ສານປະຊາຊົນອັດຕະປືຕັດສີນປະຫານຊີວິດຜູ້ຄ້າຢາເສບຕິດ 2 ລາຍ

ເມື່ອບໍ່ດົນມານີ້, ສານປະຊາຊົນແຂວງອັດຕະປືໄດ້ຕັດສີນປະຫານຊີວິດທ້າວ ແກ້ວ ອາຍຸ 29 ປີຢູ່ບ້ານໃໝ່ເມືອງສະໜາມໄຊ ແລະ ທ້າວ ບຸນເກີດ ອາຍຸ 29 ປີຢູ່ບ້ານວົງສໍາພັນເມືອງພູວົງແຂວງອັດຕະປື ໃນຂໍ້ຫາຄ້າຢາເສບຕິດ. ໂດຍທັງສອງຖືກເຈົ້າໜ້າທີ່ກັກຕົວໄດ້ເມື່ອທ້າຍປີ 2017 ຜ່ານມານີ້, ໃນຂະນະເອົາຢາເສບຕິດປະເພດເຮໂຣອິນຈໍານວນ 40 ແທ່ງໄປສົ່ງໃຫ້ຜູ້ສັ່ງຊື້ຢູ່ເສັ້ນທາງເຂດບ້ານຫລັກ 31 ໄປຊາຍແດນລາວ-ຫວຽດນາມ. ຈຶ່ງຖືກສານປະຊາຊົນແຂວງດັ່ງກ່າວຕັດສີນປະຫານຊີວິດຕາມລະບຽບກົດໝາຍ.

ສປປ ລາວ ມີມາດຕະການທາງດ້ານກົດໝາຍເຂັ້ມງວດຕໍ່ຜູ້ທີ່ຄ້າຂາຍຢາເສບຕິດ, ໃນກົດໝາຍອາຍາມາດຕາ 146 ໄດ້ລະບຸແຈ້ງວ່າ: ບຸກຄົນໃດຫາກຜະລິດ, ປຸງແຕ່ງ, ມີໄວ້ຄອບຄອງ, ຄ້າຂາຍ, ຈໍາໜ່າຍ, ນໍາເຂົ້າ-ສົ່ງອອກ,​ ຂົນສົ່ງ ຢາອີ, ຢາບ້າ ຫລື ວັດຖຸອອກລິດຕໍ່ປະສາດອື່ນໆ ຜ່ານ ສປປ ລາວ ນໍ້າໜັກເກີນ 3 ກິໂລແມ່ນຈະຖືກລົງໂທດປະຫານຊີວິດ.