ຜູ້ນຳ ສປປ ເກົາຫລີ ຊົມການທົດລອງ ອາວຸດທາງຍຸດທະວິທີທີ່ພັດທະນາໃໝ່
ສຳນັກຂ່າວກາງເກົາຫລີ ຫລື KCNA ຂອງທາງການ ສປປ ເກົາຫລີ ລາຍງານໃນວັນທີ 17 ພະຈິກວ່າ: ທ່ານ ກິມ ຈ໋ອງອຸນ ຜູ້ນຳສູງສຸດຂອງ ສປປ ເກົາຫລີ ເດີນທາງມາຊົມການທົດລອງອາວຸດທາງຍຸດທະວິທີທີ່ທັນສະໄໝທີ່ ສປປ ເກົາຫລີ ພັດທະນາຂຶ້ນມາໃໝ່.
KCNA ລາຍງານໃນວັນທີ 17 ພະຈິກວ່າ: ທ່ານ ກິມ ຈ໋ອງອຸນ ເດີນທາງມາກວດສອບການທົດລອງອາວຸດທາງຍຸດທະວິທີທີ່ທັນສະໄໝ ເຊິ່ງມີການພັດທະນາຂຶ້ນໃໝ່ຫລ້າສຸດທີ່ສະຖາບັນວິທະຍາການປ້ອງກັນປະເທດແຫ່ງຊາດ. KCNA ລາຍງານວ່າ: ການທົດລອງປະສົບຜົນສຳເລັດຢ່າງຈົບງາມ, ແຕ່ບໍ່ໄດ້ລະບຸວ່າ: ອາວຸດທີ່ວ່ານີ້ຄືຫຍັງ. ການທີ່ KCNA ໃຊ້ຄຳວ່າ: “ຍຸດທະວິທີ” ສະແດງໃຫ້ເຫັນວ່າ: ບໍ່ມີຈະຫລວດໄລຍະໄກ ຫລື ອຸປະກອນດ້ານນິວເຄຼຍເຂົ້າມາກ່ຽວຂ້ອງກັບການທົດລອງນີ້. ຂະນະດຽວກັນ, ສ.ເກົາຫລີ ຍັງບໍ່ໄດ້ລາຍງານວ່າ: ກວດພົບການທົດລອງທີ່ກ່ຽວກັບຈະຫລວດໄລຍະໄກ ຫລື ອາວຸດນິວເຄຼຍແຕ່ຢ່າງໃດ. KCNA ລາຍງານອີກວ່າ: ທ່ານ ກິມ ຈ໋ອງອຸນ ສະແດງຄວາມເພິ່ງພໍໃຈ ແລະ ລະບຸວ່າ: ການທົດລອງຄັ້ງນີ້ຖືເປັນຈຸດປ່ຽນແປງຂອງການເສີມສ້າງແສນຍານຸພາບຂອງກອງທັບ ສປປ ເກົາຫລີ.
