ອຸຍນີເຊັບເຜີຍສະຖານະການຄວາມຮຸນແຮງຕໍ່ເດັກຢູ່ຊີຣີປີ 2016 ຮ້າຍແຮງທີ່ສຸດ
ອົງການທຶນເພື່ອເດັກແຫ່ງສະຫະປະຊາຊາດ (ອຸຍນີເຊັບ) ລາຍງານວ່າ: ເດັກນ້ອຍຢ່າງໜ້ອຍ 652 ຄົນຖືກສັງຫານຢູ່ຊີຣີໃນປີ 2016 ຖືເປັນປີທີ່ມີເຫດຄວາມຮຸນແຮງຕໍ່ເດັກຫລາຍທີ່ສຸດ.
ລາຍງານຂອງອຸຍນີເຊັບ ລະບຸວ່າ: ສະຖານະການຄວາມຮຸນແຮງຕໍ່ເດັກ ບໍ່ເວັ້ນແຕ່ເຫດໂຈມຕີໂຮງ ຮຽນ, ໂຮງໝໍ, ບ່ອນຫລິ້ນເດັກ, ສວນສາທາລະນະ ແລະ ຕາມເຮືອນຊານໃນປີຜ່ານມາ ໂດຍລັດຖະບານຊີຣີ, ກຸ່ມກະບົດ ແລະ ຝ່າຍສະໜັບສະໜູນຂອງທັງສອງບໍ່ໄດ້ເຄົາລົບກົດໝາຍວ່າດ້ວຍສະພາບສົງຄາມ. ອຸຍນີເຊັບ ເປີດເຜີຍວ່າ: ເດັກຢ່າງໜ້ອຍ 255 ຄົນຖືກສັງຫານຢູ່ໃນ ແລະ ໃກ້ບໍລິເວນໂຮງຮຽນໃນປີຜ່ານມາ ແລະ ເຮັດໃຫ້ເດັກເຖິງ 1.700.000 ຄົນບໍ່ໄດ້ຮຽນໜັງສື, ໜຶ່ງໃນໂຮງຮຽນທຸກໆ 3 ໂຮງຮຽນຢູ່ຊີຣີໃຊ້ສອນບໍ່ໄດ້ ເນື່ອງຈາກກຸ່ມຕິດອາວຸດຢູ່ຊີຣີຍຶດຄອງ, ເດັກຊາວຊີຣີອີກ 2.300.000 ຄົນຕົກຢູ່ໃນສະ ພາບຜູ້ລີ້ໄພທົ່ວພາກພື້ນຕາເວັນອອກກາງ. ອຸຍນີເຊັບ ເຕືອນວ່າ: ເດັກເຫລົ່ານີ້ສ່ຽງຈະຖືກໃຊ້ແຮງງານ ເດັກ, ແຕ່ງດອງຕອນອາຍຸຍັງນ້ອຍ ແລະ ເຂົ້າຮ່ວມສູ້ຮົບ, ເດັກນ້ອຍອີກຈຳນວນຫລາຍເສຍຊີວິດຈາກພະ ຍາດທີ່ສາມາດປ້ອງກັນໄດ້. ລາຍງານລະບຸວ່າ: ທະຫານເດັກມີຈຳນວນເພີ່ມຂຶ້ນຢູ່ຊີຣີ, ເດັກຢ່າງໜ້ອຍ 851 ຄົນຖືກເກນເຂົ້າຮ່ວມກອງກຳລັງໃນປີຜ່ານມາຫລາຍກວ່າປີກ່ອນເຖິງສອງທົບ. ນອກຈາກນີ້ ເດັກ ທົ່ວປະເທດຊີຣີຍັງສ່ຽງໄດ້ຮັບອັນຕະລາຍ ແລະ ບາດເຈັບສາຫັດຈາກການຫລິ້ນຢູ່ສະໜາມ ເຊິ່ງເຕັມແຕ່ທຸ່ນລະເບີດ ແລະ ລະເບີດດາວກະຈາຍ, ຂະນະທີ່ໜ່ວຍເກັບກູ້ລະເບີດຍັງບໍ່ສາມາດເຂົ້າໄປຮອດພື້ນທີ່ບາງສ່ວນໄດ້.
