ສະພາແຫ່ງຊາດສະເໜີໃຫ້ກະຊວງອຸດສາຫະກໍາ ແລະ ການຄ້າ ເລັ່ງແກ້ໄຂຫລາຍບັນຫາ

ໃນວາລະດໍາເນີນກອງປະຊອງສະໄໝສາມັນເທື່ອທີ VI ຂອງສະພາແຫ່ງຊາດ ຊຸດທີ VIII ຄັ້ງວັນທີ 26 ພະຈິກນີ້, ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ໂດຍທ່ານໄດ້ສະເໜີໃຫ້ກະຊວງອຸດສາຫະກໍາ ແລະ ການຄ້າ ເລັ່ງແກ້ໄຂ 4 ບັນຫາ ທີ່ບັນດາຜູ້ແທນໄດ້ທີຄໍາເຫັນໃນກອງປະຊຸມຄັ້ງນີ້ ເປັນຕົ້ນຄື: ໃຫ້ເອົາໃຈໃສ່ຕື່ມກ່ຽວກັບການສ້າງນະໂຍບາຍສະໜັບສະໜູນໃຫ້ຈະແຈ້ງການສ້າງຕັ້ງດ່ານກວດກາກັກກັນພືດ ບໍ່ຮູ້ວ່າສາເຫດຍ້ອນຫຍັງຈຶ່ງບໍ່ສາມາດເກີດຂຶ້ນໄດ້ ແລະ ຈະໃຊ້ເວລາດົນປານໃດ ແລະ ແມ່ນຄວາມຮັບຜິດຂອງຂອງຂະແໜງການໃດ, ສະນັ້ນຕໍ່ບັນຫານີ້ ລັດຖະບານຕ້ອງໄດ້ສູ້ຊົນເຮັດຢ່າງໄວວາທີ່ສຸດ ແລະ ສະເໜີລັດຖະມົນຕີກະຊວງດັ່ງກ່າວ ກໍານົດມາດຕະການ ແລະ ນະໂຍບາຍ ເພື່ອແກ້ໄຂດັດສະນີຕົວຊີ້ວັດ ການເລີ່ມດໍາເນີນທຸລະກິດໃຫ້ຫລຸດລົງ ແລະ ບັນຫາສຸດທ້າຍ ກ່ຽວກັບມາດຕະການ ແລະ ນະໂຍບາຍ ເພື່ອສາມາດບັນລຸມູນຄ່າສົ່ງອອກສິນຄ້າ 5 ຕື້ໂລດາສະຫະລັດ ນີ້ເປັນໂຕເລກທີ່ທ້າທາຍຫຼາຍ, ສະນັ້ນເພື່ອບັນລຸຕົວຄາດໝາຍດັ່ງກ່າວນີ້ ທາງກະຊວງ ຫຼືຂະແໜງອຸດສາຫະກໍາ ແລະ ການຄ້າ ແລະ ຂະແໜງການຕ່າງໆ ຕ້ອງມີມາດຕະການ ແລະ ນະໂຍບາຍຢ່າງສອດຄ່ອງ ແລະ ນີ້ກໍເປັນຄວາມຫວັງໜຶ່ງ ເພື່ອກະຕຸ້ນເສດຖະກິດມີການຂະຫາຍຕົວ.