ກິລາໂວວີນາມລາວ ຄວ້າ 1 ຫລຽນຄຳ 1 ຫລຽນເງິນ ຊີງແຊ້ມອາຊີ ຄັ້ງທີ 4 ທີ່ບາຫລີ ປະເທດອິນໂດເນເຊຍ

​ໃນ​ວັນ​ທີ 4 ພະຈິກ​ນີ້, ຄະນະນັກກິລາໂວວີນາມ (Vovinam) ທີມຊາດລາວ ຄວ້າ 1 ຫລຽນຄຳ 1 ຫລຽນເງິນ ການແຂ່ງຂັນໂວວີນາມ ຊີງແຊ້ມອາຊີ ຄັ້ງທີ 4 ທີ່ເກາະບາຫລີ ປະເທດອິນໂດເນເຊຍ ໂດຍໄດ້ຈາກ ທ້າວ ໄພລັດ ທຳມະວົງສາ ທັງສອງຫລຽນ ຈາກປະເພດຟ້ອນປະກອບອາວຸດກະບອງ ມີ 7 ປະເທດເຂົ້າຮ່ວມ ໄພລັດ ໄດ້ອັນດັບ 1, ທີ 2 ຫລຽນເງິນ ເປັນຂອງນັກກິລາຈາກຫວຽດນາມ ເຈົ້າຂອງກິລານີ້, ທີ 3 ຮ່ວມເປັນນັກກິລາຈາກກຳປູເຈຍ ແລະ ມຽນມາ.

ສ່ວນອີກ 1 ຫລຽນເງິນ ໄດ້ຈາກປະເພດຕໍ່ສູ້ ລຸ້ນນໍ້າໜັກ 64 ກິໂລ ມີ 6 ປະເທດເຂົ້າຮ່ວມ ຮອບຊີງເສຍໃຫ້ນັກກິລາຈາກອີຣານ ໄດ້ຫລຽນເງິນ, ຫລຽນທອງຮ່ວມນັກກິລາຈາກຈີນ ແລະ ອັບການິດສະຖານ.

ການແຂ່ງຂັນຄັ້ງນີ້ ມີນັກກິລາມາຈາກ 17 ປະເທດໃນອາຊີເຂົ້າຮ່ວມຊີງໄຊ, ລາວເຮົາສົ່ງຄະນະນັກກິລາເຂົ້າຮ່ວມ 5 ຄົນ, ໃນນີ້ເປັນນັກກິລາ 3 ຄົນ ແຂ່ງຂັນໃນວັນທີ 2-7 ພະຈິກນີ້.