ໂຄງການປະກວດແຕ້ມຮູບ-ລະບາຍສີດ້ວຍຈິນຕະນາການໃນຫົວຂໍ້ “ ທ່ອງທ່ຽວທຳມະຊາດໃນປະເທດລາວ ຄັ້ງທີ 1 ”
ບໍລິສັດ ດີບີວີ ບົວວັນ ຈຳໜ່າຍເຄື່ອງໃຊ້ຫ້ອງການຕົວແທນໃນລາວ ຮ່ວມກັບ ບໍລິສັດ ດີເອັດເອ ສະຫຍາມວາລາ ຈໍາກັດ (ປະເທດໄທ) ເຈົ້າຂອງຜະລິດຕະພັນ, ໄດ້ຈັດໂຄງການແຕ້ມຮູບ-ລະບາຍສີດ້ວຍຈິນຕະນາການໃນຫົວຂໍ້ “ທ່ອງທ່ຽວທໍາມະຊາດໃນປະເທດລາວ” ຄັ້ງທີ 1 ຂຶ້ນໃນວັນທີ 10-11 ພະຈິກຜ່ານມານີ້, ທີ່ໜອງຄາຍ ປະເທດໄທ, ເພື່ອເປັນການສົ່ງເສີມທັກສະການລະບາຍສີ ແລະ ການທາສີໃຫ້ແກ່ນ້ອງນັກຮຽນ, ທັງ ເປັນການສະໜັບສະໜູນຄວາມຄິດສ້າງສັນ ແລະ ເສີມສ້າງຈິນຕະນາການໃຫ້ແກ່ເຍົາວະຊົນ.
ທ່ານ ນາງ ວິໄລວັນ ສຸກສະຫວັດ ປະທານບໍລິສັດ ດີບີວີ ບົວວັນ ຈະໜ່າຍເຄື່ອງໃຊ້ຫ້ອງການ ໃຫ້ຮູ້ວ່າ: ໂຄງການດັ່ງກ່າວໄດ້ເປີດຮັບສະໝັກແຕ່ວັນທີ 15 ສິງຫາ 2018 ໂດຍໃຫ້ນັກຮຽນ-ເຍົາວະຊົນສົ່ງຮູບເຂົ້າທາງເວັບເພດຂອງບໍລິສັດ (Mas terart Lao) ແລະ ປິດຮັບໃນວັນທີ 31 ຕຸລາ 2018 ໃນໄລຍະດໍາເນີນໂຄງການມີການເຝິກອົບຮົບຢູ່ 3 ແຫ່ງຄື: ນະຄອນປາກເຊ, ມີນັກຮຽນເຂົ້າຮ່ວມ 250 ຄົນ, ວິທະຍາໄລສິລະປະສຶກສາ 150 ຄົນ ແລະ ມສ ວຽງຈັນ ມີຜູ້ເຂົ້າຮ່ວມ 200 ຄົນ ໃນນັ້ນ, ມີນັກຮຽນ ມ ຕົ້ນ-ມ ປາຍ ລວມທັງໝົດ 600 ຄົນ, ໂດຍມີອາຈານມາສອນການແຕ້ມຮູບໃຫ້ພວກເຂົາໂດຍສະເພາະ. ໃນໂຄງການນ້ອງໆຕ້ອງໄດ້ແຕ້ມຮູບຕາມຂອບເຂດທີ່ໂຄງການກໍານົດພາຍຫຼັງສໍາເລັດການເຝິກອົບຮົບແລ້ວ ໃຫ້ ກັບໄປແຕ້ມຢູ່ບ້ານແລ້ວຖ່າຍຮູບສົ່ງມາທາງເວັບເພດ, ຫຼັງຈາກນັ້ນໄດ້ມີການຄັດເລືອກຈາກຄະນະກໍາມະການ ຄື: (ທ່ານ ຄໍາສຸກ ແກ້ວມິ່ງເມືອງ ນັກສິລະປິນແຫ່ງຊາດ, ທ່ານ ບຸນທ່ຽງ ສິລິປະພັນ ທີ່ປຶກສາຂອງສະຖາບັນວິຈິດສິນແຫ່ງຊາດ, ອາຈານ ມິກ ສາຍລົມ ຫົວໜ້າພາກວິຊາຈິດຕະກຳສະຖາບັນວິຈິດສິນແຫ່ງຊາດ). ພາຍຫຼັງມີການຄັດເລືອກຮູບພາບຄົບຕາມເງື່ອນໄຂຂອງໂຄງການກໍານົດໄວ້, ສາມາດຄັດເລືອກໄດ້ 30 ຄົນ ແລະ ໄດ້ເອົາ 30 ຄົນດັ່ງກ່າວມາເຝິກອົບຮົມອີກຄັ້ງກ່ອນຈະເຂົ້າແຂ່ງຂັນລະດັບປະເທດ.
ໃນການແຂ່ງຂັນມີຢູ່ 3 ລະດັບຄື: ລະດັບອາຍຸ 7-11 ປີ ລະດັບອາຍຸ 12-15 ປີ ແລະ ລະດັບອາຍຸ 16-18 ປີ ແລະ ໃນແຕ່ລະດັບໄດ້ຄັດເລືອກເອົາພຽງ 10 ຄົນ ເພື່ອໄປແຂ່ງຂັນຮອບຊີງຊະນະເລີດຢູ່ທີ່ປະເທດໄທ. ຊຶ່ງຜົນການແຂ່ງຂັນຮອບຊີງຊະນະເລີດປາກົດວ່າ: ຜູ້ຊະນະເລີດລະດັບອາຍຸ 7-11 ປີ ໄດ້ແກ່ ທ້າວ ໄຊ ຕະພອນ ອ່ອນມະນີ ມາຈາກໂຮງຮຽນ ມສ ວຽງຈັນ, ລະດັບອາຍຸ 12-15 ປີ ໄດ້ແກ່ ທ້າວ ແອ່ນດີ້ ແກ້ວວົງສາ ມາຈາກໂຮງຮຽນມໍຕົ້ນຫ້ອມສະຫວັນ ແລະ ລະດັບອາຍຸ 16-18 ປີ ໄດ້ແກ່ທ້າວ ໄຊສັກ ສິດວົງສັກ ມາຈາກໂຮງຮຽນ ມສ ວຽງຈັນ, ຜູ້ຊະນະເລີດທັງສາມລະດັບໄດ້ຮັບທຶນການສຶກສາ 1 ລ້ານກີບ ພ້ອມອຸປະກອນການແຕ້ມຮູບມູນຄ່າ 3 ແສນກີບ ແລະ ໄດ້ປີ້ຍົນໄປກັບວຽງຈັນ-ກຸງເທບ 2 ມື້ 1 ຄືນ ພ້ອມຜູ້ປົກຄອງ 1 ຄົນ, ສ່ວນຮອງຊະນະເລີດ ອັນດັບ 1 ໄດ້ຮັບທຶນການສຶກສາ 5 ແສນກີບ ແລະ ອຸປະກອນແຕ້ມຮູບມູນຄ່າ 2 ແສນກີບ ແລະ ຮອງຊະນະເລີດ ອັນດັບທີ 2 ໄດ້ຮັບທຶນການສຶກສາ 3 ແສນກີບ ແລະ ອຸປະກອນແຕ້ມ ຮູບມູນຄ່າ 1 ແສນກີບ ແລະ ລາງວັນຊົມເຊີຍ 21 ລາງວັນເປັນອຸປະກອນແຕ້ມຮູບ.
