ຊາຣຣີ ຄູຝຶກໃຫມ່ ເຊລຊີ ສ້າງສະຖິຕິໃຫມ່ໃນພຣີເມຍລີກ

ເມົາຣີຊີໂອ ຊາຣຣີ (Maurizio Sarri) ຄູຝຶກໃຫມ່ຂອງສະໂມສອນ ເຊລຊີ ຊາວອີຕາລີ ອາຍຸ 59 ປີ ສ້າງສະຖິຕິເປັນຜູ້ຈັດການທີມຄົນທຳອິດທີ່ເຂົ້າມາຄຸມທີມໃຫມ່ໃນພຣີເມ໋ຍລີກ ນຳທີມບໍ່ເສຍ 12 ນັດຕິດຕໍ່ກັນ ທຳລາຍສະຖິຕິຂອງ ແຟັງຄຣາກ ຄູຝຶກຊາວອັງກິດ ທີ່ຄຸມ ນ໋ອດຕິ້ງແຮມ ຟໍເຣັສ ບໍ່ເສຍ 11 ນັດ ໃນປີ 1994.

ນັດຫລ້າສຸດໃນວັນ​ທີ 11 ພະຈິກ ເຊລຊີ ເປີດບ້ານສະເໝີກັບ ເອຟເວີຕັນ 0-0, 12 ນັດໃນພຣີເມຍລີກ ລະດູການນີ້ ຊາຣຣີ ນຳທີມຊະນະ 8 ສະເໝີ 4 ມີ 28 ຄະແນນ ຢູ່ອັນດັບທີ 3 ຕາມຫລັງ ແມນເຊັສເຕີ ຊິຕີ້ ທີມນຳ 4 ຄະແນນ, ຕາມຫລັງ ລິເວີພູລ ອັນດັບສອງ 2 ຄະແນນ.

ເອຟເວີຕັນ ມາຢາມ ເຊລຊີ ບໍ່ຊະນະ 24 ນັດຕິດຕໍ່ກັນ, ສະເໝີ 11 ເສຍ 13 ນັດ. ນັດຕໍ່ໄປ ເຊລຊີ ຈະໄປຢາມ ສະເປີ ໃນວັນທີ 24 ພະຈິກນີ້ ຫລັງເກມທີມຊາດກັບມາ.