ເປີດທົດລອງການຊໍາລະພາສີທີ່ດິນຜ່ານລະບົບທັນສະໄໝອັດການຮົ່ວໄຫຼລາຍຮັບ

ເປັນບາດກ້າວໃໝ່ໃນການຊໍາລະພາສີທີ່ດິນຜ່ານລະບົບທັນສະໄໝ ແລະ ເປັນການອັດຊ່ອງຫວ່າງການຮົ່ວໄຫຼຂອງລາຍຮັບ ແລະ ເພີ່ມຄວາມໂປ່ງໃສ່, ສາມາດກວດສອບໄດ້; ໃນວັນທີ 14 ພະຈິກນີ້, ກົມສ່ວຍສາອາກອນຮ່ວມກັບທະນາຄານ ການຄ້າຕ່າງປະເທດລາວ ມະຫາຊົນ (ທຄຕລ) ໄດ້ເປີດທົດລອງການຊໍາລະພາສີທີ່ດິນຜ່ານລະບົບທະນາຄານ.

ທ່ານຫົວໜ້າກົມສ່ວຍສາອາກອນ ໃຫ້ຮູ້ວ່າ: ໂຄງການການພັດທະນາຊໍາລະພາສີທີ່ດິນຜ່ານລະບົບທະນາຄານ, ເປັນການຜັນຂະຫຍາຍແຜນພັດທະນາຫັນເປັນທັນສະໄໝຂອງຂະແໜງການເງິນໂດຍສະເພາະແມ່ນຂະແໜງສ່ວຍສາອາກອນແຕ່ນີ້ຮອດປີ 2020, ຊຶ່ງແຜນການທຳອິດແມ່ນການຫັນການຊໍາລະອາກອນທຸກປະເພດຜ່ານລະບົບທະນາຄານຄື: ພາສີທີ່ດິນ ເພື່ອຮັບປະກັນການເກັບລາຍຮັບພາສີທີ່ດິນປະຈໍາປີໃຫ້ຖືກຕ້ອງ, ທັງເປັນການອັດຊ່ອງຫວ່າງການຮົ່ວໄຫຼຂອງລາຍຮັບ ແລະ ມີຄວາມໂປ່ງໃສ່, ສາມາດກວດສອບໄດ້ ແລະ ສອດຄ່ອງຕາມກໍານົດເວລາ ແລະ ເປັນການກະກຽມຂໍ້ມູນສະໂນດທີ່ດິນ, ໃບຕິດຕາມເສຍພາສີທີ່ດິນເພື່ອເຮັດໃຫ້ການເກັບລາຍຮັບເຂົ້າງົບປະມານແຫ່ງລັດຖືກຕ້ອງຄົບຖ້ວນ.

ປັດຈຸບັນກົມສ່ວຍສາອາກອນ ກະຊວງການເງິນ ໄດ້ສັງລວມຖານຂໍ້ມູນທີ່ດິນຊຶ່ງໄດ້ຮັບການຮ່ວມມືເປັນຢ່າງດີຈາກຂະແໜງການກ່ຽວຂ້ອງ ໂດຍສະເພາະກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ໄດ້ສະໜອງຂໍ້ມູນ ເບື້ອງຕົ້ນໃນທົ່ວປະເທດມີປະມານ 1.800.000 ຕອນ ແລະ ໃນທົ່ວນະຄອນຫຼວງວຽງຈັນມີປະມານ 200.000 ກວ່າຕອນ ແລະ ຈະເປີດນໍາໃຊ້ຢ່າງເປັນທາງການໃນວັນທີ 1 ມັງກອນ 2019 ເປັນຕົ້ນໄປ.

ທ່ານຮອງຫົວໜ້າສູນບໍລິການເອເລັກໂຕຣນິກ ແລະ ຜະລິດຕະພັນບັດ ທະນາ ຄານການຄ້າຕ່າງປະເທດລາວ ມະຫາຊົນ (ທຄຕລ) ກ່າວວ່າ: ໂຄງການການພັດທະນາຊໍາລະພາສີທີ່ດິນຜ່ານລະບົບທະ ນາຄານ; ສືບເນື່ອງມາຈາກຜົນສຳເລັດໂຄງການເກັບຄ່າທຳນຽມທາງຜ່ານລະບົບທັນສະໄໝ, ໂດຍໄດ້ຮັບຄວາມສົນໃຈ ຈາກສັງຄົມຢ່າງກວ້າງຂວາງ, ປັດຈຸບັນການຊຳລະພາສີທີ່ດິນສາມາດຊໍາລະໄດ້ 3 ຊ່ອງທາງຄື: ຜ່ານເຄົ້າເຕີ້ ທຄຕລ, ຜ່ານ BCEL One ແລະ ຜ່ານຕົວແທນຂອງ ທຄຕລ ໃນໄຍະທຳອິດເປີດໃຫ້ບໍລິການຢູ່ນະຄອນຫຼວງວຽງຈັນ ແລະ ຈະຂະຫຍາຍໄປທົ່ວປະເທດໃນວັນທີ 1 ມັງກອນ 2019 ເປັນຕົ້ນໄປ.