ອາກາດຮ້ອນຕ້ອງລະວັງອາຫານປະເພດໃດແດ່ ?

ອາຫານທີ່ສ່ຽງຕໍ່ການເກີດພະຍາດໃນຍາມຮ້ອນມີ 7 ປະເພດ ດັ່ງນີ້ :

1. ອາຫານປະເພດກະທິ : ອາຫານທຸກຊະນິດທີ່ນຳໃຊ້ກະທິເປັນສ່ວນປະກອບຕົ້ນຕໍ ເປັນອາຫານທີ່ງ່າຍຕໍ່ການບູດເນົ່າ ເຊື້ອຈຸລິນຊີມັກ ດັ່ງນັ້ນຕ້ອງໝັ້ນໃຈວ່າເປັນອາຫານປຸງແຕ່ງສຸກໃໝ່ໆ ຖ້າກິນບໍ່ໝົດຕ້ອງເອົາເຂົ້າຕູ້ເຢັນແລ້ວຈຶ່ງເອົາມາອຸ່ນ. ທາງທີ່ດີຄວນກິນໃຫ້ໝົດພາຍໃນຄາບດຽວຖ້າບໍ່ສາມາດຫລີກເວັ້ນການກິນອາຫານປະເພດກະທິທີ່ບໍ່ໝັ້ນໃຈວ່າປອດໄພຫລືບໍ່ ໂດຍສະເພາະອາຫານຈາກຮ້ານຂອງກິນສຸກ ຈຶ່ງຈະຫລຸດຄວາມສ່ຽງໄດ້ຫລາຍ.
2. ອາຫານປະເພດຍຳທີ່ມີຊີ້ນຕ່າງໆ : ທັງໝູ, ໄກ່, ປາ, ອາຫານທະເລ ລວມເຖິງຕຳໝາກຫຸ່ງ. ສຳລັບອາຫານຍຳສ່ວນຫລາຍຈະໃຊ້ວິທີລວກ, ແຕ່ລວກບໍ່ສຸກ ເຮັດໃຫ້ເຊື້ອພະຍາດບໍ່ຕາຍ ຫາກກິນເຂົ້າໄປ ເຊື້ອກໍອາດເຂົ້າໄປຂະຫຍາຍພິດໃນຮ່າງກາຍ. ສ່ວນຕຳໝາກຫຸ່ງອາດຈະເປັນອາຫານທີ່ຫລາຍຄົນມັກ ແຕ່ກໍຄວນກິນຕອນຕຳແລ້ວໃໝ່ໆ ບໍ່ຄວນປະໄວ້ຈົນຄາຍເຄື່ອງແລ້ວຈຶ່ງກິນ.
3. ເຂົ້າປຸ້້ນ : ມີຄວາມສ່ຽງທັງຈາກເສັ້ນເຂົ້າປຸ້ນ, ນຳ້ເຂົ້າປຸ້ນ ແລະ ຜັກສົດທີ່ບໍ່ລ້າງ ຫລື ລ້າງບໍ່ສະອາດ ເນື່ອງຈາກທັງເສັ້ນເຂົ້າປຸ້ນ ແລະ ກະທິນັ້ນບູດງ່າຍຫລາຍ ສ່ວນຜັກບໍ່ວ່າຈະຜັກສົດ ຜັກດອງ ກໍລ້ວນແຕ່ຕ້ອງລະວັງ.

4.​ ອາຫານທະເລ : ຈະບູດເນົ່າງ່າຍໃນຍາມຮ້ອນ ກ່ອນກິນຕ້ອງເຮັດໃຫ້ສຸກທຸກເທື່ອ ໂດຍສະເພາະຍຳຫອຍແຄງ, ຍຳປາໝຶກ.

5. ອາຫານຄ້າງຄືນ ຫລື ອາຫານທີ່ກິນເຫລືອຈາກຄາບເກົ່າ : ຕ້ອງໝັ້ນໃຈວ່າບໍ່ບູດເນົ່າ ແລະ ມີການອຸ່ນໃຫ້ສຸກດີ. ທາງທີ່ດີຄວນກິນອາຫານທີ່ປຸງແຕ່ງໃຫ້ສຸກໃໝ່ທຸກເທື່ອເທົ່ານັ້ນ.
6. ອາຫານທີ່ມີແມງວັນຕອມ : ສັງເກດໄດ້ງ່າຍຫລາຍ ໂດຍສະເພາະອາຫານປຸງສຳເລັດທີ່ວາງຂາຍໃນພາຊະນະທີ່ບໍ່ມີຝາອັດ ແລະ ສິ່ງໃດປົກປິດ ສິ່ງສຳຄັນຄົງບໍ່ແມ່ນແຕ່ແມງວັນທີ່ໄປໄຕ່ຕອມ, ແຕ່ຂີ້ຝຸ່ນ, ເຊື້ອພະຍາດກໍຕົກລົງໄປໃນອາຫານນຳ.
7. ນຳ້ດື່ມ ແລະ ນຳ້ກ້ອນ : ຕ້ອງໝັ້ນໃຈວ່າເປັນນຳ້ດື່ມທີ່ສະອາດໄດ້ມາດຕະຖານອົງການອາຫານ ແລະ ຢາ, ນຳ້ກ້ອນທີ່ແຊ່ແຂງຮ່ວມກັບອາຫານນັ້ນສ່ຽງຕໍ່ການເຮັດໃຫ້ຖອກທ້ອງຫລາຍ.