ສະຫວັນນະເຂດຈັດຄາລາວານລົດຖີບ ສະຫລອງປີທ່ອງທ່ຽວລາວ 2018
ສະຫະພັນລົດຖີບແຂວງສະຫວັນນະເຂດ ໄດ້ຈັດກິດຈະກຳຄາລາວານຂີ່ລົດຖີບສະຫລອງປີທ່ອງທ່ຽວລາວ 2018 ຂຶ້ນ ໃນວັນທີ 17 ພະຈິກຜ່ານມາ. ທັງນີ້ກໍເພື່ອເປັນການຮັດແໜ້ນຄວາມສາມັກຄີຂອງປະຊາຊົນບັນດາເຜົ່າໃຫ້ເປັນປຶກແຜ່ນແໜ້ນໜາ, ເປັນການອອກກຳລັງກາຍ ເພື່ອສຸຂະພາບ ໂດຍການເຂົ້າຮ່ວມຂອງທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ບຸນຍູ້ ທຳມະວົງ ເຈົ້ານະຄອນໄກສອນ ພົມວິຫານ, ມີສະມາຊິກສະມາຄົມລົດຖີບຈາກຈັງຫວັດມຸກດາຫານ ປະເທດໄທ ເຂົ້າຮ່ວມກວ່າ 30 ຄົນ.
ທ່ານ ໂພໄຊ ໄຊຍະສອນ ມີຄຳເຫັນວ່າ: ຄາລາວານລົດຖີບຄັ້ງນີ້ຈັດຂຶ້ນພາຍໃຕ້ຫົວຂໍ້ທີ່ວ່າ: ຮ່ວມພະລັງກັນຂີ່ລົດຖີບ ເພື່ອສະເຫລີມສະຫລອງປີທ່ອງທ່ຽວລາວ 2018 ເຊິ່ງມີໄລຍະທາງເກືອບ 20 ກິໂລແມັດ ໂດຍເລີ່ມຈາກຈຸດປ່ອຍທີ່ສວນໜູຮັກ ພູມສະຫວັນ ຕາມທາງຖະໜົນຄັນທະບູລີລ້ຽວຊ້າຍສີ່ແຍກໂຮງຮຽນທ່າແຮ່ແລ້ວໄປເຊື່ອມຕໍ່ໃສ່ຖະໜົນສັນຕິພາບຜ່ານວົງວຽນ 11 ແຍກອອກໄປຕາມຖະໜົນໃຫຍ່ເສັ້ນທາງສະຫວັນນະເຂດ-ເຊໂນ ລ້ຽວຂວາແລ້ວໄປສິ້ນສຸດເຂົ້າໄຫວ້ພະທາດອີງຮັງ.
ສະຫະພັນລົດຖີບແຂວງສະຫວັນນະເຂດ ໄດ້ຮັບການປັບປຸງລະບົບການຈັດຕັ້ງຄືນໃໝ່ ເພື່ອໃຫ້ມີຜົນງານ. ອີກຢ່າງການຈັດກິດຈະກຳຄັ້ງນີ້ກໍເປັນການຊອກຫາຕົວນັກກິລາລົດຖີບທີ່ມີຄວາມແຂງແກ່ນໝັ່ນການຝຶກແອບເປັນປະຈຳ ເຊິ່ງຈະເປັນຕົວແທນຂອງນັກກິລາທີ່ຈະເຂົ້າຮ່ວມໃນການແຂ່ງຂັນກິລາແຫ່ງຊາດ ເຊິ່ງຈະຈັດຂຶ້ນທີ່ແຂວງຊຽງຂວາງໃນທ້າຍປີ 2019 ຈະມາເຖິງນີ້.
