ປະທານປະເທດສໍາເລັດການເຂົ້າຮ່ວມເວທີປືກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວທາງໜຶ່ງເສັ້ນທາງ” ທີ່ ສປ ຈີນ

  ໃນວັນທີ 14-15 ພຶດສະພານີ້, ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປ ລາວ ພ້ອມດ້ວຍຄະນະຜູ້ແທນຂັ້ນສູງຂອງລາວໄດ້ເຂົ້າຮ່ວມກອງປະຊຸມເວທີປືກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວທາງໜຶ່ງເສັ້ນທາງ” ພາຍໃຕ້ຫົວຂໍ້: “ການຮ່ວມມືເພື່ອຄວາມວັດທະນາຖາວອນຮ່ວມກັນ” ທີ່ປັກກິ່ງ ສປຈີນ, ໂດຍມີປະມຸກລັດ ແລະ ຫົວໜ້າລັດຖະບານຫລາຍກວ່າ 20 ປະເທດຈາກອາຊີຕາເວັນອອກສ່ຽງໃຕ້, ອາຊີໃຕ້, ອາຊີກາງ, ເອີຣົບ ແລະ ອາຟຣິກາ ແລະ ມີ 3 ອົງການຈັດຕັ້ງສາກົນຄື: ອົງການສະຫະປະຊາຊາດ, ອົງການກອງທຶນການເງິນສາກົນ ແລະ ທະນາຄານໂລກເຂົ້າຮ່ວມ.

ກອງປະຊຸມເວທີປຶກສາຫາລືຂັ້ນສູງຄັ້ງນີ້, ໄດ້ປືກສາຫາລື 3 ຫົວຂໍ້ຄື: (1) ການປະສານສົມທົບດ້ານນະໂຍບາຍເພື່ອການເປັນຄູ່ຮ່ວມທີ່ໃກ້ຊິດກັນຂຶ້ນກວ່າເກົ່າ. (2) ສາຍພົວພັນລະຫວ່າງປະຊາຊົນກັບປະຊາຊົນຢ່າງໃກ້ຊິດສະນິດແໜ້ນ ແລະ (3) ການຮ່ວມມືດ້ານການເຊື່ອມຈອດເພື່ອການພັດທະນາຊຶ່ງກັນ ແລະ ກັນ. ເພື່ອຊອກຊ່ອງທາງແກ້ໄຂສະພາບເສດຖະກິດຂອງໂລກໃນປັດຈຸບັນ ແລະ ວາງແນວທາງເສດຖະກິດໃນອານາຄົດ ເປັນຕົ້ນ: ການຮ່ວມມືດ້ານເສດຖະກິດ, ນະໂຍບາຍການເງິນ ແລະ ການພັດທະນາເສດຖະກິດຂອງພາກພື້ນ ແລະ ສາກົນ ແລະ ເພື່ອສົ່ງເສີມການເປັນຄູ່ຮ່ວມເພື່ອການພັດທະນາ, ສ້າງຂະບວນໂລກາພິວັດໃຫ້ເປີດກວ້າງ ແລະ ກວມລວມ ແລະ ແລກປ່ຽນບັນດາຂະບວນການວິວັດທີ່ເປັນປະໂຫຍດແກ່ທຸກຝ່າຍ, ພ້ອມກັນນັ້ນກອງປະຊຸມໄດ້ຮັບຮອງເອົາຖະແຫລງການຮ່ວມກອງປະຊຸມໂຕະມົນຂອງບັນດາຜູ້ນໍາເວທີປືກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວທາງໜຶ່ງເສັ້ນທາງ”.

ໂອກາດດັ່ງກ່າວ, ທ່ານປະທານປະເທດ ບຸນຍັງ ວໍລະຈິດ ໄດ້ປະກອບຄໍາເຫັນວ່າຂໍ້ລິເລີ່ມ “ໜຶ່ງແລວທາງໜຶ່ງເສັ້ນທາງ” ທີ່ປະກາດໂດຍທ່ານ ສີຈີນຜິງ ໃນປີ 2013 ແມ່ນຖືກຕ້ອງກັບການເວລາ ແລະ ກາລະໂອກາດແຫ່ງການສົ່ງເສີມການຮ່ວມມືຜ່ານການເຊື່ອມຈອດດ້ານພື້ນຖານໂຄງລ່າງ, ດ້ານເສດຖະກິດ, ການຄ້າ, ການລົງທຶນ ແລະ ການເຊື່ອມຈອດລະຫວ່າງປະຊາຊົນກັບປະຊາຊົນ ແລະ ໄດ້ຕີລາຄາສູງຕໍ່ຜົນສໍາເລັດເບື້ອງຕົ້ນຂອງຂໍ້ລິເລີ່ມດັ່ງກ່າວ, ຊຶ່ງສະແດງອອກໃຫ້ເຫັນແຈ້ງມາເຖິງປັດຈຸບັນມີຫລາຍກວ່າ 60 ປະເທດຈາກທະວີບອາຊີ ແລະ ເອີຣົບເຂົ້າຮ່ວມສະໜັບສະໜູນຂໍ້ລິເລີ່ມດັ່ງກ່າວ, ພ້ອມນັ້ນກໍໄດ້ຢືນຢັນເຖິງເຈດຕະນາລົມຂອງ ສປປ ລາວ ໃນການສະໜັບສະໜູນການເຂົ້າຮ່ວມຍຸດທະສາດໜຶ່ງແລວທາງໜຶ່ງເສັ້ນທາງ, ພ້ອມທັງການເຂົ້າຮ່ວມໃນຂໍ້ລິເລີ່ມ ແລະ ໂຄງການຕ່າງໆ ທີ່ເຫັນວ່າສາມາດນໍາຜົນປະໂຫຍດມາສູ່ ສປປ ລາວ ແລະ ພາກພື້ນຢ່າງແທ້ຈິງ, ໂດຍແນໃສ່ເພື່ອສືບຕໍ່ຜັນຂະຫຍາຍນະໂຍບາຍການສ້າງ ສປປ ລາວ ໃນສາມາດເຊື່ອມໂຍງກັບພາກພື້ນ, ອານຸພາກພື້ນ ແລະ ສາກົນ ບົນພື້ນຖານການນໍາໃຊ້ທ່າແຮງຈາກຂໍ້ລິເລີ່ມໜຶ່ງແລວທາງໜຶ່ງເສັ້ນທາງດັ່ງກ່າວ, ຊຶ່ງເຫັນໄດ້ຈາກຜົນສໍາເລັດເບື້ອງຕົ້ນຂອງການຈັດຕັ້ງປະຕິບັດໂຄງການກໍ່ສ້າງເສັ້ນທາງລົດໄຟຄວາມໄວສູງລາວ-ຈີນ ແຕ່ນະຄອນຫລວງວຽງຈັນຫາຄຸນມິງ ທີ່ຈະປະກອບສ່ວນຢ່າງແຂງແຮງເຮັດໃຫ້ ສປປ ລາວ ສາມາດເຊື່ອມຈອດພື້ນຖານໂຄງລ່າງ, ດ້ານເສດຖະກິດ, ການຄ້າ ແລະ ການລົງທຶນ ແລະ ເຊື່ອມຈອດລະຫວ່າງປະຊາຊົນກັບປະຊາຊົນກັບປະເທດໃກ້ຄຽງ ແລະ ພາກພື້ນ ໂດຍສອດຄ່ອງກັບຍຸດທະສາດການຫັນປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມຈອດຂອງ ສປປ ລາວ.

ໃນໂອກາດເຄື່ອນໄຫວຢູ່ ສປຈີນ, ທ່ານປະທານປະເທດ ບຸນຍັງ ວໍລະຈິດ ຍັງໄດ້ພົບປະສອງຝ່າຍກັບທ່ານ ສີຈີນຜິງ ເພື່ອຊຸກຍູ້ສົ່ງເສີມ ແລະ ເພີ່ມທະວີຮັດແໜ້ນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ກວ້າງຂວາງຂຶ້ນກວ່າເກົ່າ ແລະ ໄດ້ໃຫ້ກຽດເຂົ້າຮ່ວມເປັນສັກຂີພິຍານໃນພິທີລົງນາມແຜນແມ່ບົດກ່ຽວກັບການຊຸກຍູ້ການຮ່ວມມືເພື່ອສ້າງ “ໜຶ່ງແລວທາງໜຶ່ງເສັ້ນທາງ” ລະຫວ່າງກະຊວງແຜນການ ແລະ ການລົງທຶນແຫ່ງ ສປປ ລາວ ແລະ ຄະນະກໍາມະການພັດທະນາປະຕິຮູບແຫ່ງ ສປຈີນ. ໃນໂອກາດນີ້ທ່ານປະທານປະເທດກໍໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນທີ່ເຕັມໄປດ້ວຍໄມຕີຈິດມິດຕະພາບແຫ່ງອຸດົມການອັນດຽວກັນ ແລະ ສະແດງຄວາມຊົມເຊີຍຕໍ່ຜົນສໍາເລັດອັນຈົບງາມຂອງການເປັນເຈົ້າພາບຈັດກອງປະຊຸມເວທີປຶກສາຫາລືຂັ້ນສູງວ່າດ້ວຍການຮ່ວມມືສາກົນ “ໜຶ່ງແລວທາງໜຶ່ງເສັ້ນທາງ” ຂອງ ສປຈີນ, ໃນຂະນະດຽວກັນທ່ານ ສີຈີນຜິງ ກໍໄດ້ສະແດງຄວາມຂອບໃຈຕໍ່ທ່ານປະທານປະເທດແຫ່ງ ສປປ ລາວ ທີ່ໄດ້ນໍາພາຄະນະຜູ້ແທນລາວມາເຂົ້າຮ່ວມກອງປະຊຸມເວທີປຶກສາຫາລືຂັ້ນສູງດັ່ງກ່າວ, ພ້ອມທັງຢືນຢັນເຖິງເຈດຕະນາລົມໃນການສະໜັບສະໜູນການເຂົ້າຮ່ວມຂໍ້ລິເລີ່ມດັ່ງກ່າວຂອງ ສປປ ລາວ.

ນອກຈາກນີ້, ປະທານປະເທດແຫ່ງ ສປປ ລາວ ຍັງໄດ້ພົບປະເຮັດວຽກສອງຝ່າຍກັບທ່ານ ວາລາດີເມຍ ປູຕິນ ປະທານາທິບໍດີແຫ່ງ ສ.ຣັດເຊຍ ແລະ ພະນະທ່ານ ເຈີນດ້າຍກວາງ ປະທານປະເທດແຫ່ງ ສສ ຫວຽດນາມ ແລະ ໄດ້ຮັບການເຂົ້າຢ້ຽມຂໍ່ານັບຂອງນາຍົກລັດຖະມົນຕີ ມົງໂກລີ ອີກດ້ວຍ.