ເງື່ອນໄຂ ແມນຢູ ປົດ ມູຣິນໂຢ ພ້ອມເຜີຍຊື່ຜູ້ຈັດການທີມຄົນໃໝ່
ສື່ອັງກິດລາຍງານເງື່ອນໄຂທີ່ຈະເຮັດໃຫ້ ແມນເຊັສເຕີ ຢູໄນເຕັດ ປົດ ໂຊເຊ ມູຣິນໂຢ ຕົກຕຳແໜ່ງແນ່ນອນ ພ້ອມລັອກຊື່ຜູ້ຈັດການທີມຄົນໃໝ່ໄວ້ແລ້ວ.
ແມນເຊັສເຕີ ຢູໄນເຕັດ ຈະປົດ ໂຊເຊ ມູຣິນໂຢ ອອກຈາກຕຳແໜ່ງຜູ້ຈັດການທີມ ຖ້າບໍ່ສາມາດພາທີມຕິດ 4 ອັນດັບທຳອິດຫລັງຈົບລະດູການນີ້ ເຊິ່ງຈະສົ່ງຜົນໃຫ້ບໍ່ໄດ້ໄປຫລິ້ນ ຢູຟາ ແຊມປ້ຽນລີກ ໃນລະດູການໜ້າ.
ແມນຢູ ຫາກໍບຸກໄປເສຍໃຫ້ ແມນເຊັສເຕີ ຊິຕີ້ 1-3 ໃນວັນທີ 11 ພະຈິກຜ່ານມາ ເຮັດໃຫ້ມີພຽງແຕ່ 20 ຄະແນນເທົ່ານັ້ນ ຈາກ 12 ນັດ ນຳຫລັງ ແມນເຊັສເຕີ ຊິຕີ້ ເຖິງ 12 ຄະແນນ ແລະ ຕາມ ທ໊ອດແນມ ຮ໊ອດສະເປີ ທີມອັນດັບ 4 ຢູ່ 7 ຄະແນນ.
ຖ້າ ມູຣິນໂຢ ບໍ່ສາມາດພາທີມຕິດ 4 ອັນດັບ ຫລັງຈົບລະດູການ ຈະເຮັດໃຫ້ປະທານສະໂມສອນຕັດສິນໃຈປົດຈາກຕຳແໜ່ງ ແລ້ວໄປດຶງ ເມົາຣິຊິໂອ ໂປເຊັດຕິໂນ່ ຜູ້ຈັດການທີມ ສະເປີ ມາຮັບວຽກແທນຕໍ່ໄປ, ເຖິງວ່າຕ້ອງຈ່າຍເງິນຈຳນວນຫລາຍ ເພາະຜູ້ຈັດການທີມຊາວອາເຈນຕິນາຫາກໍຕໍ່ສັນຍາກັບ ທ໊ອດແນມ ຮ໊ອດສະເປີ ໄປເມື່ອບໍ່ດົນນີ້ກໍຕາມ.
ສຳລັບ ໂປເຊັດຕິໂນ ກ່ອນໜ້ານີ້ເຄີຍຕົກເປັນເປົ້າໝາຍຂອງ ຣີລ ມາດຣິດ ເຊັ່ນກັນ. ເຖິງຢ່າງໃດກໍຕາມ, ຫລ້າສຸດ ຣີລ ມາດຣິດ ໄດ້ໃຫ້ ຊານຕິອາໂກ້ ໂຊລາຣີ ຄຸມທີມໄປຢ່າງໜ້ອຍຈົນຈົບລະດູການນີ້ ຫລັງສ້າງຜົນງານດີເດັ່ນພາທີມຄວ້າໄຊຊະນະ 4 ນັດຕິດ ນັບແຕ່ກຸມທີມຊົ່ວຄາວແທນ ຈູເລນ ໂລເປເຕກີ.
