ລັດຖະບານຫາລືຫລາຍບັນຫາຂອງຊາດກ່ອນສະເໜີສະພາແຫ່ງຊາດຮັບຮອງ

ກອງປະຊຸມລັດຖະບານປະຈໍາເດືອນພະຈິກ 2018 ໄດ້ຈັດຂຶ້ນວັນທີ 12 ນີ້, ພາຍໃຕ້ການເປັນປະທານຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ເພື່ອຄົ້ນຄວ້າພິຈາລະນາບັນຫາສໍາຄັນຂອງຊາດທີ່ຈະສະເໜີຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ 8 ທີ່ຈະຈັດຂຶ້ນໃນທ້າຍເດືອນນີ້ຄື: ບົດລາຍງານການຈັດຕັ້ງປະຕິບັດວຽກງານພົ້ນເດັ່ນໃນຜ່ານມາ ແລະ ທິດທາງໃນຕໍ່ໜ້າຂອງລັດຖະບານ, ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ 2018 ແລະ ທິດທາງ 2019, ບົດລາຍງານສະພາບການກໍ່ສ້າງ ແລະ ສ້ອມແປງຖະໜົນຫົນທາງໃນໄລຍະຜ່ານມາທີ່ເຫັນວ່າມີຄຸນນະພາບຕໍ່າ, ມູນຄ່າການກໍ່ສ້າງສູງ ແລະ ແກ່ຍາວເວລາໃນການກໍ່ ສ້າງ, ບົດລາຍງານຄຸນນະພາບການບໍລິການປິ່ນປົວຢູ່ບັນດາໂຮງໝໍ, ສຸກສາລາ ແລະ ທິດທາງແກ້ໄຂໃນຕໍ່ໜ້າ, ບົດລາຍງານການປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຕິດພັນກັບເປົ້າໝາຍພັດທະນາແບບຍືນຍົງ (SDGs) ແຕ່ປີ 2016-2018 ແລະ ທິດທາງແຜນການປີ 2019, ບົດລາຍງານຄວາມພ້ອມໃນການສ້າງກົດໝາຍທີ່ຈະສະເໜີຜ່ານກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ແລະ ສະເໜີແຜນການສ້າງ ແລະ ປັບປຸງນິຕິກຳປີ 2019, ບົດລາຍງານການເອີ້ນຊື່ຊົນເຜົ່າບຣູ, ບົດລາຍງານຜົນການກວດກາຜົນການຈັດຕັ້ງປະຕິບັດແຜນງົບປະມານແຫ່ງລັດສົກປີ 2015-2016 ຜ່ານມາ ແລະ ບັນຫາຮີບດ່ວນອື່ນໆ.