ຜູ້ຊ່ວຍຄູຝຶກເຊລຊີ ເຍາະເຍີ້ຍ ມູຣິນໂຢ ຖືກປັບໄຫມ 6.000 ປອນ

ສະມາຄົມບານເຕະອັງກິດ ຫລື FA ປັບໄຫມ ມາຣໂກ້ ອ່ຽນນີ້ (Marco Ianni) ຜູ້ຊ່ວຍຄູຝຶກສະໂມສອນ ເຊລຊີ 6.000 ປອນ ຈາກກໍລະນີ ສະແດງຄວາມດີໃຈເຍາະເຍີ້ຍ ໂມເຊ ມູຣິນໂຢ ຜູ້ຈັດການທີມແມນເຊັສເຕີ ຢູໄນເຕັດ ໃນເກມພຣີເມຍລີກ ນັດທີ່ ເຊລຊີ ເປີດບ້ານໄລ່ຕີສະເໝີ ແມນຢູ 2-2 ໃນໄລຍະຕໍ່ເວລາບາດເຈັບ ນາທີ 96 ເມື່ອວັນທີ 20 ຕຸລາຜ່ານມາ.

ສະມາຄົມບານເຕະອັງກິດ ກ່າວວ່າ: “ການກະທຳຂອງ ມາຣໂກ້ ອ່ຽນນີ້ ບໍ່ເໝາະສົມ, ລັກສະນະເປັນການເຍາະເຍີ້ຍຄູ່ແຂ່ງ ຊຶ່ງຜິດຕໍ່ມາລະຍາດຂອງຄູຝຶກ ແລະ ນັກກີລາ”.

ຂະນະທີ່ ໂມເຊ ມູຣິນໂຢ ກ່າວວ່າ: ຫລັງເຫດການດັ່ງກ່າວ ມາຣໂກ້ ອ່ຽນນີ້ ໄດ້ຂໍໂທດຕົນເອງແລ້ວ.