ສປປ ເກົາຫລີ ອ້າງທົດລອງລູກສອນໄຟລຸ້ນໃໝ່
ສຳນັກຂ່າວກາງເກົາຫລີ (KCNA) ຂອງທາງການ ສປປ ເກົາຫລີ ຖະແຫລງວ່າການຍິງລູກສອນໄຟລົງທະເລຍີ່ປຸ່ນໃນວັນທີ 14 ພຶດສະພາ ເປັນການທົດລອງລູກສອນໄຟລຸ້ນທີ່ພັດທະນາຂຶ້ນໃໝ່ “ຮວາຊອງ-12” ເຊິ່ງເປັນຈະຫລວດທາງຍຸດທະສາດໄລຍະກາງເຖິງໄກ ທີ່ສາມາດບັນທຸກຫົວຮົບນິວເຄຼຍຂະໜາດໃຫຍ່ທີ່ມີນ້ຳໜັກຫລາຍໄດ້.
ສຳນັກຂ່າວຢອນຮັບຂອງ ສ.ເກົາຫລີ ລາຍງານວ່າ: ການຍິງທົດລອງລູກສອນໄຟດັ່ງກ່າວໃຊ້ວິທີຍິງຂຶ້ນເປັນລວງຕັ້ງ ໂດຍລູກສອນໄຟຍິງຂຶ້ນເຖິງຈຸດສູງສຸດ 2.000 ກິໂລແມັດເໜືອພື້ນດິນ ກ່ອນຕົກລົງໃນທະເລທາງຕາເວັນຕົກຂອງປະເທດຍີ່ປຸ່ນ.
ສຳນັກຂ່າວກາງເກົາຫລີຍັງລະບຸວ່າ: ການຍິງທົດລອງລູກສອນໄຟລຸ້ນໃໝ່ນີ້ປະສົບຜົນສຳເລັດຕາມແຜນທີ່ວາງໄວ້ ໂດຍທ່ານ ກິມ ຈອງ ອິນ ຜູ້ນຳສູງສຸດຂອງ ສປປ ເກົາຫລີ ໄດ້ໄປຊົມການທົດລອງເທື່ອນີ້ນຳ.
+ ສປປ ເກົາຫລີ ຍິງທົດລອງລູກສອນໄຟຄັ້ງໃໝ່
+ ສະພາຄວາມໝັ້ນຄົງ ສປຊ ຂູ່ຈະລົງໂທດຂວ້ຳບາດ ສປປ ເກົາຫລີເທື່ອໃໝ່
ສ່ວນກອງທັບ ສ.ເກົາຫລີ ລະບຸວ່າ: ຍັງບໍ່ສາມາດພິສູດຢືນຢັນຄຳກ່າວອ້າງຂອງ ສປປ ເກົາຫລີ ເລື່ອງລູກສອນໄຟລຸ້ນໃໝ່ ໂດຍກ່ອນໜ້ານີ້ຍັງບໍ່ແນ່ນອນວ່າ ສປປ ເກົາຫລີ ມີປະສິດທິພາບໃນການພັດທະນາຫົວຮົບນິວເຄຼຍຂະໜາດນ້ອຍ ເພື່ອຕິດຕັ້ງນຳລູກສອນໄຟໄລຍະໄກຂ້າມທະວີບ ທີ່ສາມາດໂຈມຕີເຖິງອາເມລິກາໄດ້ແທ້ ຫລື ບໍ່.
ຜູ້ຊ່ຽວຊານຊີ້ວ່າ: ຕາມປົກກະຕິແລ້ວ ລູກສອນໄຟໄລຍະຂ້າມທະວີບຄວນມີໄລຍະຍິງປະມານ 6.000 ກິໂລແມັດ, ແຕ່ລູກສອນໄຟລຸ້ນໃໝ່ຂອງ ສປປ ເກົາຫລີ ທີ່ຍິງທົດລອງເທື່ອນີ້ ອາດຈະມີໄລຍະຍິງໄດ້ໄກທີ່ສຸດພຽງ 4.000 ກິໂລແມັດ.
ອາເມລິກາ ແລະ ຍີ່ປຸ່ນ ໄດ້ຂໍໃຫ້ສະພາຄວາມໝັ້ນຄົງແຫ່ງສະຫະປະຊາຊາດ ຈັດກອງປະຊຸມສຸກເສີນໃນວັນທີ 16 ພຶດສະພານີ້ ເພື່ອຫາລືເລື່ອງ ສປປ ເກົາຫລີ ທົດລອງຍິງລູກສອນໄຟເທື່ອໃໝ່ ໂດຍທ່ານນາງ ນິກກີ ເຮລີ ທູດອາເມລິກາປະຈຳສະຫະປະຊາຊາດ ກ່າວຕຳນິຜູ້ນຳ ສປປ ເກົາຫລີ ຍິງທົດລອງລູກສອນ ແລະ ອາເມລິກາຈະເດີນໜ້າກົດດັນ ສປປ ເກົາຫລີ ໃຫ້ຢຸດໂຄງການພັດທະນານິວເຄຼຍຕໍ່ໄປ ໂດຍຈະບໍ່ຍອມເຈລະຈາຈົນກວ່າ ສປປ ເກົາຫລີ ຈະປະຕິບັດຕາມຂໍ້ຮຽກຮ້ອງດັ່ງກ່າວກ່ອນ.
ສ່ວນທຳນຽບປະທານາທິບໍດີອາເມລິກາອອກຖະແຫລງການປະນາມການຍິງທົດລອງລູກສອນໄຟຂອງ ສປປ ເກົາຫລີ ເທື່ອຫລັງສຸດ ໂດຍລະບຸວ່າ ສປປ ເກົາຫລີ ເປັນໄພມາດົນເກີນໄປແລ້ວ ເຮັດໃຫ້ການກະທຳເທື່ອນີ້ເປັນສັນຍາເຕືອນໃຫ້ທຸກປະເທດເລັ່ງໃຊ້ມາດຕະການຂວ້ຳບາດ ສປປ ເກົາຫລີ ຢ່າງຮຸນແຮງ ແລະ ເຂັ້ມງວດຍິ່ງຂຶ້ນ.
