ຫົວຫນ້າຄະນະອານຸກຳມະການເນື້ອໃນ ແລະ ຂະບວນການລົງກວດກາຄວາມຄືບໜ້າການຝຶກຊ້ອມກຽມຮັບໃຊ້ສະຫລອງວັນສ້າງຕັ້ງເມືອງວຽງໄຊຄົບຮອບ 50 ປີ
ໃນວັນທີ 15 ພະຈິກຜ່ານມານີ້, ທ່ານ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ທັງເປັນຫົວໜ້າອານຸກຳມະການເນື້ອໃນ ແລະ ຂະບວນການລະດັບຊາດໄດ້ລົງຕິດຕາມຊຸກຍູ້ຄວາມຄືບໜ້າການຝຶກຊ້ອມຟ້ອນຂອງນັກຮຽນ 600 ນ້ອງ ເພື່ອກະກຽມສະແດງຮັບໃຊ້ການສະເຫລີມສະຫລອງວັນສ້າງຕັ້ງເມືອງວຽງໄຊ-ຖານທີ່ໝັ້ນຂອງການປະຕິວັດລາວຄົບຮອບ 50 ປີ ທີ່ຈະໄດ້ຈັດຂຶ້ນໃນທ້າຍເດືອນພະຈິກນີ້.
ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທັງເປັນຄະນະຮັບຜິດຊອບງານສະແດງລະດັບຊາດ ໄດ້ລາຍງານວ່າ: ບົດຟ້ອນສະດຸດີທີ່ນຳມາຝຶກແອບໃສ່ຊື່ວ່າ: “ສັນລະເສີນເມືອງວຽງໄຊວິລະຊົນ” ປະກອບມີ 3 ພາກຄື: ພາກທີ່ໜື່ງມີເນື້ອໃນພັນລະນາເຖິງຄວາມອຸດົມສົມບູນ, ຄວາມສວຍສົດງົດງາມ, ວິຖີຊີວິດ, ຄວາມຮົ່ມເຢັນຂອງເມືອງວຽງໄຊ, ພາກທີສອງມີເນື້ອໃນເວົ້າເຖິງເມືອງວຽງໄຊ ເປັນຖານທີ່ໝັ້ນຂອງການປະຕິວັດລາວ, ໂດຍໄດ້ຮວບຮວມເອົານໍ້າໃຈຮັກຊາດຂອງນັກປະຕິວັດຢູ່ໃນທົ່ວປະ ເທດ ມາລວມກັນຢູ່ທົ່ງນາໄກ່, ເຕົ້າໂຮມຄວາມສາມັກຄີປອງດອງເປັນອັນດຽວກັນພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ພາກທີສາມມີເນື້ອໃນເວົ້າເຖິງໄລຍະສ້າງສາພັດທະນາເມືອງວຽງໄຊ ໃຕ້ຮົ່ມຄັນທຸງຂອງພັກ.
ການຝຶກຊ້ອມດັ່ງກ່າວ, ໄດ້ເລີ່ມແຕ່ຕົ້ນເດືອນຕຸລາຜ່ານມາ, ປັດຈຸບັນມີຄວາມຄືບໜ້າແລ້ວ 80%. ໂອກາດນີ້, ບໍລິສັດ ຈະເລີນເຊກອງ ພະລັງງານ ຈໍາກັດ ໄດ້ນຳເອົາເງິນຈຳນວນ 500 ລ້ານກີບມອບໃຫ້ກອງເລຂາຄະນະກະກຽມຈັດງານສະເຫລີມສະຫລອງວັນສ້າງຕັ້ງເມືອງວຽງໄຊຄົບຮອບ 50 ປີ ເພື່ອໝູນໃຊ້ເຂົ້າໃນການເຄື່ອນໄຫວວຽກງານໃຫ້ມີຜົນສຳເລັດ.
