ເບິ່ງໂຕເອງຕື່ມກ່ອນວ່າຄວນຈະຮັບວຽກນີ້ຫລືບໍ່
ຢ່າຟ້າວໂດດເຂົ້າໃສ່ວຽກທັນທີທີ່ເຂົາຈ້າງ, ບໍ່ແມ່ນເຮົາຈະບອກໃຫ້ທ່ານປຽບໃຫຍ່, ແຕ່ຖ້າບໍ່ຢາກປ່ຽນວຽກເລື້ອຍໆ ກ່ອນຈະ ຕອບຮັບເຂົ້າເຮັດວຽກກັບບໍລິສັດໃດກໍຕາມ ຕອບຄຳຖາມເຫລົ່ານີ້ໃຫ້ໄດ້ກ່ອນ.
– ຄຳຖາມທີ 1 : ຕຳແໜ່ງວຽກທີ່ເຂົາສະເໜີມານີ້ຕ້ອງເຮັດຫຍັງແດ່ ? ນີ້ເປັນຄຳຖາມສຳຄັນຫລາຍທີ່ສຸດທີ່ທ່ານຈະຕ້ອງຕອບ ໃຫ້ໄດ້ກ່ອນຕັດສິນໃຈເຂົ້າໄປເຮັດວຽກ, ຢ່າຫລົງໄຫລໄປກັບຊື່ຕຳແໜ່ງທີ່ເລີດຫລູຈົນລືມສຶກສາຂໍ້ມູນໃຫ້ລະອຽດ, ໜ້າທີ່ໆທ່ານຈະ ຕ້ອງຮັບຜິດຊອບແມ່ນຫຍັງ ແລະ ກໍບໍ່ແມ່ນເລື່ອງຜິດຫາກທ່ານຈະຖາມລາຍລະອຽດເລື່ອງນີ້ກັບຝ່າຍບຸກຄົນ ຫລື ຄົນທີ່ຕິດຕໍ່ໃຫ້ ທ່ານໄປຮ່ວມວຽກ ເພາະບາງເທື່ອເຖິງວ່າຊື່ຕຳແໜ່ງດຽວກັນ ແຕ່ຄົນລະບໍລິສັດ, ຂອບເຂດໜ້າທີ່ກໍອາດຈະບໍ່ຄືກັນກໍມີ.
– ຄຳຖາມທີ 2 : ທ່ານຄິດເຫັນພາບໂຕເອງເຮັດວຽກໃນຕຳແໜ່ງນີ້ອອກຫລືບໍ່ ? ເວົ້າງ່າຍໆກໍຄື ທ່ານຄິດວ່າໂຕເອງຈະເຮັດວຽກດັ່ງກ່າວໄດ້ແທ້ຫລືບໍ່, ຫລາຍຄົນບອກໂຕເອງວ່າຂໍໃຫ້ມີວຽກເຮັດວຽກຫຍັງກໍເຮັດໄດ້ບໍ່ຕິ, ແຕ່ຊີວິດການເຮັດວຽກບໍ່ໄດ້ຄືກັບຕອນຍັງຮຽນທີ່ທ່ານຈະໄດ້ພົບກັບວິຊາທີ່ບໍ່ມັກ ພຽງແຕ່ບໍ່ເທົ່າໃດອາທິດຕໍ່ເທື່ອ ແລະ ເມື່ອຮຽນຈົບພາກການສຶກສາກໍບໍ່ຕ້ອງພົບກັບວິຊາດັ່ງກ່າວຕໍ່ໄປນີ້, ຖາມໂຕເອງໃຫ້ໝັ້ນໃຈວ່າຫາກຕ້ອງເຮັດວຽກຕາມຕຳແໜ່ງນີ້ໄປຈັກປີໜຶ່ງ, ສອງປີ, ສາມປີ ທ່ານຢູ່ກັບມັນໄດ້ແທ້ໆຫລືບໍ່, ຢ່າຫລອກໂຕເອງ.
– ຄຳຖາມທີ 3 : ເຮັດວຽກນີ້ແລ້ວທ່ານຈະເກັ່ງຂຶ້ນຫລືບໍ່ ? ຊີວິດຄົນເຮົາຕ້ອງມີການພັດທະນາຂຶ້ນເລື້ອຍໆ ບໍ່ຢຸດນິ້ງ ເມື່ອຈະເລີ່ມເຮັດວຽກ ຫລື ປ່ຽນວຽກໃໝ່ ກໍຄວນຊອກຫາວຽກທ່ີມີຫຍັງໃໝ່ໆໃຫ້ທ່ານໄດ້ຮຽນຮູ້ ແລະ ພັດທະນາຕົນເອງຕະຫລອດເວລາ, ລອງຖາມໂຕເອງເບິ່ງວ່າວຽກທີ່ກຳລັງຈະເຮັດຈະຊ່ວຍໃຫ້ທ່ານໄດ້ຫຍັງເພີ່ມຂຶ້ນບໍ່, ທ່ານມີໂອກາດໄປເຂົ້າຝຶກອົບຮົມຫລືເຂົ້າປະຊຸມວຽກງານຫຍັງຫລືບໍ່ ຫລືວ່າວຽກມີຄວາມທ້າທາຍ ເຊິ່ງທ່ານບໍ່ເຄີຍລອງເຮັດມາກ່ອນ ແລະ ຄິດວ່າມັນໜ້າສົນໃຈຫລືບໍ່, ສິ່ງທີ່ທ່ານໄດ້ຮຽນຮູ້ຕື່ມເຫລົ່ານີ້ຈະເປັນຂັ້ນໄດໃຫ້ໜ້າທີ່ວຽກງານຂອງທ່ານເຕີບໃຫຍ່ຂຶ້ນໄປເລື້ອຍໆ.
– ຄຳຖາມທີ 4 : ກ່ອນຈະໄປຮອດບ່ອນເຮັດວຽກລຳບາກປານໃດ ? ເລື່ອງຂອງການຄົມມະນາຄົມກໍເປັນອີກໜຶ່ງປັດໄຈທີ່ຕ້ອງຄຳນຶງເຖິງກ່ອນຈະຕັດສິນໃຈເຮັດວຽກບ່ອນໃດກໍຕາມ ໃຫ້ລອງຄຳນວນເບິ່ງວ່າຈາກບ່ອນຢູ່ຂອງທ່ານມາຮອດບ່ອນເຮັດວຽກໃຊ້ເວລາດົນປານໃດ ແລະ ຕ້ອງເດີນທາງແນວໃດແດ່, ຄິດເຖິງພາບເບິ່ງວ່າຫາກທ່ານຕ້ອງເດີນທາງແບບນີ້ໄປເຮັດວຽກທຸກມື້ ທ່ານພໍຢູ່ກັບມັນໄດ້ຫລືບໍ່, ສິ່ງສຳຄັນຢ່າລືມຄຳນວນຄ່າໃຊ້ຈ່າຍການເດີນທາງແຕ່ລະມື້ນຳ ບາງເທື່ອຫາກບ່ອນຢູ່ ແລະ ບ່ອນເຮັດວຽກຫ່າງກັນຫລາຍ ການເຊົ່າບ່ອນຢູ່ໃກ້ໆກັບບ່ອນເຮັດວຽກອາດຈະກຸ້ມຄ່າກ່ວາຄ່າໃຊ້ຈ່າຍໃນການເດີນທາງ.
– ຄຳຖາມທີ 5 : ວຽກນີ້ໃຫ້ໄດ້ເທົ່າທີ່ທ່ານຕ້ອງການຫລືບໍ່ ? ບໍ່ໄດ້ໝາຍເຖິງແຕ່ໃນດ້ານຂອງເງິນເດືອນເທົ່ານັ້ນ, ແຕ່ຄວນຈະເບິ່ງໄປເຖິງຄວາມກຸ້ມຄ່າໃນດ້ານສະຫວັດດີການທີ່ທ່ານຈະໄດ້ຮັບມາ, ການຂຶ້ນເງິນເດືອນ, ໂບນັດປະຈຳປີ ໄປຈົນເຖິງໂອກາດໃນການເລື່ອນຕຳແໜ່ງ, ຫາກມີບໍລິສັດຕອບຮັບທ່ານເຂົ້າເຮັດວຽກຫລາຍບ່ອນກໍລອງຈົດລາຍການອອກມາເປັນຂໍ້ໆວ່າທ່ານຢາກໄດ້ຫຍັງແດ່ ນັບແຕ່ເລື່ອງການດຳລົງຊີວິດໄປຈົນເຖິງເປົ້າໝາຍໃນການເຮັດວຽກ ເພາະຄວາມຕ້ອງການຂອງແຕ່ລະຄົນບໍ່ຄືກັນ.
ວຽກທີ່ໃຫ້ເງິນດີທີ່ສຸດອາດບໍ່ແມ່ນວຽກທີ່ດີທີ່ສຸດສະເໝີໄປ ຢ່າລືມຄຳນຶງເຖິງເລື່ອງສຸຂະພາບ, ຄອບຄົວ ແລະ ມີມິດຕະພາບນຳ ເພາະເຖິງວ່າທ່ານຈະມີເງິນຫລາຍປານໃດ ແຕ່ຫາກຕ້ອງແລກມາດ້ວຍ 3 ປັດໄຈເຫລົ່ານີ້ ບາງເທື່ອກໍອາດບໍ່ກຸ້ມຄ່າ.
