ເຈົ້າໜ້າທີ່ຈາລະຈອນຈະເຂົ້າຄວບຄຸມ ແລະ ຈັດສັນການຈອດລົດໃນງານບຸນນະມັດສະການພະທາດຫລວງ ເພື່ອຄວາມເປັນລະບຽບຮຽບຮ້ອຍ
ໃນວັນທີ 13 ພະຈິກນີ້, ເຈົ້າໜ້າທີ່ຈາລະຈອນນະຄອນຫລວງວຽງຈັນ ໄດ້ແຈ້ງໃຫ້ຮູ້ວ່າ: ເພື່ອຮັບປະກັນຄວາມເປັນລະບຽບຮຽບຮ້ອຍຂອງງານບຸນນະມັດ ສະການພະທາດຫລວງວຽງຈັນ ແລະ ງານວາງສະແດງສິນຄ້າທີ່ສູນການຄ້າລາວ-ໄອເຕັກ ລະຫວ່າງວັນທີ 16-25 ພະຈິກນີ້ ແລະ ບໍ່ໃຫ້ມີການສວຍໂອກາດເກັບເງິນຄ່າຝາກລົດຢ່າງຊະຊາຍດັ່ງງານບຸນອອກພັນສາປະວໍລະນາທີ່ທ່າວັດຈັນໃນຜ່ານມານີ້, ເຈົ້າໜ້າທີ່ຈາລະຈອນນະຄອນຫລວງວຽງຈັນຈະເຂົ້າຄວບຄຸມ ແລະ ຈັດສັນບ່ອນຈອດລົດໃຫ້ເປັນລະບຽບຮຽບຮ້ອຍ ແລະ ໄດ້ກຳນົດສະຖານທີ່ຈອດລົດປະເພດຕ່າງໆໃນງານບຸນດັ່ງນີ້: ລົດ VIP ອະນຸຍາດໃຫ້ຈອດເບື້ອງທິດຕາເວັນອອກເຂດເຮືອນຊົງລາວ (ບໍລິສັດ CNP), ລົດ P1, P2 ອະນຸຍາດໃຫ້ຈອດຢູ່ສະໜາມຫລວງໜ້າຕຶກສະພາແຫ່ງຊາດ, ສຳລັບລົດທີ່ມາສົ່ງເຄື່ອງໃນງານບຸນໃຫ້ເລີ່ມແຕ່ 8:00-12:00 ໂມງ, ພາຍຫລັງເອົາເຄື່ອງລົງໝົດແລ້ວໃຫ້ເອົາລົດໄປຈອດໄວ້ຢູ່ບ່ອນທີ່ກຳມະການກຳນົດ, ລົດສົ່ງມວນຊົນ ປະເພດລົດຕຸກໆ, ຈຳໂບ້, ລົດຂົນສົ່ງໂດຍສານອະນຸຍາດໃຫ້ຈອດຊົ່ວຄາວເພື່ອສົ່ງຄົນໂດຍສານລົງຕາມຈຸດທີ່ໄດ້ກຳນົດໄວ້ຄື: ເສັ້ນທາງຊ້າງເຜືອກເຂດບ້ານ ຮ່ອງໄກ່ແກ້ວ, ຕະຫລາດທາດຫລວງ, ສີສັງວອນ-ໂພນໄຊ, ປະຕູໄຊ, ໂພນສະອາດ ແລະ ຮ່ອມໂຮງຮຽນມັດທະຍົມໜອງສ້າງທໍ່, ສະເພາະລົດສ່ວນຕົວ, ລົດຈັກ, ລົດຖີບ, ລົດສາມລໍ້ ທີ່ມີຈຸດປະສົງໄປທ່ຽວງານບຸນດັ່ງກ່າວແມ່ນໃຫ້ຈອດຕາມສະຖານທີ່ຈອດລົດທີ່ທາງຄະນະກຳມະການຈັດງານກຳນົດໄວ້, ເຊິ່ງຈະມີເຈົ້າໜ້າທີ່ອຳນວຍຄວາມສະດວກຕາມຈຸດຕ່າງໆ.
ໃນໂອກາດນີ້, ທ່ານຫົວໜ້າພະແນກຈາລະຈອນນະຄອນຫລວງວຽງຈັນໄດ້ຮຽກຮ້ອງໃຫ້ນັກຂັບຂີ່ທີ່ໃຊ້ລົດໃຊ້ຖະໜົນຈົ່ງປະຕິບັດຕາມກົດລະບຽບຈາລະຈອນຢ່າງເຂັ້ມງວດ ແລະ ຂັບຂີ່ດ້ວຍຄວາມມີສະຕິຫ້າມດື່ມສິ່ງມືນເມົາໃນເວລາຂັບລົດຢ່າງເດັດຂາດ ເພື່ອຮັບປະກັນບໍ່ໃຫ້ມີອຸປະຕິເຫດເກີດຂຶ້ນ.
