ປີໜ້າລັດຖະບານຈະຫລຸດໂຄຕາລັດຖະກອນ ຈາກ 3.000 ມາເປັນ 1.500
November 20, 2018 - 4:42 PM
ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ໃນວັນທີ 20 ພະຈິກ 2018, ໂດຍເນັ້ນວ່າ: ລັດຖະບານ ຈະຫລຸດໂຄຕາພະນັກງງານລັດຖະກອນໃໝ່ລົງ ຈາກ 3.000 ໃນປີ 2018 ມາເປັນ 1.500 ສຳລັບປີ 2019.
ເພື່ອເປັນການຫລຸດຜ່ອນພາລະແບກຫາບຂອງງົບປະມານລັດ ແຕ່ຈະເນັ້ນໜັກໃສ່ການຍົກລະດັບຄວາມຮູ້ດ້ານວິຊາການ ແລະ ຫົວຄິດປະດິດສ້າງຂອງພະນັກງານ-ລັດຖະກອນ ເພື່ອສ້າງຂີດຄວາມສາມາດ ໃນການປະຕິບັດໜ້າທີ່ວຽກງານໃຫ້ມີປະສິດທິພາບດີຂຶ້ນກວ່າເກົ່າ, ຫັນພະນັກງານສູນກາງລົງຊ່ວຍທ້ອງຖິ່ນ ຕາມທິດຂອງສູນກາງພັກໄດ້ວາງອອກ.
ໃນຂະນະດຽວກັນ, ກໍໄດ້ຕັດສິນໃຈ ແກ່ຍາວການເພີ່ມດັດສະນີເງິນເດືອນໃຫ້ແກ່ພະນັກງານໄວ້ເສຍກ່ອນ, ໃນເງື່ອນໄຂທີ່ເຮົາມີຄວາມຫຍຸ້ງຍາກທາງດ້ານງົບປະມານປັດຈຸບັນ.
