ຍ້ອນຫຍັງທຸລະກິດລັດສ່ວນຫລາຍຈຶ່ງຂາດທຶນ

ຕາມການລາຍງານຂອງທ່ານນາຍົກລັດຖະມົນຕີ ທອງລຸນ ສີສຸລິດ ຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ທີ່ພວມດໍາເນີນຢູ່ນັ້ນໃຫ້ເຫັນວ່າ: ປັດຈຸບັນມີຫລາຍຫົວໜ່ວຍທຸລະກິດຂອງລັດປະສົບບັນຫາການຂາດທຶນ ແລະ ອາດມີແນ້ວໂນ້ມກ້າວໄປເຖິງຂັ້ນຢູ່ບໍ່ຫລອດ ເປັນຕົ້ນ: ທະນາຄານພັດທະນາລາວ, ທະນາຄານສົ່ງເສີມກະສິກໍາ, ລັດວິສາຫະກິດການບີນລາວ, ລັດວິສາຫະກິດໄຟຟ້າລາວ ແລະ ບາງບໍລິສັດຂະໜາດໃຫຍ່ຈໍານວນໜຶ່ງ ແລະ ຕໍ່ບັນຫາດັ່ງກ່າວຈຶ່ງເກີດມີຄໍາຖາມຫລວງຫລາຍທັງຈາກສະມາຊິກສະພາແຫ່ງຊາດກໍຄືສັງຄົມຕາມມາວ່າເປັນຫຍັງຈຶ່ງເປັນເຊັ່ນນັ້ນ? ແລະ ລັດຖະບານຈະມີມາດຕະການແກ້ໄຂແນວໃດ? ເພື່ອໃຫ້ບັນດາຫົວໜ່ວຍທຸລະກິດລັດເຫລົ່ານັ້ນສາມາດຟື້ນຄືນສູ່ສະພາບປົກກະຕິ ແລະ ເຄື່ອນໄຫວຢ່າງມີປະສິດທິຜົນ.

ລັດຖະບານ ໃຫ້ຮູ້ວ່າ: ສະພາບລັດວິສາຫະກິດດໍາເນີນທຸລະກິດຂາດທຶນແມ່ນເປັນບັນຫາຊໍາເຮື້ອມາດົນ ແລະ ລັດຖະບານກໍໄດ້ພະຍາຍາມຊອກຫາວິທີການຕ່າງໆເພື່ອແກ້ໄຂມາໂດຍຕະຫລອດ, ເຊິ່ງມີບາງຫົວໜ່ວຍກໍສາມາດຟື້ນຕົວກັບມາເຄື່ອນໄຫວເປັນຢ່າງດີ, ຂະນະດຽວກັນກໍມີຫລາຍຫົວໜ່ວຍຍັງປະສົບຄວາມຫຍຸ້ງຍາກແກ່ຍາວມາຮອດປັດຈຸບັນ, ເຊິ່ງສາເຫດສໍາຄັນແມ່ນເກີດຈາກຫລາຍປັດໃຈທັງໃນຕົວ ແລະ ນອກຕົວ ເປັນຕົ້ນ: ພື້ນຖານເສດຖະກິດຂອງປະເທດເຮົາຍັງບໍ່ທັນຂະຫຍາຍຕົວແຂງແຮງ, ລະບົບການຄຸ້ມຄອງບໍລິຫານທີ່ອ່ອນແອໄດ້ສະສົມຊໍາເຮື້ອມາເປັນເວລາດົນ, ຫລາຍຫົວໜ່ວຍທຸລະກິດຂາດການສຶກສາຄົ້ນຄວ້າຂໍ້ມູນດ້ານເສດຖະກິດ, ບາງຫົວໜ່ວຍເກີດມີສະພາບສໍ້ລາດບັງຫລວງ, ຄວາມບໍ່ໂປ່ງໃສຂອງພະນັກງານ ແລະ ໃຊ້ຈ່າຍຟູມເຟືອຍໃນອົງກອນ ແລະ ອື່ນໆ, ຊຶ່ງທັງໝົດນັ້ນລ້ວນແຕ່ແມ່ນສາເຫດທີ່ພາໃຫ້ລັດວິສາຫະກິດປະສົບຄວາມຫຍຸ້ງຍາກ ແລະ ຂາດທຶນ.

ແຕ່ແນວໃດກໍຕາມ, ນັບແຕ່ລັດຖະບານຊຸດໃໝ່ໄດ້ເຂົ້າມາບໍລິຫານປະເທດເລີ່ມແຕ່ຕົ້ນປີ 2016 ຜ່ານມາ, ກໍໄດ້ຜະເຊີນກັບຫລາຍບັນຫາທາງດ້ານເສດຖະກິດທີ່ມີຄວາມຫຍຸ້ງຍາກ, ໂດຍສະເພາະດ້ານງົບປະມານ-ການເງິນ ແລະ ສະພາບການຂາດທຶນຂອງທຸລະກິດລັດກໍແມ່ນບັນຫາໜຶ່ງທີ່ລັດຖະບານໄດ້ປະສົບພົບພໍ້ ແລະ ໄດ້ສືບຕໍ່ດໍາເນີນການກວດສອບກວດກາ, ປັບປຸງ ແລະ ດໍາເນີນມາດຕະການໃນລະດັບຕ່າງໆຕໍ່ພະນັກງານທີ່ຂາດຄວາມຮັບພິຊອບ ເປັນຕົ້ນ: ປັບປຸງຄືນລະບົບການຈັດຕັ້ງ, ຊັບຊ້ອນບຸກຄະລະກອນ, ປັບປຸງລະບຽບ ການຄຸ້ມຄອງບໍລິຫານ, ລວມເຖິງຊອກຊ່ອງທາງທີ່ເໝາະສົມເພື່ອແກ້ໄຂສະພາບຄ່ອງດ້ານການເງິນຕ່າງໆ ເພື່ອຮັບປະກັນບໍ່ໃຫ້ເກີດຜົນສະທ້ອນອັນບໍ່ດີຕໍ່ລັດຖະບານ ກໍຄືສັງຄົມ, ທັງເຮັດໃຫ້ບັນດາວິສາຫະກິດຂອງລັດໄດ້ດໍາເນີນການເຄື່ອນໄຫວຜະລິດ ແລະ ບໍລິການສັງຄົມຢ່າງມີປະສິດທິພາບ ແລະ ປະສິດທິຜົນ.