ລາວ-ເຢຍລະມັນຮັດແໜ້ນການຮ່ວມມືວຽກງານໄອຍະການ ແລະ ສານ

ໂດຍປະຕິບັດຕາມແຜນການຮ່ວມມືລະຫວ່າງອົງການໄອຍະການປະຊາຊົນສູງສຸດ ແລະ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ໂດຍ ໄດ້ຮັບທຶນສະໜັບສະໜູນຈາກມູນນິທິຮັນໄຊເດັນປະເທດເຢຍລະມັນ, ຄະນະຜູ້ແທນລາວນໍາໂດຍທ່ານ ຄໍາສານ ສຸວົງ ຫົວໜ້າອົງການໄອຍະການປະຊາຊົນສູງສຸດໄດ້ໄປຢ້ຽມຢາມ ແລະ ຖອດຖອນບົດຮຽນວຽກງານໄອຍະການ ແລະ ສານປົກຄອງຢູ່ປະເທດເຢຍລະມັນໃນລະຫວ່າງທ້າຍເດືອນຕຸລານີ້ ແລະ ໄດ້ພົບປະກັບອົງການໄອຍະການສູງສຸດສະຫະພັນເຢຍລະມັນ, ສານປົກຄອງ, ສານປົກຄອງສູງລັດບາວາເລຍ, ສານປົກຄອງສູງສຸດສະຫະພັນເຢຍລະມັນ, ອົງ

ການປົກຄອງທ້ອງຖິ່ນ, ທະນາຍຄວາມຄະດີປົກຄອງ, ຄະນະກົດໝາຍພາກລັດ ແລະ ກົດໝາຍປົກຄອງ (ກົດໝາຍສິ່ງແວດລ້ອມ) ຂອງມະຫາວິທະຍາໄລແລບຊິກ (ມະຫາວິທະຍາໄລຄານມາກ ຫລື ກາກມາກ ກ່ອນການລວມປະເທດເຢຍລະມັນ), ຄະນະກໍາມາທິການກົດໝາຍຂອງສະພາແຫ່ງຊາດ, ກະຊວງການຮ່ວມມືທາງດ້ານເສດຖະກິດ ແລະ ການພັດທະນາ ທີ່ເປັນຜູ້ໃຫ້ທຶນມູນນິທິຮັນໄຊເດັນ ແລະ ໂຄງການພັດທະນາໃນ 80 ປະເທດທົ່ວໂລກ, ຊຶ່ງໃນນັ້ນ ລວມທັງ ສປປ ລາວ, ອົງການຊ່ວຍເຫລືອດ້ານສິ່ງແວດລ້ອມ ແລະ ມູນນິທິຮັນໄຊເດັນກ່ຽວກັບລະບົບການປົກຄອງ ແລະ ຫລັກການພື້ນຖານຂອງການປົກຄອງ ຢູ່ປະເທດເຢຍລະມັນ, ລະບົບກົດໝາຍ, ການອອກກົດໝາຍ, ການປົກຄອງ, ຄະດີປົກຄອງ, ລະບົບສານ, ວຽກງານໄອຍະການ ແລະ ການກໍ່ສ້າງນິຕິກຳ. ການແລກປ່ຽນບົດຮຽນຄັ້ງນີ້, ມີຄວາມໝາຍສຳຄັນຫລາຍ ເພື່ອນໍາໃຊ້ເປັນຂໍ້ມູນໃນການຄົ້ນຄວ້າ, ການພັດທະນາວຽກງານໄອຍະການປະຊາຊົນ, ວຽກງານສິ່ງແວດລ້ອມ, ການປົກຄອງດ້ວຍກົດໝາຍ, ການສ້າງ ແລະ ປັບປຸງກົດໝາຍປົກຄອງ, ການສ້າງສານປົກຄອງ ແລະ ວຽກງານອື່ນໆຂອງອົງການໄອຍະການປະຊາຊົນຂອງປະເທດເຮົາໃຫ້ມີປະສິດທິຜົນ.