ສຳເລັດການແຂ່ງຂັນຍິງປືນ ຊີງຂັນນາຍົກ ຄັ້ງທີ I
ທ້າຍອາທິດຜ່ານມາ ທີ່ສະໜາມຍິງປຶນ 5 ເມສາ ໄດ້ມີພິທີປິດການແຂ່ງຂັນ ຍິງປຶນໄອພີເອັດ ຊີງຂັນນາຍົກລັດຖະມົນຕີແຫ່ງ ສປປ ລາວ ໂດຍມີທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທ່ານ ພົນຕີ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ແລະ ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະນຳ, ຄູເຝິກ ແລະ ນັກກິລາ 100 ກວ່າຄົນ ທີ່ມາຈາກ 6 ປະເທດ.
ໂອກາດນີ້, ທ່ານ ພົນຕີ ສິນທະວົງ ໄຊຍະກອນປະທານສະຫະພັນກິລາຍິງປືນແຫ່ງຊາດ ກ່າວວ່າ: ການແຂ່ງຂັນຍິງປືນ ໄອພີເອັດຊີ ລະດັບສາກົນ ເລໂວ3 ຊີງຂັນທ່ານນາຍົກລັດຖະມົນຕີແຫ່ງ ສປປ ລາວ ຄັ້ງທີ I ປະຈຳປີ 2018 ທີ່ ສປປ ລາວ ເປັນເຈົ້າພາບ ລະຫວ່າງວັນທີ 26-28 ຕຸລາ 2018 ໄດ້ຈັດຂຶ້ນທີ່ສະໜາມກິລາຍິງປືນ 5 ເມສາ ເມືອງໄຊເຊດຖາ ນະຄອນຫລວງວຽງຈັນ ມີການຊີງໄຊທັງໝົດ 6 ລາຍການຄື: ປືນສະແຕນດາດ, ປືນໂປດັກຊັນ, ປືນໂປດັກຊັນ ອັອບຕິກ, ປືນໂອເພັນ, ປືນຣີໂວເວີ ແລະ ປືນຄລາສສິກ ແຂ່ງຂັນ 15 ສະໜາມ ໂດຍມີນັກກິລາ 128 ຄົນ ທີ່ມາຈາກ 6 ປະເທດຄື: ສປປ ລາວ ເຈົ້າພາບ, ກຳປູເຈຍ, ໄທ, ສປ ຈີນ, ເຂດປົກຄອງພິເສດຮົງກົງ ແລະ ໂປໂລຍ ເຂົ້າຮ່ວມຊີງໄຊຄວາມເປັນໜຶ່ງ ໃນນີ້ສະເພາະ ສປປ ລາວເຮົາ ໄດ້ສົ່ງນັກກິລາເຂົ້າຮ່ວມແຂ່ງຂັນທັງໝົດ 37 ຄົນ ຍິງ 1 ຄົນ ລົງແຂ່ງຂັນໃນ 4 ລາຍການຄື: ປະເພດປືນສະແຕນດາດ, ປືນໂອເພັນ, ປືນໂປຣດັກຊັນ ແລະ ປະເພດປືນໂປຣດັກຊັນ ອັອບຕິກ. ນອກຈາກນັ້ນ, ຍັງມີການຈັດແຂ່ງຂັນຍິງປືນ ສະເພາະນັກກິລາພາຍໃນເຮົາຕື່ມອີກ ເພື່ອເປັນການພັດທະນາວົງການກິລາຍິງປືນລາວໃຫ້ກ້າວສູ່ລະດັບສາກົນ.
ຜ່ານການແຂ່ງຂັນຜົນປາກົດວ່າ: ທີມຊາດໄທ ສາມາດຍາດໄດ້ 13 ຫລຽນຄໍາ, 7 ຫລຽນເງິນ, 4 ຫລຽນທອງ; ລາວໄດ້ 4 ຫລຽນຄໍາ, 1 ຫລຽນເງິນ, 2 ຫລຽນທອງ; ຈີນຍາດໄດ້ 2 ຫລຽນຄໍາ; ຮົງກົງ ຍາດໄດ້ 1 ຫລຽນເງິນ.
ສຳລັບຜົນການແຂ່ງຂັນຍິງປືນ ໄອພີເອັດຊີ ພາຍໃນ ປະເພດປືນໂອເພັນ ອັນດັບ 1 ພູທອນ ກໍລະສັກ, ອັນດັບ 2 ແສງປະເສີດ ພັນນາສີ ແລະ ອັນດັບ 3 ພັນທະຈິດ ອິນທິລາດ; ປະເພດປືນສະແຕນດາດ ອັນດັບ 1 ຕົ້ນຄຳ ເມືອງມະນີ, ອັນດັບ 2 ພະນະລິນ ສຸວັນນະວົງ ແລະ ອັນດັບ 3 ອະລຸນຊະນະ ພິມພິສານ; ປະເພດປືນໂປຣດັກຊັນ ອັນດັບ 1 ຫົງພະຈັນ ດາຣາວົງ, ອັນດັບ 2 ສົມຈັນ ໄຊສົມມີ ແລະ ອັນດັບ 3 ເພັດນະຄອນ ພະມີສິດ; ປະເພດປືນໂປຣດັກຊັນ ອັອບຕິກ ອັນດັບ 1 ສຸນັນ ວັດທະນະບູນ, ອັນດັບ 2 ອາໂນໄທ ເມືອງມະນີ ແລະ ອັນດັບ 3 ສິງຄຳ ສີປະເສີດ.
