ຫລາຍປະເທດອອກກົດໝາຍໃຊ້ກັນຊາ ເພື່ອຜົນປະໂຫຍດທາງການແພດ
ຫລາຍປະເທດຕື່ນຕົວອອກກົດໝາຍໃຊ້ “ກັນຊາເພື່ອການແພດ” ປ່ຽນຢາເສບຕິດໃຫ້ເປັນຢາປິ່ນປົວພະຍາດຮ້າຍ.
ຫລາຍປະເທດໃນໂລກເລີ່ມຫັນມາໃຫ້ຄວາມສຳຄັນຕໍ່ການໃຊ້ປະໂຫຍດຈາກ “ກັນຊາ” ພືດຊະນິດໜຶ່ງທີ່ເຄີຍຖືກພິຈາລະນາໃຫ້ຈັດຢູ່ໃນໝວດໝູ່ຢາເສບຕິດໃຫ້ໂທດເພີ່ມຂຶ້ນ, ປັດຈຸບັນມີຢ່າງໜ້ອຍ 33 ປະເທດທີ່ອະນຸຍາດໃຫ້ມີການໃຊ້ປະໂຫຍດຈາກກັນຊາໃນດ້ານການແພດ ໂດຍຈະມີລາຍລະອຽດແຕກຕ່າງກັນຕາມແຕ່ລະປະເທດ.
ບາງປະເທດຈະອະນຸຍາດໃຫ້ໃຊ້ກັນຊາໃນທາງການແພດເມື່ອໄດ້ຮັບຄວາມຍິນຍອມຈາກລັດ, ມີໃບຮັບຮອງແພດ ຫລື ໃບສັ່ງຢາທີ່ຖືກຕ້ອງຕາມກົດໝາຍເທົ່ານັ້ນເຊັ່ນ: ແຟງລັງ, ເຢຍລະມັນ, ສະຫະຣາຊະນາອາຈັກ. ບາງປະເທດຈະຕ້ອງຊື້ກັນຊາຈາກຮ້ານຂາຍຢາຂອງລັດເຊັ່ນ: ຈາໄມກາ, ສີລັງກາ ຫລື ໃນບາງປະເທດຈະອະນຸຍາດໃຫ້ໃຊ້ປິ່ນປົວອາການເຈັບເປັນໃນບາງພະຍາດເທົ່ານັ້ນເຊັ່ນ: ໄຊປຣັດ ທີ່ອະນຸຍາດໃຫ້ໃຊ້ກັນຊາປິ່ນປົວສະເພາະຄົນເປັນພະຍາດມະເຮັງ ເປັນຕົ້ນ.
ຂະນະທີ່ມີການໃຊ້ກັນຊາເພື່ອປິ່ນປົວພະຍາດຢ່າງໜ້ອຍໃນ 33 ລັດທົ່ວປະເທດ ລວມທັງດິນແດນທີ່ຢູ່ພາຍໃຕ້ການປົກຄອງຂອງອາເມລິກາ ໂດຍມີພຽງ 10 ລັດເທົ່ານັ້ນທີ່ອະນຸຍາດໃຫ້ມີການໃຊ້ກັນຊາເພື່ອສັນທະນາການໄດ້. ແຕ່ຢ່າງໃດກໍຕາມ, ກັນຊາຍັງຖືວ່າເປັນສິ່ງຜິດກົດໝາຍພາຍໃຕ້ກົດໝາຍຂອງອາເມລິກາ ໂດຍຈະຕ້ອງຈຳກັດປະລິມານການຊື້ຂາຍ ແລະ ອາຍຸຂັ້ນຕໍ່າຂອງຜູ້ຊື້ ເພື່ອບໍ່ໃຫ້ການຈຳໜ່າຍກັນຊາເສລີຫລາຍເກີນໄປ.
ໂດຍມີພຽງບໍ່ເທົ່າໃດປະເທດທີ່ລັດຖະບານອະນຸຍາດໃຫ້ບໍລິໂພກກັນຊາເພື່ອສັນທະນາການໄດ້ ເຊິ່ງໃນແຕ່ລະປະເທດຈະມີລາຍລະອຽດແຕກຕ່າງກັນ, ບາງປະເທດການຄອບຄອງ ແລະ ບໍລິໂພກກັນຊາຖືເປັນສິ່ງຖືກກົດໝາຍ ແຕ່ຫ້າມກະທຳການຈັດຈຳໜ່າຍເຊັ່ນ: ຈໍເຈຍ ແລະ ອາຟຣິກາໃຕ້ ຫລື ບາງປະເທດຄືແອັສປາຍກໍມີຂໍ້ຫ້າມບໍລິໂພກກັນຊາໃນພື້ນທີ່ສາທາລະນະ, ບາງປະເທດຕ້ອງຊື້ຈາກຕົວແທນຈຳໜ່າຍຂອງລັດເທົ່ານັ້ນ ແລະ ບໍ່ຈຳໜ່າຍໃຫ້ນັກທ່ອງທ່ຽວຕ່າງປະເທດເຊັ່ນ: ອຸຣຸກວາຍ.
ປັດຈຸບັນມີພຽງ 2 ປະເທດໃນໂລກເທົ່ານັ້ນ ຄືອຸຣຸກວາຍ ແລະ ການາດາ ທີ່ລັດຖະບານອະນຸຍາດໃຫ້ມີການບໍລິໂພກກັນຊາໄດ້ຢ່າງເສລີ ທັງໃນທາງການແພດ ແລະ ສັນທະນາການ, ອະນຸຍາດໃຫ້ມີການຈຳໜ່າຍ, ຄອບຄອງ, ເຄື່ອນຍ້າຍ ແລະ ເກັບກ່ຽວກັນຊາ ໄດ້ຢ່າງຖືກຕ້ອງຕາມກົດໝາຍຢ່າງເຕັມຮູບແບບທົ່ວປະເທດ ໂດຍແມັກຊິກກຽມເລັ່ງເປັນປະເທດທີ 3 ທີ່ຈະຊຸກຍູ້ການປະກາດໃຊ້ກົດໝາຍນີ້.
