ອາເມລິກາຫ້າມນຳເຂົ້ານ້ຳປາໄທ 4 ຍີ່ຫໍ້ ແທ້ ຫລື ບໍ່ ?
ສື່ໄທຫລາຍແຫ່ງລາຍງານວ່າ: ອາເມລິກາ ສັ່ງຫ້າມນຳເຂົ້ານ້ຳປາຈາກປະເທດໄທ ແລະ ບາງສື່ຍັງໄດ້ອ້າງວ່າ: ເປັນຍ້ອນເຫດຜົນດ້ານ “ຄວາມປອດໄພຂອງນ້ຳປາ”. ສຳນັກງານຄະນະກຳມະການອາຫານ ແລະ ຢາຂອງໄທ ຢືນຢັນກະບວນການຜະລິດນ້ຳປາໄທເປັນໄປຕາມມາດຕະຖານ.
ເລື່ອງນີ້ສຳນັກຂ່າວ BBC ໄດ້ກວດສອບເວັບໄຊຂອງອົງການອາຫານ ແລະ ຢາຂອງອາເມລິກາ (U.S. Food and Drug Administration—FDA) ພົບວ່າ: ໄດ້ມີການເຜີຍແຜ່ບັນຊີແຈ້ງເຕືອນສິນຄ້າທີ່ຖືກກັກກັ້ນການນຳເຂົ້າ ໝາຍເລກການແຈ້ງເຕືອນ 16-120 ໃນວັນທີ 16 ຕຸລາ 2018 ໂດຍໃນບັນຊີແຈ້ງເຕືອນດັ່ງກ່າວເປັນການແຈ້ງເຕືອນສິນຄ້ານຳເຂົ້າປະເພດປາ ແລະ ຜະລິດຕະພັນທີ່ເຮັດຈາກປາ.
ໃນສ່ວນຜະລິດຕະພັນທີ່ມາຈາກປະເທດໄທທີ່ຖືກຂຶ້ນບັນຊີການແຈ້ງເຕືອນໝາຍເລກ 16-120 ມາຈາກ 11 ບໍລິສັດ ລວມທັງ 4 ບໍລິສັດທີ່ສົ່ງອອກນ້ຳປາ ໂດຍບໍລິສັດໂຮງງານນ້ຳປາໄທ (ກາປາມຶກ) ຈຳກັດ ເປັນບໍລິສັດຫລ້າສຸດທີ່ຖືກຂຶ້ນບັນຊີການແຈ້ງເຕືອນໃນວັນທີ 3 ພຶດສະພາ 2018 ໂດຍໃນໝາຍເຫດລະບຸວ່າ: “ລະເມີດ HACCP”, ສ່ວນການຂຶ້ນບັນຊີແຈ້ງເຕືອນ ບໍລິສັດທີ່ສົ່ງອອກນ້ຳປາລາຍອື່ນໆເກີດຂຶ້ນມາຫລາຍປີແລ້ວເຊັ່ນ: ບໍລິສັດ ທັ່ງຊັງຮະ ຈຳກັດ ເຊິ່ງຜະລິດນ້ຳປາກາທິບພະລົດ ໃນວັນທີ 20 ພຶດສະພາ 2014, ບໍລິສັດ ທັ່ງງ່ວນຮະ ຈຳກັດ ໃນວັນທີ 21 ເມສາ 2014, ບໍລິສັດ ໄຊງ່ອນ ອິນເຕີເນຊັນແນວ (2004) ໃນວັນທີ 13 ມີນາ 2009 ເປັນຕົ້ນ.
ທ່ານ ອາດຸນ ໂຊຕິນິສາກອນ ອະທິບໍດີກົມການຄ້າຕ່າງປະເທດ ກ່າວວ່າ: ນ້ຳປາທີ່ຖືກແຈ້ງເຕືອນຈາກ USFDA ຖືກກັກກັ້ນ ບໍ່ສາມາດນຳເຂົ້າໄດ້ເປັນການຊົ່ວຄາວ ຈົນກວ່າຈະມີການນຳເອົາເອກະສານຊີ້ແຈງໃຫ້ເຫັນເຖິງຂະບວນການຜະລິດທີ່ປອດໄພມາສະແດງຕໍ່ USFDA.
