ສາເຫດເຮັດໃຫ້ປະຈຳເດືອນມາບໍ່ປົກກະຕິ
November 30, 2018 - 2:53 PM
- ຄວາມເຄັ່ງຄຽດ : ເປັນອີກໜຶ່ງສາເຫດທີ່ເຮັດໃຫ້ຮ່າງກາຍຫລຸດການຫລັ່ງຮໍໂມນ GnRH ເຊິ່ງສົ່ງຜົນເຮັດໃຫ້ບໍ່ເກີດການຕົກໄຂ່ ແລະ ມີປະຈຳເດືອນ ຫາກພົບອາການແບບນີ້ຄວນຫລີກເວັ້ນການເຮັດສິ່ງທີ່ຈະເຮັດໃຫ້ເກີດຄວາມເຄັ່ງຄຽດ ຫລື ໃຫ້ໄປປຶກ ສາແພດເພື່ອຈະໄດ້ຫາວິທີຊ່ວຍຜ່ອນຄາຍ.
- ການເຈັບປ່ວຍ : ອາການເຈັບປ່ວຍໄລຍະສັ້ນ ຫລື ການເຈັບປ່ວຍຊຳ້ເຮື້ອກໍລ້ວນແຕ່ມີຜົນເຮັດໃຫ້ປະຈຳເດືອນຂາດ ຫລື ມາຊ້າກ່ວາປົກກະຕິໄດ້ ເນື່ອງຈາກສະພາບພາຍໃນຮ່າງກາຍບໍ່ໄດ້ຢູ່ໃນສະພາບທີ່ສົມບູນຄືເກົ່າ ສະນັ້ນ ຄວນສອບຖາມ ຫລື ປຶກສາແພດກ່ອນວ່າປະຈຳເດືອນຈະສາມາດກັບມາປົກກະຕິໄດ້ໃນຊ່ວງໃດ.
- ການປ່ຽນແປງຂອງຕາຕະລາງຊີວິດ : ໝາຍຄວາມວ່າຄົນທີ່ມີການປ່ຽນແປງຕາຕະລາງຊີວິດຢູ່ຕະຫລອດ ເຊັ່ນ : ເຄີຍເຮັດວຽກໃນຕອນກາງເວັນ ກໍສະຫລັບໄປເຮັດຕອນກາງຄືນ, ຜັດປ່ຽນໝູນວຽນຢູ່ຕະຫລອດເວລາ, ບໍ່ຄົງທີ່, ປ່ຽນແປງແບບກະທັນຫັນນີ້ຢູ່ຫລາຍເທື່ອ ເຊິ່ງພຶດຕິກຳເຫລົ່ານີ້ມີຜົນເຮັດໃຫ້ລະບົບພາຍໃນຮ່າງກາຍເກີດການປ່ຽນແປງບໍ່ຄົງທີ່ ເຮັດໃຫ້ປະຈຳເດືອນມາແບບຄາດເຄື່ອນໄດ້.
- ການກິນຢາ ຫລື ການປ່ຽນຢາ : ສຳລັບຜູ້ທີ່ກິນຢາເປັນປະຈຳ ຫລື ມີການປ່ຽນແປງຢາກະທັນຫັນກໍອາດຈະເຮັດໃຫ້ປະຈຳເດືອນມາບໍ່ຕົງມື້ໄດ້ ເຊິ່ງກໍຄວນປຶກສາແພດ ເພື່ອສອບຖາມເຖິງຜົນຂ້າງຄຽງຂອງຢາທີ່ກິນເຂົ້າໄປ ແລະ ສຳລັບໃຜທີ່ກິນຢາຄຸມກຳເນີດກໍອາດຈະມີຜົນຕໍ່ການປ່ຽນແປງຂອງຮໍໂມນ ເຮັດໃຫ້ປະຈຳເດືອນຂາດ ຫລື ມາບໍ່ກົງມື້ໄດ້ຄືກັນ.
- ນຳ້ໜັກເກີນ : ໃນຄົນທີ່ມີນຳ້ໜັກໂຕຫລາຍກ່ວາປົກກະຕິ ຫລື ຄົນທີ່ມີຮູບຮ່າງຕຸ້ຍກ່ວາປົກກະຕິ ຈະມີຜົນເຮັດໃຫ້ຮໍໂມນຂອງຮ່າງກາຍເກີດການປ່ຽນແປງ ແລະ ປະຈຳເດືອນຂາດໄດ້. ການຫລຸດນຳ້ໜັກຈະຊ່ວຍໃຫ້ປະຈຳເດືອນກັບມາເປັນປົກກະຕິໄດ້.
- ນຳ້ໜັກໂຕຕໍ່າກ່ວາເກນມາດຕະຖານ : ສຳລັບທ່ານໃດທີ່ຈ່ອຍຫລາຍ ແລະ ມີໄຂມັນໃນຮ່າງກາຍບໍ່ພຽງພໍ ຈະສົ່ງຜົນເຮັດໃຫ້ປະຈຳເດືອນມາບໍ່ສະໝໍ່າສະເໝີໄດ້ຄືກັນ ເຊິ່ງການເພີ່ມນຳ້ໜັກຈະເປັນໂຕຊ່ວຍເຮັດໃຫ້ປະຈຳເດືອນກັບຄືນມາສູ່ສະພາບປົກກະ ຕິໄດ້.
- ກຳລັງເຂົ້າສູ່ໄວທອງ ຫລື ໄວໝົດປະຈຳເດືອນ : ເມື່ອຮ່າງກາຍເກີດການປ່ຽນແປງກ້າວເຂົ້າສູ່ໄວທີ່ບໍ່ສາມາດຈະເລີນພັນແລ້ວ ປະຈຳເດືອນຂອງທ່ານອາດຈະມາຫລາຍກ່ວາ, ໜ້ອຍກ່ວາ ຫລື ດົນໆມາເທື່ອໜຶ່ງ ນັ້ນເປັນຍ້ອນຮ່າງກາຍເລີ່ມບໍ່ຜະລິດຮໍໂມນບາງຊະນິດ ເຊິ່ງມີຜົນຕໍ່ການມາຂອງປະຈຳເດືອນ, ແຕ່ເພື່ອຄວາມໝັ້ນໃຈຄວນໄປພົບແພດເພື່ອກວດຫາ ແລະ ຢັ້ງຢືນຈະດີກ່ວາ.
