ບາເຊໂລນາ ອາດຍື່ນ ມັລຄອມ ລໍ້ ເຊລຊີ ປ່ອຍ ວິລລຽນ
ບາເຊໂລນາ ຕົກເປັນຂ່າວອາດຍື່ນ ມັລຄອມ ປີກຕົວສຳຮອງ ເປັນໜຶ່ງໃນຂໍ້ສະເໜີຊື້ ວິລລຽນ ດາວເຕະ ເຊລຊີ ຫລັງອະດີດນັກເຕະ ບອກໂດ ບໍ່ຢູ່ໃນແຜນຂອງ ບາຊາ ເຖິງວ່າຫາກໍຍ້າຍມາຮ່ວມທີມໃນລະດູການນີ້ກໍຕາມ.
ບາເຊໂລນາ ສະໂມສອນຍັກໃຫຍ່ແຫ່ງ ລາລີກາ ສະເປນ ຕົກເປັນຂ່າວກຳລັງພິຈາລະນາຈະຍື່ນ ມັລຄອມ ປີກຄົນສຳຮອງ ໃຫ້ ເຊລຊີ ຍອດທີມແຫ່ງອັງກິດ ເພື່ອຫວັງຄວ້າ ວິລລຽນ ດາວເຕະແຫ່ງຖິ່ນສະແຕມຟອດ ບຣິດ ມາຮ່ວມທີມ ໃນຊ່ວງເປີດຕະຫລາດຊື້-ຂາຍນັກເຕະເດືອນມັງກອນນີ້.
ບາຊາ ຍັງບໍ່ຍົກເລີກຄວາມຫວັງຈະຄວ້າ ວິລລຽນ ມາຫລິ້ນໃນຖິ່ນແຄມ ນູ ເຖິງວ່າພວກເຂົາລົ້ມເຫລວໃນຄວາມພະຍາຍາມ 3 ຄັ້ງຜ່ານມາກໍຕາມ ໂດຍກ່ອນໜ້ານີ້ ມີລາຍງານວ່າ: ພວກເຂົາໄດ້ມີການເຈລະຈາກັບນາຍໜ້າຂອງນັກເຕະ ແລະ ຂ້ໍສະເໜີກວ່າ 50 ລ້ານປອນ ແຕ່ຖືກປະຕິເສດກັບມາ.
ເຖິງຢ່າງໃດກໍດີ, ຫລ້າສຸດມີຂ່າວວ່າ: ບາຊາ ພ້ອມຈະແຖມ ມັລຄອມ ເຂົ້າໄປຂໍ້ສະເໜີຄັ້ງໃໝ່ ເຊິ່ງຈະເປັນນັກເຕະບວກກັບເງິນເພື່ອພະຍາຍາມຄວ້ານັກເຕະບຣາຊິລ ໄວ 30 ປີ ຈາກຖິ່ນສະແຕມຟອດ ບຣິດ ມາຮ່ວມທີມໃຫ້ໄດ້.
ມັລຄອມ ຫາກໍຍ້າຍຈາກ ບອກໂດ ສະໂມສອນແຫ່ງລີກເອິງ ມາທີມ ບາຊາ ໃນຊຳເມີ້ຜ່ານມາ ດ້ວຍຄ່າຕົວ 36,5 ລ້ານປອນ ແຕ່ພັດໄດ້ຮັບໂອກາດເປັນຕົວຈິງພຽງນັດດຽວເທົ່ານັ້ນ ແລະ ສະໂມສອນຫວັງຈະຖອນທຶນຄືນ ດ້ວຍການໃຊ້ນັກເຕະໄວ 21 ປີເປັນສ່ວນໜຶ່ງຂອງຂ້ໍສະເໜີຊື້ ວິລລຽນ.
ແຕ່ຢ່າງໃດ ໂອກາດທີ່ ບາຊາ ຈະສົມຫວັງເປັນໄປໄດ້ຍາກ ເນື່ອງຈາກ ວິລລຽນ ຖືເປັນກຳລັງສຳຄັນຂອງ ເຊລຊີ ໃນລະດູການນີ້ ແລະ ຍອດທີມແຫ່ງນະຄອນຫລວງລອນດອນບໍ່ອາດຈະຕອບຮັບຂໍ້ສະເໜີຈາກ ບາຊາ.
