ວິກເຕີ ລິນເດີເລິບ ກອງຫຼັງທີມຊາດສະວີເດັນ ຄວ້າລາງວັນນັກເຕະຊາຍດີເດັ່ນຂອງສະວີເດັນ ປະຈຳປີ 2018
ວິກເຕີ ລິນເດີເລິບ ກອງຫຼັງທີມຊາດສະວີເດັນ ໄວ 24 ປີ ຄວ້າລາງວັນນັກເຕະຊາຍດີເດັ່ນຂອງປະເທດສະວີເດັນ ປະຈຳປີ 2018 ແລະ ເປັນຄັ້ງທຳອິດທີ່ ວິກເຕີ ລິນເດີເລິບ ຄວ້າລາງວັນນີ້. ໂດຍອີງຕາມຜົນງານດີກັບທີມຊາດສະວີເດັນ ໃນບານໂລກ 2018 ທີ່ຣັດເຊຍ ຊ່ວຍທີມຊາດເຂົ້າເຖິງຮອບ 8 ທີມ. ສຳລັບປີ 2018 ວິກເຕີ ລິນເດີເລິບ ລົງສະໜາມຮັບໃຊ້ທີມຊາດ 9 ນັດ. ສ່ວນຜົນງານກັບສະໂມສອນ ແມນເຊັສເຕີ ຢູໄນເຕັດ ລະດູການ 2018-19 ລົງສະໜາມເປັນຕົວຈິງ 10 ຈາກ 12 ນັດ.
ວິກເຕີ ລິນເດີເລິບ ກ່າວຫຼັງຈາກຮັບລາງວັນນີ້ວ່າ: ການທີ່ຕົນເອງໄດ້ຮັບລາງວັນທີ່ມີຄວາມໝາຍຫຼາຍ ສຳລັບຕົວຂອງຂ້ອຍເອງ, ຂ້ອຍມີຄວາມຮູ້ສຶກພາກພູມໃຈທີ່ສຸດ, ຂ້ອຍຂໍຂອບໃຈເພື່ອນຮ່ວມທີມທຸກຄົນທັງໃນສະໂມສອນ ແລະ ທີມຊາດສະວີເດັນ ລວມເຖິງຄອບຄົວ.
ລາງວັນນີ້ ເມື່ອປີ 2017 ຜ່ານມາແມ່ນ ອັນເດດ ແກຣນວິດ ກອງຫຼັງທີມຊາດສະວີເດັນ ແລະ ສະໂມສອນ ເຮວຊິງບອກ ຄວ້າລາງວັນນີ້ໄປຄອງ. ສ່ວນນັກເຕະທີ່ຮັບລາງວັນຫຼາຍສຸດແມ່ນ ສະລາຕັນ ອິບບາຮິມໂມວິກ ກອງໜ້າໄວ 37 ປີ, ອະດີດກອງໜ້າທີມຊາດສະວີເດັນ, ສະໂມສອນ ອາແຈັກ, ຢູເວັນຕຸດ, ອິນເຕີ ມິລານ, ບາເຊໂລນາ, ເອຊີ ມີລານ, ເປແອັສເຊ, ແມນເຊັສເຕີ ຢູໄນເຕັດ ແລະ ປັດຈຸບັນຫຼິ້ນໃຫ້ ແອວເອ ກາແລັກຊີ ໃນເມເຈີລີກ ອາເມລິກາ, ຄວ້າລາງວັນນີ້ 11 ຄັ້ງ.
