ປັດໃຈໃໝ່ທີ່ຈະພາໃຫ້ຊາດຮັ່ງມີ
ໂດຍ: ທິດກໍ່າ
ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ 8 ຜ່ານມານີ້ວ່າ: ການຈັດຕັ້ງປະຕິບັດແຜນງົບປະມານແຫ່ງລັດໄລຍະ 3 ເດືອນຂ້າມຜ່ານທ້າຍປີ 2016 ມີດັ່ງນີ້: ດ້ານລາຍຮັບປະຕິບັດໄດ້ 4.023 ກວ່າຕື້ກີບ ເທົ່າກັບ 109% ຂອງແຜນການດັດແກ້, ດ້ານລາຍຈ່າຍບັນລຸ 6.759 ກວ່າຕື້ກີບ ເທົ່າກັບ 98% ຂອງແຜນການ, ຂາດດູນປະມານ 2.735 ກວ່າຕື້ກີບ. ສະເພາະການຈັດຕັ້ງປະຕິບັດແຜນງົບປະມານແຫ່ງລັດງວດທີ 1 ຂອງປີ 2017 (ມັງກອນ, ກຸມພາ ແລະ ມີນາ) ໄດ້ 4.621 ກວ່າຕື້ກີບ ເທົ່າກັບ 77,89% ແລະ ລາຍຈ່າຍປະຕິບັດໄດ້ 5.579 ກວ່າຕື້ກີບ ເທົ່າກັບ 75,69% ຂອງແຜນການງວດ, ຂາດດູນຫລາຍກວ່າ 957 ຕື້ກີບ ແລະ ສໍາລັບແຜນປະຈໍາປີ 2017 ທີ່ສະພາຮັບຮອງດ້ານລາຍຮັບແມ່ນ 23.941 ຕື້ກີບ, ດ້ານລາຍຈ່າຍ 32.402 ຕື້ກີບ, ຄາດຄະເນຈະຂາດດູນງົບປະມານຢ່າງໜ້ອຍ 8.461 ຕື້ກີບ.
ໃນບັນດາຕົວເລກທັງໝົດທີ່ທິດກໍ່າໄດ້ແກະເອົາມາໃຫ້ເຫັນຜ່ານການໄລ່ລຽງສົມທຽບເບິ່ງຄວາມຕັ້ງໜ້າແລ້ວເຫັນວ່າມັນກໍພໍເຫັນປັດໄຈອັນໃໝ່ພໍຈະໃຫ້ມີເງິນເຕັມຖົງໃນອະນາຄົດ ຍ້ອນວ່າຖ້າເຮົາມາປຽບທຽບເບິ່ງໃນເຊີງປະຕິບັດແລ້ວເຫັນວ່າມີທ່ວງທ່າດີຂຶ້ນ ໂດຍສະເພາະແມ່ນການປະຕິບັດແຜນງົບປະມານໄລຍະສາມເດືອນຂ້າມຜ່ານທ້າຍປີ 2016 ຖືວ່າໄດ້ລື່ນຄາດໝາຍ. ສ່ວນວ່າໃນ 3 ເດືອນຕົ້ນປີ 2017 ເຖິງແມ່ນຍັງບໍ່ທັນໄດ້ 100% ແຕ່ກໍຖືວ່າມັນເປັນໄລຍະເລີ່ມຕົ້ນປະຕິບັດແຜນການປະຈໍາປີ ເພາະຍັງຈະຕ້ອງໄດ້ລໍຖ້າເບິ່ງຜົນຈັດຕັ້ງປະຕິບັດໃນແຜນໝົດປີຕື່ມ.
+ ກະຊວງການເງິນ ເຜີຍແຜ່ ກ່ຽວກັບຂໍ້ຫ້າມ ແລະ ວິໄນຂອງພະນັກງານລັດຖະກອນ ຂະແໜງການເງິນ
+ ງວດທໍາອິດປີ 2017 ຈັດເກັບລາຍຮັບເຂົ້າງົບປະມານໄດ້ 4,6 ພັນຕື້ກີບ
ເຖິງຢ່າງໃດກໍດີ, ຕາມທິດກໍ່າຄິດລະຫວ່າງອັນຫລຸດກັບອັນລື່ນຄາດໝາຍນັ້ນມັນກໍເປັນເລື່ອງກໍາປັ້ນຕີດິນບໍ່ຜິດ ແລະ ປະຕິເສດບໍ່ໄດ້ເໝືອນດັ່ງຕົວເລກທີ່ໄດ້ຍົກມາຂ້າງເທິງ, ແຕ່ຄິດວ່າທຸກສິ່ງທຸກຢ່າງມັນກໍຂຶ້ນກັບເງື່ອນໄຂ ແລະ ປັດໄຈໃນການຈັດຕັ້ງປະຕິບັດສົມທົບກັບການນໍາໃຊ້ບັນດາມາດຕະການຕ່າງໆ ນັບທັງກໍາລັງຄົນ ແລະ ວັດຖຸທີ່ທັນສະໄໝ. ຄືດັ່ງພວກເຮົາຮູ້ນໍາກັນແລ້ວວ່າ: ແຫລ່ງລາຍຮັບຂອງຊາດຕົ້ນຕໍນັ້ນແມ່ນໄດ້ມາຈາກການເກັບພາສີ-ອາກອນເປັນຫລັກ, ຖ້າຫາກການເກັບພາສີອາກອນຢູ່ໃນຂ້ອນຂ້າງ “ເປິະ” ແລ້ວ ກໍໝາຍວ່າ “ເຈັ້ງ”. ທຸກສິ່ງທຸກຢ່າງໃນຫ້າປີສິບປີຜ່ານມາບໍ່ແມ່ນວ່າພວກເຮົາເກັບພາສີ-ອາກອນບໍ່ໄດ້, ແຕ່ມັນມີການຮົ່ວໄຫລຄືຖອກນໍ້າໃສ່ຫົວເປັດ, ມີການສໍ້ລາດບັງຫລວງຢ່າງແຜ່ລາມແຕ່ໃຫຍ່ຫານ້ອຍ, ແຕ່ນ້ອຍຫາໃຫຍ່, ແຕ່ລຸ່ມຂຶ້ນເທິງ, ແຕ່ເທິງລົງລຸ່ມເກືອບເວົ້າໄດ້ວ່າເປັນສາຍໄຍປານເຈັກແປະຂາຍລວດ. ຖ້າພວກເຮົາເອົາບໍ່ທັນບາງທີຊາດບ້ານເມືອງອາດຈະມີການເສຍຫາຍຫລາຍກວ່ານີ້.
ຂໍໃຫ້ລັດຖະບານຊຸດນີ້ຈົ່ງໄດ້ຜ່ານຜ່າບັນດາອຸປະສັກຫຍຸ້ງຍາກ, ເປັນຫົວຈັກນາຍທ້າຍທີ່ແຂງແກ່ນ ເພື່ອນໍາພາປະເທດຊາດບ້ານເມືອງ ແລະ ປວງຊົນລາວທັງຊາດໄປສູ່ຄວາມສົມບູນພູນສຸກ ແລະ ຈະເລີນສີວິໄລຂອງປະເທດຊາດອັນແສນຮັກຂອງພວກເຮົາ.
