ມິລານ ເປີດເຈລະຈາ ເຊລຊີ ຂໍຢືມ 3 ນັກເຕະເສີມທີມມັງກອນນີ້
ສະປ໋ອດ ມີເດຍເຊັດ ກັບ ເຣດິໂອ ຣອສໂຊເນຣ່າ ສື່ຂອງປະເທດອີຕາລີ ລາຍງານວ່າ: ເອຊີ ມິລານ ກຳລັງເຈລະຈາກັບ ເຊລຊີ ເພື່ອຂໍຄວ້າ ເຊສ ຟາເບຣກາສ, ແກຣີ ເຄຮິລ ແລະ ອັນເດຣີ ຄຣິສເຕນເຊນ ມາຮ່ວມທີມດ້ວຍສັນຍາຢືມຕົວໃນເດືອນມັງກອນນີ້ ໂດຍຄົນທີ່ “ຣອສໂມເນຣີ” ຕ້ອງການຫລາຍທີ່ສຸດຄື ຟາເບຣກາສ.
ເອຊີ ມິລານ ສະໂມສອນຊັ້ນນຳແຫ່ງ ກັລໂຊ່ ເຊເຣຍ ອາ ອີຕາລີ ກຳລັງເຈລະຈາກັບ ເຊລຊີ ກ່ຽວກັບການຂໍຢືມ ເຊສ ຟາເບຣກາສ, ແກຣີ ເຄຮິລ ແລະ ອັນເດຣີ ຄຣິສເຕນເຊນ ໄປຮ່ວມທີມໃນຕະຫລາດຊື້-ຂາຍນັກເຕະຮອບສອງ ຊ່ວງເດືອນມັງກອນນີ້.
ປັດຈຸບັນ ມີນັກເຕະຫລາຍຄົນຂອງ ມິລານ ທີ່ມີອາການບາດເຈັບຈົນຕ້ອງພັກໃນລະດັບໜຶ່ງເຊັ່ນ: ລູກັສ ບີຢາ, ຈາໂຄໂມ່ ໂບນາເວນຕູຣາ ແລະ ມັດເຕຍ ຄັລດາຣາ ເປັນຕົ້ນ ເຊິ່ງເຮັດໃຫ້ພວກເຂົາຊອກຫາທາງທີ່ຈະເຮັດໃຫ້ກຳລັງຍັງດີພໍສຳລັບການສູ້ສຶກໃນລະດູການນີ້ ແຕ່ມີບັນຫາທີ່ສະໂມສອນເລັ່ງຈະເສີມທີມແບບຢືມຕົວເທົ່ານັ້ນ ເພາະຕອນນີ້ພວກເຂົາມີສິດຖືກສະຫະພັນບານເຕະຢູໂຣບ (ຢູຟາ) ລົງໂທດເພີ່ມຈາກກໍລະນີລະເມີດກົດຄວບຄຸມການເງິນ.
ທັງນີ້, ຈາກທັງ 3 ຄົນໃນເບື້ອງຕົ້ນນັ້ນ ນັກເຕະທີ່ ມິລານ ຢາກໄດ້ມາຮ່ວມທີມຫລາຍທີ່ສຸດຄື ຟາເບຣກາສ ໂດຍມີການລະບຸວ່າ: ເລໂອນາໂດ້ ຜູ້ອຳນວຍການກິລາຂອງ ມິລານ ເປັນຄົນຕິດຕໍ່ກັບ ມາຣິນ່າ ກຣານອຟສະກາຢາ ເຈົ້າໜ້າທີ່ດ້ານການເຈລະຈາເລື່ອງຊື້-ຂາຍຂອງ ເຊລຊີ ເອງເລີຍ.
