ແຂວງຢູນນານ ແນະນຳສິນຄ້າອາຫານສີຂຽວ ແລະ ຮ່ວມວາງສະແດງສິນຄ້າໃນບຸນນະມັດສະການພະທາດຫລວງວຽງຈັນ

ໃນວັນທີ 15 ພະຈິກນີ້, ພະແນກການຄ້າແຂວງຢູນນານ ຮ່ວມກັບຫ້ອງການຜູ້ຕາງໜ້າວິສາຫະກິດແຂວງຢູນນານປະຈໍາລາວ ໄດ້ຈັດກອງປະຊຸມແນະນໍາສິນຄ້າອາຫານສີຂຽວຂອງແຂວງຢູນນານ ແລະ ເຂົ້າຮ່ວມວາງສະແດງສິນຄ້າ ໃນບຸນນະມັດສະການພະທາດຫຼວງວຽງຈັນ ປະຈໍາປີ 2018, ທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ໂຈ ເສຍເຫວີນ ຮອງຫົວໜ້າພະແນກການຄ້າ ແຂວງຢູນນານປະຈໍາລາວ, ມີຮອງຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ, ຮອງຫົວໜ້າພະແນກພົວພັນຕ່າງປະເທດນະຄອນຫຼວງວຽງຈັນ, ເລຂາທິການສະພາອຸດສາຫະກຳການຄ້າລາວ, ຫົວຫນ້າພະແນກພັດທະນາສິນຄ້າ, ກົມສົ່ງເສີມການຄ້າກະຊວງອຸດສາຫະກຳການຄ້າລາວ ແລະ ບັນດານັກທຸລະກິດຈີນ ແລະ ລາວ, ພ້ອມສື່ມວນຊົນລາວ-ຈີນ ເຂົ້າຮ່ວມ.
ເພື່ອນໍາສະເໜີຜະລິດຕະພັນອາຫານອິນຊີ, ແຫຼ່ງພະລັງງານສີຂຽວເພື່ອສຸຂະພາບທີ່ດີໃນການດໍາລົງຊີວິດ ແລະ ແນະນໍາ 8 ຂະແໜງການຜະລິດຂະໜາດໃຫຍ່ຂອງແຂວງຢູນນານ, ພ້ອມທັງຍົກສູງການສົ່ງເຂົ້າ-ອອກສິນຄ້າຜະລິດຕະພັນຂອງສອງປະເທດລາວ- ຈີນ ໃຫ້ມີຄວາມສະດວກສະບາຍຂຶ້ນ.

ທ່ານ ໂຈ ເສຍຫວິນ ໄດ້ກ່າວວ່າ: ແຂວງຢູນນານ ເປັນແຂວງທີ່ມີຊາຍແດນຕິດຈອດ ແລະ ເປັນປະຕູສູ່ບັນດາປະເທດໃນອາຊີຕາເວັນອອກສຽງໃຕ້ ແລະ ໄດ້ຮ່ວມມືທາງດ້ານການຄ້າກັບລາວ ມາໂດຍຕະຫຼອດ. ໂດຍອີງຕາມຕົວເລກການຄ້າຂອງຝ່າຍຈີນໃນປີ 2017 ທີ່ຜ່ານມາ, ມູນຄ່າ ການຄ້າລະຫວ່າງລາວ ແລະ ຢູນນານບັນລຸ 1,01 ຕື້ໂດລາສະຫະລັດ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 15,9% ໃນນັ້ນ, ການສົ່ງອອກກວມ 240 ລ້ານໂດລາສະຫະລັດ, ທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 15,8%, ການນໍາເຂົ້າ 770 ລ້ານໂດລາສະຫະລັດ, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 15,9%. ສະເພາະສາມໄຕມາດຂອງປີ 2018 ຕົວເລກມູນຄ່າການຄ້າລະຫວ່າງລາວ ແລະ ຢູນນານ ບັນລຸໄດ້ 690 ລ້ານໂດລາສະຫະລັດ, ຫຼຸດລົງ 0,4% ໃນນັ້ນ, ການສົ່ງອອກມີມູນຄ່າ 180 ລ້ານໂດລາສະຫະລັດ, ເພີ່ມຂຶ້ນ 5,3%, ການນໍາເຂົ້າ ມີມູນຄ່າ 520 ລ້ານໂດລາສະຫະລັດ, ຫຼຸດລົງ 2.2%.

ໃນປີ 2017 ມີຫົວໜ່ວຍທຸລະກິດໃໝ່ຂອງແຂວງຢູນນານທີ່ລົງທຶນຢູ່ລາວມີ 13 ບໍລິສັດ, ມີມູນຄ່າການລົງທຶນ 325 ລ້ານໂດລາສະຫະລັດ, ສະເພາະສາມໄຕມາດທໍາອິດຂອງປີ 2018 ມີຫົວໜ່ວຍທຸລະກິດເພີ່ມຂຶ້ນ 4 ບໍລິສັດ, ມີມູນຄ່າການລົງທຶນ 269 ລ້ານໂດລາສະຫະລັດ. ໃນນັ້ນ, ຂະແໜງການທີ່ລົງທຶນຫຼາຍ ແມ່ນດ້ານພະລັງງານໄຟຟ້າ, ຄົມມະນາຄົມຂົນສົ່ງ, ການບໍລິການ, ທຸລະກິດຄັງສິນຄ້າ, ໄປສະນີ ແລະ ອື່ນໆ. ບັນດາ ພາກສ່ວນທຸລະກິດ ແລະ ໂຄງ ການລົງທຶນຂອງຢູນນານທີ່ ກ່າວມານັ້ນຈະເປັນການຊຸກຍູ້ການພັດທະນາດ້ານພື້ນຖານໂຄງລ່າງ ແລະ ຮັບປະກັນດ້ານການບໍລິການສະໜອງອຸປະກອນລະຫວ່າງລາວ ແລະ ຢູນ ນານ, ເສີມຂະຫຍາຍການຮ່ວມມືດ້ານການຄ້າລະຫວ່າງສອງຝ່າຍໃຫ້ເຕີບໃຫຍ່ຂະຫຍາຍຕົວ.
ທ່ານກ່າວຕື່ມວ່າ: ແຂວງຢູນນານ ໄດ້ຖືເອົາ 8 ຂະແໜງການຜະລິດເປັນຈຸດສຸມໃນການພັດທະນາ, ເພື່ອສ້າງໃຫ້ເປັນ “ແຫຼ່ງພະລັງງານສີຂຽວ”, “ຜະລິດຕະພັນອາ ຫານອິນຊີ” ແລະ “ເປັນສະຖານທີ່ດໍາລົງຊີວິດທີ່ມີພະລານາໄມສົມບູນ” ສາມຢ່າງທີ່ມີຊື່ສຽງລະດັບໂລກ. ການເຂົ້າຮ່ວມງານວາງສະແດງສິນຄ້າຄັ້ງນີ້, ຈະສາມາດເຮັດໃຫ້ບັນດານັກທຸລະກິດ ແລະ ເພື່ອນມິດສະຫາຍທັງຫຼາຍໄດ້ຮູ້ຈັກກັບແຂວງຢູນນານ ແລະ ມີການລົງທຶນກັບແຂວງຢູນນານຫຼາຍຂຶ້ນ. ສ່ວນສິນຄ້າທີ່ນໍາມາຮ່ວມວາງສະແດງປະກອບມີ 72 ປະເພດສິນຄ້າເປັນຕົ້ນແມ່ນ: ໃບຊາ, ດອກໄມ້, ໝາກໄມ້ອົບແຫ້ງ, ຜັກ, ແກ່ນພືດຕ່າງໆ, ຜະລິດຕະພັນຊີ້ນໝູສໍາເລັດຮູບ, ເຫັດອົບແຫ້ງ, ເຫຼົ້າ-ວາຍ, ກາເຟ, ຢາພື້ນເມືອງຈີນ, ເຂົ້າໜົມ ແລະ ອື່ນໆ.