ຜູ້ອົບພະຍົບຊາວໂຣຮິງຢາບໍ່ຂ້າມຊາຍແດນ ຈາກບັງກະລາເທດກັບມຽນມາ
ເຈົ້າໜ້າທີ່ບັງກະລາເທດເປີດເຜີຍໃນວັນທີ 15 ພະຈິກວ່າ: ບໍ່ມີຜູ້ອົບພະຍົບຊາວໂຣຮິງຢາພຽງຄົນດຽວ ທີ່ເດີນທາງຈາກຄ້າຍຜູ້ອົບພະຍົບໃນບັງກະລາເທດຂ້າມຊາຍແດນກັບໄປມຽນມາຕາມຂໍ້ຕົກລົງສົ່ງຕົວກັບລະຫວ່າງ ບັງກະລາເທດ ແລະ ມຽນມາ.
ເຈົ້າໜ້າທີ່ບັງກະລາເທດລໍຖ້າເປັນເວລາຫລາຍຊົ່ວໂມງ ຢູ່ບໍລິເວນຊາຍແດນ ເຊິ່ງເປັນຈຸດສົ່ງຊາວໂຣຮິງຢາກັບມຽນມາ. ເຖິງຢ່າງໃດກໍຕາມ, ບໍ່ມີຊາວໂຣຮິງຢາພຽງຄົນດຽວຈາກຈຳນວນປະມານ 720.000 ຄົນ ທີ່ຫລົບໜີການກວາດລ້າງດ້ວຍຄວາມຮຸນແຮງຂອງກອງທັບມຽນມາຂ້າມຊາຍແດນໄປບັງກະລາເທດ ນັບແຕ່ເດືອນສິງຫາປີຜ່ານມາ. ຂະນະດຽວກັນ ມີຊາວໂຣຮິງຢາຫລາຍຮ້ອຍຄົນຊຸມນຸມກັນ ແລະ ຮ້ອງວ່າ: ພວກເຂົາບໍ່ກັບໄປ. ເຈົ້າໜ້າທີ່ບັງກະລາເທດທີ່ເບິ່ງແຍງຜູ້ອົບພະຍົບກ່າວວ່າ: ບໍ່ມີຊາວໂຣຮິງຢາສະໝັກໃຈເດີນທາງກັບມຽນມາ ແລະ ປັດຈຸບັນ ທ່ານກຳລັງລໍຖ້າຄຳສັ່ງຈາກກະຊວງຕ່າງປະເທດວ່າຈະດຳເນີນການແນວໃດຕໍ່ໄປ. ສະຫະປະຊາຊາດເຕືອນວ່າ: ຊາວມຸດສະລິມໂຣຮິງຢາອາດຈະຖືກກວາດລ້າງອີກຄັ້ງ ຖ້າເດີນທາງກັບມຽນມາ ແລະ ບໍ່ເຫັນພ້ອມກັບແຜນການສົ່ງກັບ. ກຸ່ມຜູ້ນຳຂອງໂຣຮິງຢາກ່າວວ່າ: ຊາວໂຣຮິງຢາທີ່ຢູ່ໃນລາຍຊື່ 2.260 ຄົນ ທີ່ຈະຕ້ອງເດີນທາງກັບມຽນມາ ໄດ້ລີ້ຊ້ອນໄປໝົດແລ້ວ, ບັງກະລາເທດຄາດໝາຍວ່າຈະມີຜູ້ສະໝັກໃຈ 150 ຄົນ ເດີນທາງກັບໃນວັນທີ 15 ພະຈິກ ໂດຍໄດ້ກຽມລົດເມໄວ້ 5 ຄັນ ເພື່ອພາຜູ້ອົບພະຍົບໄປບໍລິເວນຊາຍແດນ, ແຕ່ບໍ່ມີໃຜເດີນທາງກັບພຽງຄົນດຽວ.
