ອົງການການຄ້າໂລກຈະຮັບຂໍ້ຮ້ອງຮຽນ ອາເມລິກາເກັບພາສີເຫລັກ-ອາລູມີນຽມ
ອົງການການຄ້າໂລກຕົກລົງຮັບເລື່ອງຮ້ອງຮຽນຂອງຫລາຍປະເທດ ກໍລະນີອາເມລິກາເກັບພາສີເຫລັກ ແລະ ອາລູມີນຽມ ແລະ ເລື່ອງຮ້ອງຮຽນຂອງອາເມລິກາທີ່ຖືກເກັບພາສີຕອບໂຕ້.
ອົງການລະງັບຂໍ້ຂັດແຍ່ງ (ດີເອສບີ) ຂອງອົງການການຄ້າໂລກ ຕົກລົງຕັ້ງຄະນະກຳມະການແຕ່ລະຊຸດຂຶ້ນຮັບຟັງຂໍ້ຮ້ອງຮຽນຂອງສະຫະພາບເອີຣົບ (EU), ຈີນ, ການາດາ, ແມັກຊິກ, ນອກແວ, ຣັດເຊຍ ແລະ ຕວກກີ ເລື່ອງອາເມລິກາເກັບພາສີນຳເຂົ້າເຫລັກ ແລະ ອາລູມີນຽມໃນອັດຕາ 25% ແລະ 10% ເນື່ອງຈາກອາເມລິກາບໍ່ຍອມໃຫ້ຕັ້ງຄະນະກຳມະການຊຸດດຽວ. ດີເອສບີ ຍັງຕົກລົງຈະຕັ້ງຄະນະກຳມະການ 3 ຊຸດຕາມທີ່ອາເມລິກາຮ້ອງຂໍໃຫ້ພິຈາລະນາວ່າ: ພາສີຕອບໂຕ້ຂອງການາດາ, ຈີນ, ແມັກຊິກ ແລະ EU ຖືກກົດໝາຍ ຫລື ບໍ່ ແລະ ຕັ້ງຄະນະກຳມະການທົບທວນການດຳເນີນການຂອງຈີນໃນການປົກປ້ອງຊັບສິນທາງປັນຍານຳອີກ.
ປະທານາທິບໍດີ ໂດນັລ ທຣຳ ຂອງອາເມລິກາ ອາໄສຂໍ້ຍົກເວັ້ນຂອງອົງການການຄ້າໂລກ ທີ່ອະນຸຍາດໃຫ້ດຳເນີນມາດຕະການທີ່ເຫັນວ່າຈຳເປັນ ເພື່ອປົກປ້ອງຜົນປະໂຫຍດສຳຄັນຂອງປະເທດ ມາໃຊ້ເກັບພາສີນຳເຂົ້າສິນຄ້າຈາກຫລາຍປະເທດ ໂດຍອ້າງວ່າສິນຄ້າທີ່ໄຫລເຂົ້າມາຫລວງຫລາຍເປັນໄພຕໍ່ຄວາມໝັ້ນຄົງຂອງປະເທດ, ເປັນຂໍ້ຍົກເວັ້ນທີ່ບໍ່ມີປະເທດໃດໃຊ້ ແລະ ສວນທາງກັບແນວທາງຂອງອາເມລິກາທີ່ສະໜັບສະໜູນເລື່ອງການຄ້າເສລີມາໂດຍຕະຫລອດ.
