ ອິນເຕີ ມິລານ ແລະ ມັດໄຣ ເດິ ລິກ ເຊັນເຕີແບັກດາວຮຸ່ງຂອງ ອາແຈັກ ອຳສະເຕີດຳ ມາເປັນຕົວແທນຂອງ ວາທານ ຫລັງຈາກທັງ 2 ຄົນສ້າງຜົນງານໄດ້ໂດດເດັ່ນ.
