ຣູນີ ກັບມາຮັບໃຊ້ທີມຊາດອັງກິດ ເພື່ອສັ່ງລາແຟນບານເປັນທາງການ

ເວນ ຣູນີ ອະດີດກອງໜ້າສະໂມສອນ ແມນເຊັສເຕີ ຢູໄນເຕັດ ແລະ ເອັຟເວີຕັນ ຫວນກັບມາຮັບໃຊ້ທີມຊາດອີກຄັ້ງ ໃນນັດທີ່ ທີມຊາດອັງກິດ ຈະພົບກັບ ທີມຊາດສະຫະລັດອາເມລິກາ ແລະ ທີມຊາດໂຄຣເອເຊຍ ໃນວັນທີ 15 ແລະ 18 ພະຈິກນີ້.

ການກັບມາຊ່ວຍທີມຊາດຂອງ ເວນ ຣູນີ ຄັ້ງນີ້ ຈະເປັນການອຳລາທີມຊາດຢ່າງເປັນທາງການ ແລະ ຈະນຳລາຍໄດ້ຈາກຜູ້ມີຈິດໃຈກຸສົນຮ່ວມບໍລິຈາກເຂົ້າມູນນິທິ ເວນ ຣູນີ ສາກົນ ເພື່ອຊ່ວຍເຫລືອເດັກຜູ້ດ້ອຍໂອກາດ ໂດຍຄາດວ່າ ເວນ ຣູນີ ຈະນຸ່ງເສື້ອໝາຍເລກ 10 ອາດຈະລົງສະໜາມເປັນຕົວສຳຮອງ ແລະ ບໍ່ໄດ້ເປັນຫົວໜ້າທີມ.

ຣູນີ ເປັນດາວຍິງສູງສຸດຂອງທີມຊາດອັງກິດ 53 ປະຕູ ຈາກ 119 ນັດ, ນັດຫລ້າສຸດທີ່ລົງສະໜາມຮັບໃຊ້ທີມຄືພົບກັບ ທີມຊາດສະກ໊ອດແລນ ໃນເດືອນກັນຍາ 2016, ສ່ວນນັກເຕະຜູ້ອື່ນທີ່ ແກເຣັດ ເຊົາເກດ ຄູຝຶກເອີ້ນມາຊ່ວຍທີມ ກອງໜ້ານຳໂດຍ: ແຣຣີ ເຄນ, ແດນນີ ເວວເບັກ, ມາຄາສ ຣາສຟີ, ຄໍລຳ ວິວສັນ, ຈາດອນ ຊານໂຊ ແລະ ຣາຮີມ ສະເຕີລິງ.

ກອງກາງນຳໂດຍ: ຈໍແດນ ເຮັນເດີສັນ, ເດເລ້ ອາວລີ, ເອຣິກ ໄດເອີ, ຣັອສ ບ໊າກລີ້, ເຈັສຊີ້ ລິນກາດ, ຟາບ້ຽນ ເດວ, ແຣຣີ້ ວິ້ງສ໌ ແລະ ຣູເບັນ ລັອຟຕາສຊິກ. ກອງຫລັງ: ຄາຍ ວັອກເກີ, ລຸກຊໍລ, ຈ໋ອນສະໂຕນ, ຄີເຣນ ທຣິບເປຍ, ໂຈ ໂກເມັສ, ເທັນ ອາເລັກຊາຍເດີ ອາໂນລ, ເບັນ ຊິວເວວ ແລະ ເລວິສ ດັ້ງ.

ຜູ້ຮັກສາປະຕູ 4 ຄົນ ເໝືອນເດີມ: ຈໍແດນ ຟິກຟ໋ອດ, ແຈັກ ບັດແລນ, ອາເລັກ ແມັກຄາຣທີ້ ແລະ ມາຄັສ ເບັດຕີເນວລີ້. ທີມຊາດອັງກິດ ຈະລົງຫລິ້ນເກມອຸ່ນເຄື່ອງກັບ ທີມຊາດສະຫະລັດອາເມລິກາ ໃນວັນທີ 15 ພະຈິກນີ້ ທີ່ສະໜາມເວັມບລີ ໃນນະຄອນຫລວງລອນດອນ ແລະ ລົງຫລິ້ນເກມ ຢູຟາ ເນຊັ່ນລີກ ເປີດສະໜາມເວັມບລີ ພົບກັບ ທີມຊາດໂຄຣເອເຊຍ ໃນວັນທີ 18 ພະຈິກນີ້.