ມີຫລາຍໂຄງການລົງທຶນຖືກສັ່ງໂຈະຍ້ອນສົ່ງຜົນກະທົບຕໍ່ສິ່ງແວດລ້ອມ
ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໃຫ້ຮູ້ວ່າ: ປີນີ້ຂະແໜງການຕົນໄດ້ສັ່ງໂຈະ ແລະ ຖອນໃບຢັ້ງຢືນຂອງໂຮງງານຫລາຍແຫ່ງທີ່ບໍ່ຮັບປະກັນດ້ານສິ່ງແວດລ້ອມ ປະກອບມີໂຈະດຳເນີນກິດຈະການດູດຫີນ-ຊາຍຢູ່ນ້ຳງື່ມ ເມືອງທຸລະຄົມ, ຖອນໃບຢັ້ງຢືນດ້ານສິ່ງແວດລ້ອມໂຮງງານຜະລິດເຈ້ຍ ບໍລິສັດຊັນເປເປີ ຢູ່ເມືອງເຊໂປນ ແຂວງສະຫວັນນະເຂດ, ຖອນໃບຢັ້ງຢືນດ້ານສິ່ງແວດລ້ອມ ໂຄງການໄຟຟ້ານ້ຳຕົກນ້ຳເນີນ 3 ຢູ່ແຂວງຫົວພັນ ແລະ ອອກແຈ້ງການໃຫ້ຢຸດເຊົາດຳເນີນກິດຈະການຂອງໂຮງງານກັ່ນຕອງນ້ຳມັນເກົ່າສຸກສາຄອນ, ໂຮງງານລາວອິຣຕາເກດເວສ່ວນບຸກຄົນ, ໂຮງງານກັ່ນຕອງນ້ຳມັນເຕົາ ບໍລິສັດວຽງຈັນຣີຟາຍານຣີຈຳກັດ ແລະ ໂຮງງານຕົ້ມກົ່ວຈາກໝໍ້ໄຟເກົ່າ ຢູ່ບ້ານບໍ່ເຫລັກ ເມືອງໄຊທານີ ນະຄອນຫລວງວຽງຈັນ ທີ່ສົ່ງຜົນກະທົບຕໍ່ສິ່ງແວດລ້ອມ ແລະ ສັງຄົມ. ນອກນີ້ ຍັງໄດ້ລົງເກັບກຳຂໍ້ມູນການນຳໃຊ້ສານເຄມີຢູ່ທ້ອງຖິ່ນຕ່າງໆທີ່ໄດ້ຮັບຄຳສະເໜີຈາກປະຊາຊົນຢູ່ບັນດາແຂວງພາກເໜືອທີ່ມີການໃຊ້ສານເຄມີອັນຕະລາຍເຂົ້າໃນການປູກຝັງ ເຊິ່ງກໍ່ໃຫ້ເກີດມົນລະພິດຜົນກະທົບຕໍ່ສຸຂະພາບຂອງຄົນ ແລະ ສິ່ງແວດລ້ອມ.
ກະຊວງດັ່ງກ່າວໃຫ້ຮູ້ວ່າ: ລັດຖະບານໄດ້ຖືເອົາວຽກງານປະເມີນສິ່ງແວດລ້ອມເປັນຕົວຊີ້ວັດ ເພື່ອພິຈາລະນາຮັບຮອງໂຄງການລົງທຶນ ເພື່ອໃຫ້ໂຄງການລົງທຶນຕ່າງໆສົ່ງຜົນກະທົບຕໍ່ສິ່ງແວດລ້ອມ ແລະ ສັງຄົມໜ້ອຍທີ່ສຸດ ໂດຍສະເພາະດຳລັດວ່າດ້ວຍການປະເມີນຜົນກະທົບຕໍ່ສິ່ງແວດລ້ອມທີ່ຫາກໍໄດ້ຮັບຮອງຈາກກອງປະຊຸມລັດຖະບານໃນເດືອນພະຈິກ 2018 ນີ້ ມາດຕາ 46 ວ່າດ້ວຍການໂຈະໃບຢັ້ງຢືນກ່ຽວກັບສິ່ງແວດລ້ອມ ແລະ ມາດຕາ 47 ວ່າດ້ວຍການຖອນໃບຢັ້ງຢືນກ່ຽວກັບສິ່ງແວດລ້ອມ ໄດ້ມອບສິດໃຫ້ຂະແໜງການຊັບພະຍາກອນທຳມະຊາດ ແລະ ສິ່ງແວດລ້ອມສາມາດແຈ້ງຂະແໜງການທີ່ຄຸ້ມຄອງ ຫລື ອະນຸມັດໂຄງການລົງທຶນໂຈະການດຳເນີນໂຄງການລົງທຶນ ແລະ ກິດຈະການທີ່ສ້າງມົນລະພິດ ແລະ ສົ່ງຜົນກະທົບຕໍ່ສິ່ງແວດລ້ອມ ແລະ ສັງຄົມຮ້າຍແຮງ.
