ໂນວັກ ແລະ ເຟດເດີເຣີ ຜ່ານເຂົ້າສູ່ຮອບ 8 ຄົນ ເທັນນິສ ປາຣີ ມາສເຕີ 2018

ໂນວັກ ໂຢໂຄວິກ ແລະ ໂຣເຈີ ເຟດເດີເຣີ ສອງນັກເທັນນີສຊື່ດັງຈາກເຊີເບຍ ແລະ ສະວິດເຊີແລນ ສາມາດຜ່ານເຂົ້າສູ່ຮອບ 8 ຄົນສຸດທ້າຍ ເທັນນິສ ມາສເຕີ 1000 ລາຍການ ເອທີພີ ເວີທົ່ວ ປາຣີ ມາສເຕີ 2018 ທີ່ນະຄອນຫລວງປາຣີ ປະເທດຝຣັ່ງ ໃນອາທິດນີ້.

ໂດຍ ໂນວັກ ແຊ້ມ 4 ສະໄຫມ ມື 2 ຂອງລາຍການ ວ່າທີມື 1 ຂອງໂລກໃນອາທິດໜ້າ ຊະນະ ດາເມ໋ຍ ຊຳເຮີ ມືອັນດັບ 52 ຂອງໂລກຈາກ ບັອສເນຍ ເຮີເຊໂກວີນ້າ ແບບບໍ່ຄົບເຊັດ ເນື່ອງຈາກຄູ່ແຂ່ງມີອາການບາດເຈັບໃນເຊັດທີ 2, ເຊັດທີ 1 ໂນວັກ ຊະນະກ່ອນ 6-1 ມາໃນເຊັດທີ 2 ເກມທີ 4. ຂະນະທີ່ ໂນວັກ ນຳ 2-1 ເກມ, ດາເມ໋ຍ ຊຳເຮີ ເກີດອາການເຈັບຫລັງ ແຂ່ງຕໍ່ບໍ່ໄຫວ ຂໍຖອນຕົວຈາກການແຂ່ງຂັນ.

ສົ່ງໃຫ້ ໂນວັກ ເຂົ້າຮອບ 8 ຄົນສຸດທ້າຍ ໄປພົບກັບ ມາຣິນ ຊີລິກ ມື 5 ຂອງລາຍການຈາກໂຄຣເອເຊຍ (ໂຄຣອາຊີ) ທີ່ຜ່ານ ຈີກໍຣ ດີມີຕຣັອຟ ມື 9 ຂອງລາຍການຈາກເບົາເກເຣຍ (ບຸນກາຣີ) 2-0 ເຊັດ 7-6(7/5), 6-4. ຂະນະທີ່ ໂຣເຈີ ເຟດເດີເຣີ ມື 3 ຂອງລາຍການ ແຊ້ມປີ 2011 ຈາກສະວິດເຊີແລນ ຫາກໍໄດ້ແຊ້ມຢູ່ບ້ານເກີດໃນອາທິດຜ່ານມາ ເອົາຊະນະ ຟາບີໂອ ຟ໋ອກນີນີ້ ມື 13 ຂອງລາຍການຈາກອີຕາລີ 2-0 ເຊັດ 6-4, 6-3.

ຮອບ 8 ຄົນສຸດທ້າຍ ໄປພົບກັບ ເຄອິ ນິຊີໂກຣິ ມື 10 ຂອງລາຍການຈາກ ຍີ່ປຸ່ນ ທີ່ຜ່ານ ເຄວິນ ແອນເດີສັນ ມື 7 ຈາກອາຟຣິກາໃຕ້ 2-0 ເຊັດ 64, 64. ສ່ວນແຊ້ມເກົ່າ ແຈັກຊັອກ ຈາກອາເມລິກາ, ອາເລັກຊານເດີ ຊະເວເຣັຟ ແລະ ໂດມີນິກທິມ ກໍຜ່ານໄດ້.