ມອບ-ຮັບ ສູນຂໍ້ມູນດິຈິຕານ ທີ່ນຳໃຊ້ພະລັງງານຢ່າງມີປະສິດທິພາບ
ພິທີມອບ-ຮັບ ສູນຂໍ້ມູນດິຈິຕານ ທີ່ນຳໃຊ້ພະລັງງານຢ່າງມີປະສິດທິພາບຂອງ ສປປ ລາວ (LEED) ລະຫວ່າງອົງການພັດທະນາພະລັງງານໃໝ່ ແລະ ເຕັກໂນໂລຊີອຸດສາຫະກຳ (NEDO) ແລະ ກະຊວງວິທະຍາສາດ ແລະ ເຕັກໂນໂລຊີ (ກວຕ) ໄດ້ຈັດຂຶ້ນໃນວັນທີ 26 ຕຸລານີ້ ທີ່ນະຄອນຫຼວງວຽງຈັນ, ລະຫວ່າງ ທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕານ ແລະ ທ່ານ ສຸມິຍະ ຄິສະນຸກິ ຫົວໜ້າກົມ ອົງການ NEDO, ມີທ່ານ ທາເກຊິ ຮິກິຮາຣະ ເອກອັກຄະລະຊະທູດຢີ່ປຸ່ນປະຈຳລາວ ແລະພາກສ່ວນເຂົ້າຮ່ວມຢ່າງພ້ອມພຽງ.
ສູນຂໍ້ມູນດັ່ງກ່າວເປັນການຊ່ວຍເຫຼືອລ້າຈາກລັດຖະບານຍີ່ປຸ່ນ ດ້ວຍມູນຄ່າ 20 ລ້ານກວ່າໂດລາສະຫະລັດ ແລະ ມີການປະກອບທຶນສົມທົບຈຳນວນໜຶ່ງຂອງລັດຖະບານ ເພື່ອສ້າງເງື່ອນໄຂໃຫ້ ສປປ ລາວ ໄດ້ນຳໃຊ້ເຕັກໂນໂລຊີທີ່ທັນສະໄໝ ຕາມແນວທາງຫັນເປັນອຸດສະຫະກຳ ແລະ ທັນສະໄໝ, ໂດຍສະເພາະ ເພື່ອພັດທະນາພື້ນຖານໂຄງລ່າງສູນຂໍ້ມູນດິຈິຕານແຫ່ງຊາດ (Data Center) ທີ່ມີເຕັກໂນໂລຊີທັນສະໄໝ, ມີຄວາມປອດໄພແລະໄດ້ມາດຕະຖານສາກົນ.
ພ້ອມດຽວກັນນັ້ນ ກໍເປັນການສົ່ງເສີມການພັດທະນາອຸດສະຫະກຳເຕັກໂນໂລຊີດິຈິຕ໋ອນ ແບບຍືນຍົງ ແລະ ເປັນມິດຕໍ່ສິ່ງແວດລ້ອມ, ຫລຸດຜ່ອນທາດອາຍກາກໂບນີກCO2 ເຊີ່ງເປັນໂຄງການຄັ້ງທຳອີດຂອງ ສປປ ລາວ ນອນຢູ່ໃນຂອບ JCM, ແນໃສ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງລາວໃຫ້ເຕີບໃຫຍ່ຂະຫຍາຍ ຕົວຢ່າງບໍ່ຢຸດຢັ້ງ.
