ລາວ-ຣັດເຊຍ ຫາລືຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ຄັ້ງທີ 14
ກອງປະຊຸມຄະນະກຳມາທິການຮ່ວມມືດ້ານເສດຖະກິດ-ການຄ້າ ແລະ ວິທະຍາສາດ-ເຕັກນິກ ລາວ-ຣັດເຊຍ ຄັ້ງທີ 14 ໄດ້ຈັດຂຶ້ນໃນວັນທີ 26-27 ພະຈິກນີ້ ທີ່ນະຄອນຫລວງວຽງຈັນ, ເພື່ອຫາລືເສີມຂະຫຍາຍການພົວພັນຮ່ວມມືລະຫວ່າງສອງປະເທດໃຫ້ນັບມື້ມີປະສິດທິຜົນ ເຊິ່ງຝ່າຍລາວນຳໂດຍທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະຄະນະກຳມາທິການຮ່ວມມື ລາວ-ຣັດເຊຍ ແລະ ຝ່າຍຣັດເຊຍນຳໂດຍທ່ານ ໂກສະຕັງຕິນ ໂນສໂກບ (Konstantin Noskov) ລັດຖະມົນຕີກະຊວງພັດທະນາລະບົບດີຈີຕອນ, ໂທລະຄົມມະນາຄົມ ແລະ ສື່ສານມວນຊົນ ສະຫະພັນຣັດເຊຍ, ປະທານຮ່ວມຄະນະກໍາມາທິການຮ່ວມມື ຣັດເຊຍ-ລາວ.
ກອງປະຊຸມໄດ້ຕີລາຄາສູງການພົວພັນທາງດ້ານການເມືອງຂອງສອງປະເທດນັບມື້ນັບແໜ້ນແຟ້ນ, ມີບັນຍາກາດອັນໃໝ່. ນີ້ແມ່ນຄວາມພະຍາຍາມຂອງພັກ ແລະ ລັດຖະບານສອງປະເທດ ເພື່ອເສີມຂະຫຍາຍມູນເຊື້ອການພົວພັນຮ່ວມມືອັນດີງາມໃນເມື່ອກ່ອນໃຫ້ນັບມື້ຂະຫຍາຍຕົວຢ່າງບໍ່ຢຸດຢັ້ງ. ໃນກອງປະຊຸມ, ສອງຝ່າຍໄດ້ເຫັນດີເປັນເອກະພາບໃນການເສີມຂະຫຍາຍການຮ່ວມມືດ້ານເສດຖະກິດ-ການຄ້າ ແລະ ການລົງທຶນໃຫ້ນັບມື້ຫລາຍຂຶ້ນ ໂດຍຊຸກຍູ້ໃຫ້ພາກທຸລະກິດໃນຫລາຍຂົງເຂດເຊັ່ນ: ການພົວພັນດ້ານການເມືອງ, ການຄ້າ-ການລົງທຶນ, ການສຶກສາ, ສາທາລະນະສຸກ, ວັດທະນະທໍາ, ການເງິນ-ການທະນາຄານ, ໂທລະຄົມມະນາຄົມ-ສື່ສານ ແລະ ດ້ານວິທະຍາສາດ-ເຕັກໂນໂລຊີ. ພ້ອມດຽວກັນນັ້ນ, ກອງປະຊຸມຍັງໄດ້ເນັ້ນໜັກໃສ່ການຮ່ວມມືດ້ານການສຶກສາ, ວັດທະນະທໍາ-ສັງຄົມ ແລະ ການທ່ອງທ່ຽວ ເຊິ່ງເປັນປັດໄຈໜຶ່ງທີ່ສໍາຄັນໃນການເສີມຂະຫຍາຍການຮ່ວມມື ລາວ-ຣັດເຊຍ ໃຫ້ໄດ້ຮັບໝາກຜົນ. ນອກນັ້ນ, ທັງສອງຝ່າຍຍັງໄດ້ເອົາໃຈໃສ່ຊຸກຍູ້ໃຫ້ມີການແລກປ່ຽນ-ຖ່າຍທອດບົດຮຽນ, ຄວາມຮູ້ທາງດ້ານວິທະຍາສາດ-ເຕັກໂນໂລຊີ, ຊັບພະຍາກອນທໍາມະຊາດ-ສິ່ງແວດລ້ອມ, ກະສິກໍາ ແລະ ວິທະຍາສາດການແພດນໍາກັນຕື່ມອີກ.
ໃນໂອກາດດຽວກັນນີ້, ສອງຝ່າຍໄດ້ຮ່ວມລົງນາມໃນບົດບັນທຶກກອງປະຊຸມດັ່ງກ່າວ ເພື່ອຢັ້ງຢືນຜົນສໍາເລັດຂອງກອງປະຊຸມບົນພື້ນຖານຜົນປະໂຫຍດຮ່ວມກັນ ແລະ ສະແດງອອກເຖິງເຈດຈໍານົງຂອງສອງຝ່າຍໃນການຮັດແໜ້ນສາຍພົວພັນມິດຕະພາບ ແລະ ເສີມຂະຫຍາຍການຮ່ວມມືທີ່ຫລາກຫລາຍ ເພື່ອຊຸກຍູ້ການພັດທະນາເສດຖະກິດ-ສັງຄົມຂອງສອງຝ່າຍ ລາວ-ຣັດເຊຍ ໃຫ້ໜັກແໜ້ນເຂັ້ມແຂງ.
