ສຕລ ຈັບແບ່ງສາຍບານເຕະ U15 ຊີງຂັນຂອງຕົນ

ໃນວັນທີ 31 ຕຸລາຜ່ານມາ, ສະຫະພັນບານເຕະແຫ່ງຊາດລາວ ໄດ້ມີການຈັບສະຫລາກແບ່ງກຸ່ມການແຂ່ງຂັນບານເຕະ ຮຸ່ນເຍົາວະຊົນອາຍຸບໍ່ເກີນ 15 ປີ (U15) ຊີງຂັນສະຫະພັນກິລາບານເຕະແຫ່ງຊາດລາວ ປະຈຳປີ 2018 ທີ່ຈະເລີ່ມຂຶ້ນໃນທ້າຍອາທິດນີ້.

ການແຂ່ງຂັນບານເຕະຄັ້ງນີ້ ມີທັງໝົດ 12 ທີມເຂົ້າຮ່ວມ ແບ່ງອອກເປັນ 2 ກຸ່ມ, ຜ່ານການຈັບສະຫລາກຜົນປາກົດວ່າ: ກຸ່ມ A ມີສະໂມສອນເອັສຣາ ເອັຟຊີ, ສະໂມສອນແບລາວ ເອັຟຊີ, ສະໂມສອນ ປກສ ເອັຟຊີ, ນະຄອນຫລວງວຽງຈັນ, ສະໂມສອນເຄພີເອັດ ເອັຟຊີ ແລະ ສະໂມສອນດີເຄ ເອັຟຊີ. ສ່ວນກຸ່ມ B ມີສະໂມສອນອາຄາເດມີ ຊ້າງ 12 ເອັຟຊີ, ສະໂມສອນມີໂດ ອະຄາເດມີ, ສະໂມສອນທຣີນີຕີ ເອັຟຊີ, ສະໂມສອນລ໋ອບສະເຕດ້ຽມ ເອັຟຊີ, ສະໂມສອນລາວໂຕໂຢຕ້າ ເອັຟຊີ ແລະ ສະໂມສອນມາດເຕີເຊເວັນ ເອັຟຊີ ເຊິ່ງການແຂ່ງຂັນໃນຄັ້ງນີ້ ແມ່ນຈະເລີ່ມແຂ່ງຂັນນັບແຕ່ວັນທີ 4 ພະຈິກນີ້ເປັນຕົ້ນໄປ ທີ່ສະໜາມຫຍ້າທຽມສະຫະພັນກິລາບານເຕະແຫ່ງຊາດລາວ. ສ່ວນເງິນລາງວັນ ອັນດັບ 1 ຈະໄດ້ຮັບຫລຽນຊະນະເລີດ 35 ຫລຽນ ພ້ອມຂັນ 1 ໜ່ວຍ ແລະ ເງິນສົດ 5 ລ້ານກີບ, ອັນດັບ 2 ຈະໄດ້ຮັບຫລຽນລາງວັນ ແລະ ເງິນສົດ 4 ລ້ານກີບ ແລະ ອັນດັບ 3 ຈະໄດ້ຮັບຫລຽນລາງ ແລະ ເງິນສົດ 3 ລ້ານກີບ.