ລາວຫາລືຍາດແຍ່ງການຊ່ວຍເຫລືອແກ້ໄຂລະເບີດບໍ່ທັນແຕກ

ກອງປະຊຸມປືກສາຫາລືກະກຽມເນື້ອໃນໃຫ້ແກ່ກອງປະຊຸມກັບຜູ້ໃຫ້ທຶນແກ້ໄຂບັນຫາລະເບີດບໍ່ທັນແຕກປະຈໍາປີ 2018 ໄດ້ມີຂຶ້ນໃນວັນທີ 1 ພະຈິກນີ້, ໂດຍການເປັນປະທານຂອງທ່ານ ຄໍາແພງ ໄຊສົມແພງ ລັດຖະມົນຕີກະຊວງ ແຮງງານ ແລະ ສະຫວັດດີການສັງຄົມ, ທັງເປັນປະທານຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ (ຄຊກລ).

ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ສະເໜີຫລາຍບັນຫາເພື່ອໃຫ້ເນື້ອໃນຂອງບັນດາແຜນງານຕ່າງໆຂອງ ຄຊກລ ມີຄວາມສົມບູນ, ກ່ອນຈະສະເໜີນໍາປະເທດຜູ້ໃຫ້ທຶນຢູ່ກອງປະຊຸມໂຕະມົນປີ 2018 ທີ່ຈະຈັດຂຶ້ນໃນທ້າຍປີ 2018 ນີ້.

ທ່ານປະທານ ຄຊກລ ໄດ້ມີຄໍາເຫັນຊີ້ນໍາວ່າ: ເພື່ອເນື້ອໃນເອກະສານຕ່າງໆມີຄວາມສົມບູນຂຶ້ນ, ຂໍໃຫ້ຫ້ອງການ ຄຊກລ ສົມທົບກັບກົມກ່ຽວຂ້ອງ ສືບຕໍ່ຄົ້ນຄ້ວາປັບປຸງຂໍ້ຕົກລົງລັດຖະມົນຕີກະຊວງແຮງງານ ແລະ ສະຫວັດດີການສັງຄົມວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ຄກລ ໃຫ້ສໍາເລັດໂດຍໄວ, ພ້ອມທັງເລັ່ງສົມທົບກັບບັນດາແຂວງທີ່ມີລະເບີດບໍ່ທັນແຕກຕົກຄ້າງ (ລບຕ) ເພື່ອປັບປຸງບຸກຄະລາກອນ ແລະ ແບບແຜນວິທີເຮັດວຽກຂອງຄະນະກໍາມະການຊີ້ນໍາວຽກງານດັ່ງກ່າວແຕ່ລະຂັ້ນໃຫ້ຈະແຈ້ງ ແລະ ມີປະສິດທິພາບ, ເພີ່ມທະວີຄວາມເອົາໃຈໃສ່ສ້າງຄວາມເຂັ້ມແຂງໃນການບໍລິຫານຄຸ້ມຄອງຂໍ້ມູນຂ່າວສານ ລບຕ ໃຫ້ລະອຽດ ເພື່ອຮັບປະກັນຄວາມຖືກຕ້ອງ ແລະ ເປັນທີ່ຍອມຮັບຂອງສາກົນ, ເຊິ່ງໃນແຕ່ລະປີມີຄວາມຕ້ອງການກວດກູ້ ລບຕ ໃນເຂດຈຸດສຸມພັດທະນາ ແລະ ດິນທີ່ປະຊາຊົນຕ້ອງການນໍາໃຊ້ຫລາຍກວ່າ 15 ພັນເຮັກຕາ ແລະ ໃນປີ 2019 ນີ້, ກະຊວງແຜນການ ແລະ ການລົງທຶນ ໄດ້ຂຶ້ນແຜນນໍາໃຊ້ງົບປະມານລັດເພື່ອກວດກູ້ ລບຕ ພຽງແຕ່ 1,4 ຕື້ກວ່າກີບ, ຊຶ່ງຖ້າພວກເຮົາສາມາດລະດົມປະເທດຜູ້ໃຫ້ທຶນໄດ້ປະກອບຊ່ວຍທຶນຫລາຍຂຶ້ນ ຫລື ມີຄວາມຮັບຜິດຊອບສະໜອງທຶນໄລຍະຍາວໄປຕື່ມອີກ 5-10 ປີຍິ່ງເປັນການດີທີ່ສຸດ ເພື່ອໃຫ້ລະເບີດຕົກຄ້າງຢູ່ລາວຄ່ອຍໆໝົດໄປເທື່ອລະກ້າວ.