ຈາລະຈອນນະຄອນຫຼວງວຽງຈັນ ກຽມພ້ອມຮັກສາຄວາມເປັນລະບຽບຮຽບຮ້ອຍຂອງງານບຸນນະມັດຊະການພະທາດຫຼວງ
ເພື່ອເຮັດໃຫ້ບຸນນະມັດຊະການພະທາດຫຼວງ ແລະ ງານວາງສະແດງສິນຄ້າ ທີ່ສູນການຄ້າລາວ-ໄອເຕັກ ໃນວັນທີ 16-25 ພະຈິກນີ້ ໄດ້ດຳເນີນໄປດ້ວຍບັນຍາກາດຟົດຟື້ນມ່ວນຊື່ນ, ຮັກສາເອກະລັກວັດທະນະທຳອັນດີ ງາມຂອງຊາດ, ຮັບປະກັນຄວາມສະຫງົບຮຽບຮ້ອຍ ແລະ ມີຄວາມສະອາດຈົບງາມ, ພະແນກຈາລະຈອນໄດ້ກຽມພ້ອມຈັດຕັ້ງໃຫ້ກຳລັງຕຳຫຼວດຫຼາຍຮ້ອຍນາຍລົງໄປຈັດສັນຢູ່ແຕ່ລະຈຸດເພື່ອຄວາມສະດວກໃຫ້ແກ່ການສັນຈອນໄປມາມີຄວາມເປັນລະບຽບຮຽບຮ້ອຍດີຂຶ້ນ.
ທ່ານ ພັທ ເພັງສະຫວັນ ທຳມາບູນ ຫົວໜ້າພະແນກຈາລະຈອນນະຄອນຫຼວງວຽງຈັນ ໄດ້ຖະແຫຼ່ງຕໍ່ສື່ມວນຊົນວ່າ: ການນຳໃຊ້ເສັ້ນທາງໃນໄລຍະຈັດງານບຸນຄື: ພາຫະນະທີ່ມາແຕ່ເສັ້ນທາງ 13 ໃຕ້, ເສັ້ນທາງເລກທີ 10 ຫຼື ເສັ້ນທາງດອນໜູນ ຕໍ່ໃສ່ເສັ້ນທາງໄກສອນ ຖ້າບໍ່ມີຈຸດປະສົງມາທ່ຽວບຸນ ມາຮອດໄຟແດງໜອງໜ່ຽງ ແມ່ນໃຫ້ລ້ຽວຊ້າຍເຂົ້າໄປຕາມເສັ້ນທາງບ້ານໜອງໜ່ຽງ ອອກໄປໃສ່ບ້ານ ວັງຊາຍ ຫຼື ລ້ຽວຂວາອອກໃສ່ເສັ້ນທາງ 150 ຕຽງ ແລ້ວໄປຕາມຈຸດປະສົງ, ສະເພາະລົດບັນທຸກທີ່ມາແຕ່ເສັ້ນທາງ 13 ເໜືອ ມີຈຸດປະສົງຈະໄປຂົວມິດຕະພາບໃຫ້ໃຊ້ເສັ້ນທາງໜອງ ບຶກ-ດົງໂດກອອກໃສ່ເສັ້ນທາງ 450 ປີ ໄປຫາຂົວມິດຕະພາບ ແລະ ກໍລະນີການສັນຈອນມີຄວາມສັບສົນ ເຈົ້າໜ້າທີ່ຈະໄດ້ແຍກລົດຢູ່ຈຸດໄຟແດງດົງໂດກ ແລະ ຈຸດໄຟແດງໜອງໜ່ຽງໃຫ້ລ້ຽວຂວາໄປໃຊ້ເສັ້ນທາງດົງໂດກ-ໜອງບຶກ ຮອດ 3 ແຍກ ມ.ຊ ໃຫ້ລ້ຽວຊາຍໄປເສັ້ນທາງດົງໂດກ-ໂພນຕ້ອງ ຫຼື ຮອດໄຟແດງຕານມີໄຊ ໃຫ້ລ້ຽວຊ້າຍໄປເສັ້ນທາງດອນແດງ.
ທ່ານຫົວໜ້າພະແນກຈາລະຈອນນະຄອນຫຼວງວຽງຈັນ ໃຫ້ຮູ້ຕື່ມວ່າ: ເພື່ອຄວາມເປັນລະບຽບຮຽບຮ້ອຍ ໂດຍສະເພາະປີທ່ອງທ່ຽວລາວ ຈຶ່ງຮຽກຮ້ອງມາຍັງບັນດານັກຂັບຂີ່ທີ່ໃຊ້ລົດໃຊ້ຖະໜົນ ຈົ່ງປະຕິບັດກົດລະບຽບຈາ ລະຈອນຢ່າງເຂັ້ມງວດ ແລະ ຂັບຂີ່ດ້ວຍຄວາມມີສະຕິລະມັດລະວັງໃຫ້ຫຼາຍ ຂຶ້ນຕື່ມອີກ.
