ເຜີຍແຜ່ການເຄື່ອນຍ້າຍຖິ່ນຖານ ແລະ ການຮ່ວມມືລະຫວ່າງ ສປປ ລາວ ກັບອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ
ວັນທີ 15 ພະຈິກນີ້, ກະຊວງການຕ່າງປະເທດຮ່ວມກັບອົງການຈັດຕັ້ງສາ ກົນ ເພື່ອການເຄື່ອນຍ້າຍຖິ່ນຖານ (IOM) ໄດ້ຈັດສຳມະນາລະດັບຊາດກ່ຽວກັບການເຄື່ອນຍ້າຍຖິ່ນຖານ ແລະ ການຮ່ວມມືລະຫວ່າງ ສປປ ລາວ ແລະ ອົງການ IOM ໂດຍມີທ່ານນາງ ຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ, ທ່ານນາງ ລໍຣາ ທອມຊັນ ຮອງຜູ້ອຳນວຍການໃຫຍ່ອົງການ IOM ແລະ ທ່ານນາງ ຄາຣິນາ ອິມໂມເນັນ ຜູ້ປະສານງານຫ້ອງການ ສປຊ ຜູ້ຕາງໜ້າອົງການ ສປຊ ເພື່ອການພັດທະນາປະຈຳລາວ.
ສຳມະນາດັ່ງກ່າວຈັດຂຶ້ນເປັນຄັ້ງທໍາອິດລະຫວ່າງລາວ ແລະ ອົງການ IOM, ພາຍຫລັງລາວໄດ້ເຂົ້າເປັນສະມາຊິກຂອງອົງການ IOM ຢ່າງເປັນທາງການໃນທ້າຍເດືອນມິຖຸນາທີ່ຜ່ານມາ, ທັງນີ້ແນໃສຍົກລະດັບຄວາມຮັບຮູ້ ເຂົ້າໃຈໃຫ້ຜູ້ເຂົ້າຮ່ວມໃນວຽກງານການເຄື່ອນຍ້າຍຖິ່ນຖານ, ໂດຍຜ່ານບົດນຳສະເໜີທີ່ສຳຄັນຕ່າງໆ. ພ້ອມນັ້ນຍັງໄດ້ປຶກສາຫາລືກ່ຽວກັບສາຍພົວພັນຕ່າງໆຂອງການເຄື່ອນຍ້າຍຖິ່ນຖານຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ 8 ຂອງ ສປປ ລາວ ແລະ ວາລະ 2030 ເພື່ອການພັດທະນາແບບຍືນຍົງ ແລະ ເປົ້າໝາຍການພັດທະນາແບບຍືນຍົງ (ປພຍ) ຂອງອົງ ການ ສປຊ ແລະ ໄດ້ນຳສະເໜີຫຍໍ້ກ່ຽວກັບຮ່າງຖະແຫລງການສາກົນວ່າດ້ວຍການເຄື່ອນຍ້າຍຖິ່ນຖານທີ່ປອດໄພ, ເປັນລະບຽບ ແລະ ປົກກະຕິ.
ກອງປະຊຸມດັ່ງກ່າວ, ຍັງໄດ້ປຶກສາຫາລືກ່ຽວກັບທິດທາງແຜນການໃນການເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ ສປປ ລາວ ແລະ ອົງການ IOM ໃນຕໍ່ໜ້າ.
ການສຳມະນາຄັ້ງນີ້, ເປັນບາດກ້າວສຳຄັນສຳລັບການຮ່ວມມືໃນຕໍ່ໜ້າ ລະຫວ່າງ ສປປ ລາວ, ອົງການ IOM ປະຈໍາ ສປປ ລາວ ແລະ ຄູ່ຮ່ວມພັດທະນາ ເພື່ອສືບຕໍ່ເສີມຂະຫຍາຍການຮ່ວມມື ແລະ ສະໜັບສະໜູນ ລັດຖະບານ ສປປ ລາວ ໃນດ້ານຕ່າງໆເປັນຕົ້ນແມ່ນການສ້າງຂີດຄວາມສາມາດໃຫ້ແກ່ພະນັກງານລັດ ແລະ ເຈົ້າໜ້າທີ່ກ່ຽວຂ້ອງ, ການຊ່ວຍເຫລືອຜູ້ເຄາະຮ້າຍຈາກການຄ້າມະນຸດ ແລະ ການເຄື່ອນຍ້າຍຖິ່ນຖານລະຫວ່າງປະເທດ, ການຄຸ້ມຄອງການເຂົ້າ-ອອກເມືອງ ແລະ ຊາຍແດນ, ການປິ່ນປົວສຸຂະພາບໃຫ້ແຮງງານເຄື່ອນຍ້າຍ, ການຕອບໂຕ້ ແລະ ການຊ່ວຍເຫລືອໃນພາວະໄພພິບັດ.
