ສານປະຊາຊົນນະຄອນຫລວງຕັດສີນປະຫານຊີວິດຜູ້ຄ້າຢາເສບຕິດ
ເມື່ອອາທິດຜ່ານມານີ້, ສານປະຊາຊົນນະຄອນຫລວງວຽງຈັນ, ໄດ້ຕັດສີນປະຫານຊີວິດທ້າວ ທໍ່ລີຊົງ ອາຍຸ 30 ປີຢູ່ບ້ານໜອງປອງ, ເມືອງຄຳເກີດແຂວງບໍລິຄຳໄຊ, ໃນຂໍ້ຫາຄ້າຢາເສບຕິດປະເພດເຮໂຣອິນຈໍານວນ 10 ແທ່ງນ້ຳໜັກ 3 ກິໂລ, ໂດຍຖືກເຈົ້າໜ້າທີ່ກັກຕົວໄດ້ເມື່ອທ້າຍປີ 2016 ໃນຂະນະເອົາຢາເສບຕິດດັ່ງກ່າວໄປສົ່ງໃຫ້ຜູ້ສັ່ງຊື້ຢູ່ເສັ້ນທາງຕໍ່ໜ້າມະຫາວິທະຍາໄລແຫ່ງຊາດ (ດົງໂດກ).
ຄະດີຢາເສບຕິດລາຍນີ້, ສານປະຊາຊົນເຫັນວ່າ: ເປັນການກະທຳຜິດທາງອາຍາ ແລະ ແຕະຕ້ອງຕໍ່ເສດຖະກິດຂອງຊາດ, ທັງເຮັດໃຫ້ສັງຄົມບໍ່ມີຄວາມສະຫງົບຄວາມເປັນລະບຽບຮຽບຮ້ອຍ ຈຶ່ງໄດ້ຕັດສີນປະຫານຊີວີດຜູ້ກະທໍາຜິດ ດັ່ງກ່າວ ຕາມລະບຽບກົດໝາຍ.
ຂ່າວໃຫ້ຮູ້ຕື່ມວ່າ: ເມື່ອທ້າຍເດືອນຕຸລາຜ່ານມານີ້, ຕໍາຫລວດແຂວງບໍ່ແກ້ວ ໄດ້ກັກຕົວທ້າວ ສຸຢາງ ອາຍຸ 22 ປີ ຢູ່ບ້ານຮົ່ມເຢັນ, ເມືອງຕົ້ນເຜິ້ງແຂວງບໍ່ແກ້ວ, ພ້ອມຂອງກາງເສບຕິດປະເພດເຮໂຣອິນຈຳນວນ 27 ແທ່ງນໍ້າໜັກ 10,8 ກິໂລ ຊຸກເຊື່ອງໄວ້ໃນລົດກະບະ ໝາຍເລກທະບຽນ ກມ 6219 ກຳແພງນະຄອນ, ຈຶ່ງໄດ້ຢຶດໄວ້ເປັນຫລັກຖານເພື່ອດໍາເນີນຄະດີຕາມລະບຽບກົດໝາຍ. ຕໍາຫລວດແຂວງດັ່ງກ່າວ ໄດ້ໃຫ້ຮູ້ຕື່ມວ່າ: ໃນກາງເດືອນຕຸລາຜ່ານມາ, ກໍາລັງຂອງຕົນ ໄດ້ກວດພົບຢາເສບຕິດປະເພດຢາບ້າຈໍານວນຫລາຍຊຸກເຊື່ອງໄວ້ 2 ຈຸດຄື: ຈຸດທີ 1 ແມ່ນຢູ່ດອນກາງນ້ຳຂອງລະຫວ່າງຊາຍແດນລາວ-ມຽນມາມີຢາບ້າຈຳນວນ 6 ເປົາເທົ່າກັບ 1,2 ລ້ານເມັດ ແລະ ອີກຈຸດໜຶ່ງແມ່ນໃນປ່າເຂດບ້ານສາມຫລ່ຽມຄຳເມືອງຕົ້ນເຜິ້ງ ຈໍານວນ 870.000 ເມັດ, ຈຶ່ງໄດ້ຢຶດໄວ້ເພື່ອສືບສວນຫາເຈົ້າຂອງຢາບ້າດັ່ງກ່າວ ເພື່ອເອົາຕົວມາດຳເນີນຄະດີຕາມກົດໝາຍໂດຍໄວ.
