ຂໍ່ານັບ ຊົມເຊີຍ ກອງປະຊຸມສະໄໝສາມັນ ເທື່ອທີ 6 ຢ່າງສຸດໃຈ!
ທ່ານຜູ້ອ່ານທີ່ເຄົາລົບ! ແຕ່ວັນທີ 20 ພະຈິກຫາ 21 ທັນວາ 2018. ກອງປະຊຸມສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII ໄດ້ໄຂຂຶ້ນຢ່າງເປັນທາງການ ໃນທ່າມກາງທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນລາວທັງຊາດ ພວມເບີກບານມ່ວນຊື່ນສ້າງຜົນງານຂໍ່ານັບຮັບຕ້ອນວັນຊາດທີ 2 ທັນວາຄົບຮອບ 43 ປີ, ວັນສ້າງຕັ້ງເມືອງວຽງໄຊຄົບຮອບ 50 ປີ ແລະ ວັນບຸນນະມັດສະການພະທາດຫລວງວຽງຈັນມິ່ງຂວັນຊາວລາວ. ເຊິ່ງກອງປະຊຸມເທື່ອນີ້ ແມ່ນມີຄວາມສໍາຄັນຫລາຍ ເພາະຢູ່ໃນພາວະບອບບາງດ້ານເສດຖະກິດມະຫາພາກ ແລະ ຈະມີການພິຈາລະນາຫລາຍບັນຫາສໍາຄັນຂອງຊາດ.
ໃນໂອກາດດັ່ງກ່າວ, ເຊື່ອໝັ້ນວ່າບັນດາທ່ານຜູ້ແທນປະຊາຊົນ ຫລື ສະມາຊິກສະພາແຫ່ງຊາດ (ສສຊ) ຈະນໍາເອົາຂໍ້ມູນ ຫລື ຂໍ້ຄິດເຫັນຕ່າງໆຂອງຊາດ, ຂອງທ້ອງຖິ່ນ ທີ່ສ່ອງແສງເຖິງຄວາມມຸ່ງມາດປາຖະໜາອັນແຮງກ້າຂອງປະຊາຊົນບັນດາເຜົ່າ ແລະ ຊັ້ນຄົນຕ່າງໆມາຍັງກອງປະຊຸມ, ໂດຍສະເພາະບັນຫາປາກທ້ອງ, ຄວາມບໍ່ໂປ່ງໃສ, ອາຍາສິດ, ການສໍ້ລາດບັງຫລວງ, ການຟອກເງິນ, ບັນຫາຖ່ວງດຶງການພັດທະນາ, ການລັກໂລບສໍ້ໂກງ…ໃນຂະນະດຽວກັນ ກໍເບິ່ງຕື່ມການແກ້ໄຂບັນຫາການບໍລິຫານຂອງຄະນະລັດຖະບານ, ອໍານາດການປົກຄອງທ້ອງຖິ່ນ ໂດຍສະເພາະບັນຫາເສດຖະກິດຂອງປະເທດເຮົາ ທີ່ຍັງຂາດດຸນງົບປະມານ ເຮັດໃຫ້ມີຄວາມກົດດັນຕໍ່ສະພາບຄ່ອງ ແລະ ມີຄວາມສ່ຽງໃນການຄຸ້ມຄອງເສດຖະກິດມະຫາພາກ, ການເກັບລາຍຮັບງົບປະມານທີ່ບໍ່ພຽງພໍກັບລາຍຈ່າຍທີ່ຈໍາເປັນ ເຮັດໃຫ້ການແກ້ໄຂໜີ້ສາທາລະນະມີຄວາມຊັກຊ້າ, ລາຍຈ່າຍເພື່ອຊໍາລະໜີ້ສິນຕ່າງປະເທດມີທ່າອ່ຽງເພີ່ມ, ການລະດົມທຶນອັດສີດເມັດເງິນໃໝ່ເຂົ້າສູ່ລະບົບເສດຖະກິດບໍ່ໄດ້ຕາມແຜນ ເປັນຕົ້ນການລະດົມທຶນເຂົ້າໃນບັນດາໂຄງການທີ່ມີປະສິດທິຜົນສູງທາງດ້ານເສດຖະກິດ ແລະ ສາມາດເກັບກູ້ທຶນຄືນໄດ້ໄວ, ການເຂົ້າເຖິງແຫລ່ງທຶນຂອງພາກທຸລະກິດ, ໂດຍສະເພາະທຸລະກິດຂະໜາດນ້ອຍ ແລະ ກາງ (SMEs) ຍັງຫຍຸ້ງຍາກ, ໃນນັ້ນ ວິສາຫະກິດທີ່ເຂົ້າເຖິງແຫລ່ງທຶນໄດ້ກໍມີອັດຕາດອກເບ້ຍສູງ, ການບໍລິຫານລັດ ເຖິງຈະມີຄວາມພະຍາຍາມປັບປຸງແຕ່ກໍຍັງຄືບໜ້າຊ້າ, ການຊໍາລະອາກອນ, ການສ້າງຕັ້ງທຸລະກິດ, ຂັ້ນຕອນການນໍາເຂົ້າ-ສົ່ງອອກ, ການເຂົ້າເຖິງສິນເຊື່ອ ແລະ ການຈັດຕັ້ງປະຕິບັດສັນຍາຍັງເຮັດໄດ້ຊ້າ, ສໍາລັບພາກທຸລະກິດ ກໍປັບຕົວບໍ່ທັນກັບສະພາບການໃໝ່ ແລະ ໜີ້ສິນກໍບໍ່ທັນຊໍາລະໄດ້ຕາມຄວາມຕ້ອງການ, ການດໍາເນີນທຸລະກິດ ກໍຍັງຢູ່ໃນໄລຍະຝືດເຄືອງ.
ຂໍໃຫ້ບັນດາ ສສຊ ເກັບກ່ຽວຄືນຜົນຂອງການຈັດຕັ້ງປະຕິບັດ 8 ມາດຕະການ ຫລື ຄໍາສັ່ງເລກທີ 12/ນຍ ເພື່ອກະຕຸ້ນເສດຖະກິດ, ເຊິ່ງມາຮອດປັດຈຸບັນ ບັນຫາສະກັດກັ້ນໄພເງິນເຟີ້ດ້ວຍການຄຸ້ມຄອງອັດຕາແລກປ່ຽນ, ຄຸ້ມຄອງລາຄາສິນຄ້າທຸກປະເພດໃຫ້ຢູ່ໃນລະດັບສົມເຫດສົມຜົນ ແລະ ຄຸ້ມຄອງປະລິມານເງິນ M2 ໄດ້ຊໍ່າໃດ? ການຊຸກຍູ້ການປະຕິບັດລະບອບລະບຽບການສ້າງສະພາບແວດລ້ອມອໍານວຍຄວາມສະດວກໃນການດໍາເນີນທຸລະກິດ, ການແກ້ໄຂໜີ້ພາຍໃນ-ຕ່າງປະເທດ, ມາດຕະການ, ນະໂຍບາຍຊ່ວຍພາກເອກະຊົນໃຫ້ເຂົ້າເຖິງແຫລ່ງທຶນ, ການຜະລິດສິນຄ້າ, ມາດຕະການເກັບລາຍຮັບ, ຄຸ້ມຄອງລາຍຈ່າຍ, ການນໍາເອົາລະບົບທັນສະ
ໄໝເຂົ້າໃນຂະແໜງເກັບລາຍຮັບ, ການສົ່ງເສີມການຜະລິດສິນຄ້າ. ໃນນັ້ນສົ່ງເສີມ SMEs, ປັບປຸງໂຄງສ້າງການລົງທຶນ, ການປັບປຸງບັນດາລັດວິສາຫະກິດ, ການຫັນປ່ຽນການຄຸ້ມຄອງທີ່ດິນ, ການເກັບລາຍຮັບຈາກທີ່ດິນ ແລະ ປັບປຸງຄືນການຫັນຊັບສິນເປັນທຶນ, ປັບປຸງແກ້ໄຂໃຫ້ເດັດຂາດ ໂດຍສະເພາະຂະແໜງການທີ່ມີລາຍຮັບ, ກວດຄືນບັນດາໂຄງການຕ່າງໆທີ່ມີມູນຄ່າສູງເກີນຄວາມຈິງ, ກວດຄືນບັນດາໂຄງການນອກແຜນ ແລະ ບັນຫາຕ່າງໆ, ເຊິ່ງໃນລະຫວ່າງ 7-8 ເດືອນ ຫລື ໃນ 1 ປີ ຜ່ານມາ ມີອັນໃດເຮັດໄດ້ ແລະ ໂຕໃດເຮັດບໍ່ໄດ້ຍ້ອນຫຍັງ? ຢາກໃຫ້ເວົ້າແຈ້ງ ແລະ ເປີດເຜີຍ ເພື່ອໃຫ້ສູນກາງພັກ, ລັດຖະບານ ແລະ ປະຊາຊົນ ຮັບຮູ້ຢ່າງເປັນທາງການ.
ເຖິງຢ່າງໃດກໍຕາມ, ປະຊາຊົນທຸກຊັ້ນຄົນ ລ້ວນແຕ່ມີຄວາມອົບອຸ່ນ ແລະ ມີຄວາມຫວັງຕໍ່ ສສຊ ທີ່ມີຕົວແທນຂອງຕົນໄປນັ່ງຢູ່ສະພາແຫ່ງຊາດ ເພື່ອນຳສະເໜີ, ພິຈາລະນາ, ປົກປ້ອງຜົນປະໂຫຍດອັນຊອບທໍາຂອງຊາດ ແລະ ຂອງປະຊາຊົນ, ໂດຍສະເພາະຄວນວິເຄາະ, ວິໃຈ, ກັ່ນກອງທຸກບັນຫາກ່ອນຈະພິຈາລະນາຮັບຮອງ. ໃນນີ້ແມ່ນແຜນໃຫຍ່ໆ ລວມທັງກົດໝາຍ, ພ້ອມນີ້ ລັດຖະບານຍັງຈະຊີ້ແຈງຫລາຍບັນຫາທີ່ສັງຄົມສົ່ງຜ່ານສະພາ ຫລື ສສຊ ຫລື ສົ່ງຕົງມາຫາພາກສ່ວນກ່ຽວຂ້ອງ, ການຊີ້ແຈງກ່ຽວກັບສະພາບການກໍ່ສ້າງ ແລະ ສ້ອມແປງຖະໜົນຫົນທາງ (ຜ່ານມາການກໍ່ສ້າງມີຫລາຍໂຄງການຄຸນນະພາບຕໍ່າ, ມູນຄ່າກໍ່ສ້າງສູງ, ແກ່ຍາວເວລາກໍ່ສ້າງ, ພ້ອມນີ້ຍັງຊີ້ແຈງກ່ຽວກັບຄຸນນະພາບຂອງການບໍລິການ, ການປິ່ນປົວຢູ່ໃນໂຮງໝໍ, ສຸກສາລາ, ການຊີ້ແຈງຂອງອົງການໄອຍະການສູງສຸດກ່ຽວກັບການຈັດຕັ້ງປະຕິບັດພາລະບົດບາດໃນການຕິດຕາມກວດກາການລະເມີດສັນຍາກູ້ຢືມທີ່ມີຫລັກຊັບຄໍ້າປະກັນແຕ່ມາດໍາເນີນຄະດີອາຍາໃນຂໍ້ຫາສໍ້ໂກງຊັບຂອງພົນລະເມືອງ, ຜົນການກວດສອບ ແລະ ພິເສດໃນກອງປະຊຸມເທື່ອນີ້, ຍັງຈະພິຈາລະນາ, ຮັບຮອງເອົາການແຕ່ງຕັ້ງຜູ້ວ່າການທະນາຄານແຫ່ງ ສປປ ລາວ ແລະ ບັນຫາສໍາຄັນຂອງຊາດຈໍານວນໜຶ່ງ.
ໃນກອງປະຊຸມສາມັນເທື່ອນີ້, ກໍຄືຄັ້ງຜ່ານມາ ຄະນະເລຂາສະພາແຫ່ງຊາດໄດ້ຈັດຕັ້ງໜ່ວຍຮັບຜິດຊອບສາຍດ່ວນ ເພື່ອຮັບເອົາຄໍາຄິດຄໍາເຫັນ, ຄໍາສະເໜີ ແລະ ຄໍາຕໍາໜິຕິຊົມບັນຫາຕ່າງໆໂດຍກົງ ທີ່ມີລັກສະນະສ້າງສັນຈາກທົ່ວສັງຄົມມາຍັງກອງປະຊຸມໄດ້ໂດຍບໍ່ເສຍຄ່າ ໂທລະ
ສັບໝາຍເລກ 156; ໂທລະສານໝາຍເລກ 021 413528; ຈົດໝາຍທາງໄປສະນີ ຕູ້ ປນ 662 ແລະ ອີເມວ: na_session@na.gov.la; ຫາກດີແທ້ ຄະນະເລຂາສະພາແຫ່ງຊາດ ອາດຈະສ້າງຕູ້ສະເພາະຂຶ້ນຢູ່ໃນຂ້າງຮົ້ວດ້ານນອກ ຫຼື ເຂດຊຸມຊົນໃນທົ່ວປະເທດ ເພື່ອໃຫ້ພະນັກງານ, ທະຫານ, ຕໍາຫຼວດ ແລະ ປະຊາຊົນຊັ້ນຄົນຕ່າງໆສົ່ງຄວາມຄິດເຫັນໂດຍກົງມາຍັງສະພາ ເຊິ່ງເປັນຊ່ອງທາງໜຶ່ງທີ່ອາດເຫັນແນວຄວາມຄິດຂອງສັງຄົມຕໍ່ການບໍລິຫານປະເທດຂອງລັດຖະບານພວກເຮົາ; ດັ່ງນັ້ນ ຈຶ່ງຂໍຮຽກຮ້ອງໃຫ້ປະຊາຊົນ ຈົ່ງພ້ອມກັນອ່ວາຍໜ້າ ຕິດຕາມການປະຕິບັດໜ້າທີ່ຂອງ ສສຊ ແລະ ການຕອບໂຈດຂອງຝ່າຍບໍລິຫານ ແລະ ຈົ່ງພ້ອມກັນ ປະຕິບັດຄໍາວ່າ: “ພັກນໍາພາ, ລັດຄຸ້ມຄອງ, ປະຊາຊົນເປັນເຈົ້າ”.
# ຂຽນໂດຍ: ຣັດສະໝີ ດວງສັດຈະ
