ທ່ານຮອງນາຍົກ ສອນໄຊ ສີພັນດອນ ສຳເລັດການຢ້ຽມຢາມຍີ່ປຸ່ນຢ່າງເປັນທາງການ.

    ໂດຍຕອບສະໜອງຕາມຄຳເຊີນຂອງ ກະຊວງການຕ່າງປະເທດຍີ່ປຸ່ນ, ພະນະທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ ພ້ອມຄະນະ ໄດ້ເດີນທາງໄປຢ້ຽມຢາມປະ ເທດຍີ່ປຸ່ນຢ່າງເປັນທາງການ ແຕ່ວັນທີ 5-10 ມີນາ 2017. ໃນໂອກາດຢ້ຽມຢາມ ໄດ້ພົບປະກັບທ່ານ ໂຢຊິຮິເດະ ຊຸກະ (Yoshihide SUGA) ຫົວໜ້າເລຂາທິການລັດຖະບານຍີ່ປຸ່ນ ເຊິ່ງທັງສອງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ພາຍໃຕ້ການເປັນຄູ່ຮ່ວມມືຍຸດທະສາດທີ່ນັບມື້ຂະຫຍາຍຕົວ ແລະ ແຕກດອກອອກຜົນຢ່າງບໍ່ຢຸດຢັ້ງ ນັບແຕ່ສອງປະເທດໄດ້ສ້າງຕັ້ງສາຍພົວພັນການທູດນຳກັນ ໃນວັນທີ 5 ມີນາ 1955 ເປັນຕົ້ນມາ. ຜູ້ນຳຂອງສອງປະເທດໄດ້ມີການແລກປ່ຽນການຢ້ຽມຢາມຢ່າງເປັນປະຈຳ ເຊິ່ງຫລັງສຸດໃນເດືອນກັນຍາ 2016 ຜ່ານມາ, ພະນະທ່ານ ຊິນໂຊະ ອາເບະ ນາຍົກລັດຖະມົນຕີຍີ່ປຸ່ນ ໄດ້ມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28 ແລະ 29, ສ່ວນພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ໄປຢ້ຽມຢາມຍີ່ປຸ່ນ ແລະ ເຂົ້າຮ່ວມກອງປະຊຸມສຸດຍອດ G7 ເປີດກວ້າງ ຢູ່ແຂວງມີເອະ ໃນເດືອນພຶດສະພາ 2016. ນັກທຸລະກິດຍີ່ປຸ່ນໄດ້ໃຫ້ຄວາມສົນໃຈເຂົ້າມາລົງທຶນຢູ່ ສປປ ລາວ ເພີ່ມຂຶ້ນ ເຊິ່ງປັດຈຸບັນການລົງທຶນຂອງຍີ່ປຸ່ນຈັດຢູ່ອັນດັບ 7 ຂອງການລົງທຶນຕ່າງປະເທດຢູ່ ສປປ ລາວ ໂດຍມີ 89 ໂຄງການ ລວມມູນຄ່າການລົງທຶນຫລາຍກວ່າ 438 ລ້ານໂດລາສະຫະລັດ ເຊິ່ງໄດ້ສ້າງວຽກເຮັດງານທຳ ແລະ ລາຍຮັບໃຫ້ແກ່ປະຊາຊົນລາວ. ຍີ່ປຸ່ນເປັນປະເທດທີ່ໃຫ້ການຊ່ວຍເຫລືອທາງການເພື່ອການພັດທະນາ (ODA) ແກ່ ສປປ ລາວ ຢູ່ໃນອັນດັບຕົ້ນຂອງບັນດາປະເທດທີ່ໃຫ້ການຊ່ວຍເຫລືອລາຍໃຫຍ່ແກ່ ສປປ ລາວ ຄືໃນປີ 2016 ລາວໄດ້ຮັບການຊ່ວຍເຫລືອຈາກຍີ່ປຸ່ນ ຈຳນວນ 5 ໂຄງການ ລວມມູນຄ່າທັງໝົດ 13 ຕື້ກວ່າເຢນ (ປະມານ 122 ລ້ານໂດລາສະຫະລັດ) ເຊິ່ງເປັນການປະກອບສ່ວນອັນສຳຄັນເຂົ້າໃນແຜນການພັດທະນາເສດຖະກິດ-ສັງຄົມຂອງ ສປປ ລາວ. ໃດານນແລກປ່ຽນລະຫວ່າງປະຊາຊົນກັບປະຊາຊົນຂອງສອງປະເທດ, ສອງຝ່າຍໄດ້ສະແດງຄວາມຍິນດີຕໍ່ແຜນການເປີດສາຍການບິນໂດຍກົງລະຫວ່າງ ສປປ ລາວ ແລະ ຍີ່ປຸ່ນ ເຊິ່ງປັດຈຸບັນພາກສ່ວນກ່ຽວຂ້ອງສອງຝ່າຍກຳລັງປຶກສາຫາລື ເພື່ອຈັດຕັ້ງປະຕິບັດຂັ້ນຕອນການບິນ. ນອກຈາກນັ້ນ ທ່ານຮອງນາຍົກ ແລະ ຫົວໜ້າເລຂາທິການລັດຖະບານຍີ່ປຸ່ນ ຍັງໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນຮ່ວມກັນໃນຫລາຍໆບັນຫາ ທັງໃນຂອບການຮ່ວມມືສອງຝ່າຍ ແລະ ຫລາຍຝ່າຍ, ບັນຫາພາກພື້ນ ແລະ ສາກົນທີ່ສອງຝ່າຍມີຄວາມສົນໃຈ. ໃນໂອກາດດັ່ງກ່າວ, ທ່ານຮອງນາຍົກໄດ້ຕາງໜ້າໃຫ້ແກ່ລັດຖະບານ ແລະ ປະຊາຊົນລາວ ສະແດງຄວາມຂອບໃຈໄປຍັງລັດຖະບານ ກໍຄືປະຊາຊົນຍີ່ປຸ່ນທີ່ໄດ້ໃຫ້ການຊ່ວຍເຫລືອ ສປປ ລາວ ຕະຫລອດມາ ພິເສດການເປັນປະທານໝູນວຽນອາຊຽນ ຄັ້ງທີ 2 ຂອງ ສປປ ລາວ ໃນປີ 2016 ທີ່ປະສົບຜົນສຳເລັດຢ່າງຈົບງາມ.

ໃນລະຫວ່າງການເຄື່ອນໄຫວຢ້ຽມຢາມຍີ່ປຸ່ນ, ທ່ານຮອງນາຍົກ ຍັງໄດ້ພົບປະກັບທ່ານ ຟູມີໂອະ ກິຊິດະ (Fumio Kishida) ລັດຖະມົນຕີກະຊວງການຕ່າງປະເທດຍີ່ປຸ່ນ, ທ່ານ ຄີໂຢຊິ ໂອດະວະຣະ ຮອງລັດຖະມົນຕີຝ່າຍລັດຖະສະພາ ກະຊວງການຕ່າງປະເທດຍີ່ປຸ່ນ ທີ່ໄດ້ຈັດງານລ້ຽງອາຫານຄໍ່າຕ້ອນຮັບທ່ານຮອງນາຍົກ ແລະ ປະທານສະມາຄົມມິດຕະພາບ ຍີ່ປຸ່ນ-ລາວ ຝ່າຍລັດຖະສະພາ. ພ້ອມນັ້ນ ທ່ານຮອງນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ ແລະ ກ່າວຄຳປາໄສຕໍ່ກອງປະຊຸມສຳມະນາ ກ່ຽວກັບການສົ່ງເສີມການລົງທຶນ, ການຄ້າ ແລະ ທ່ອງທ່ຽວຢູ່ ສປປ ລາວ ຈັດຮ່ວມໂດຍສູນອາຊຽນ-ຍີ່ປຸ່ນ ແລະ ອົງການການຄ້າພາຍນອກຍີ່ປຸ່ນ (JETRO) ພາຍໃຕ້ການສະໜັບສະໜູນຂອງກະຊວງການຕ່າງປະເທດຍີ່ປຸ່ນ ໂດຍມີຜູ້ເຂົ້າຮ່ວມປະມານ 150 ຄົນ, ຮັບການເຂົ້າຢ້ຽມຂໍ່ານັບຂອງປະທານບໍລິສັດຟ້າຟ້າ Kansai, ຮອງປະທານອົງການ JICA, ປະທານສະມາຄົມມິດຕະພາບ ຍີ່ປຸ່ນ-ລາວ, ປະທານບໍລິສັດສະໜາມບິນສາກົນ ນາຣິຕະ, ຮອງປະທານບໍລິສັດການບິນຍີ່ປຸ່ນ (JAL), ປະທານບໍລິສັດກຸ່ມການບິນຍີ່ປຸ່ນ (ANA), ປະທານກຸ່ມບໍລິສັດພະລັງງານໄຟຟ້າໂຕກຽວ (TEPCO) ແລະ ປະທານບໍລິສັດ Prozza ທີ່ຜະລິດລົດຕຸກໆແລ່ນດ້ວຍພະລັງງານໄຟຟ້າ ໂດຍບໍລິສັດດັ່ງກ່າວໄດ້ນຳເອົາລົດຕຸກໆດັ່ງກ່າວມາທົດລອງໃຊ້ຢູ່ແຂວງຫລວງພະບາງ ແລະ ຈຳປາສັກ. ນອກຈາກນັ້ນ ທ່ານຮອງນາຍົກ ພ້ອມຄະນະ ຍັງໄດ້ໄປຢ້ຽມຢາມສະຖານທູດລາວທີ່ໂຕກຽວ ແລະ ໄດ້ພົບປະໂອ້ລົມກັບນັກສຶກສາລາວ, ຄົນເຊື້ອຊາດລາວທີ່ຕັ້ງຖິ່ນຖານຢູ່ຍີ່ປຸ່ນ ແລະ ໃຫ້ກຽດເຂົ້າຮ່ວມງານລ້ຽງຕ້ອນຮັບ ຈັດເປັນກຽດໂດຍເອກອັກຄະລັດຖະທູດແຫ່ງ ສປປ ລາວ ປະຈຳຍີ່ປຸ່ນ ຢູ່ສຳນັກງານສະຖານທູດ.

ນອກຈາກເຄື່ອນໄຫວຢູ່ໂຕກຽວແລ້ວ, ທ່ານຮອງນາຍົກລັດຖະມົນຕີ ພ້ອມຄະນະ ໄດ້ເດີນທາງໄປແຂວງໂອກິນາວາ ແລະ ຟຸກຸໂອກະ ເພື່ອຢ້ຽມຢາມ ແລະ ຖອດຖອນບົດຮຽນກ່ຽວກັບການດຳເນີນທຸລະກິດຂອງບໍລິສັດຂະໜາດນ້ອຍ ແລະ ກາງ ທີ່ມີບົດບາດສຳຄັນໃນການຂັບເຄື່ອນເສດຖະກິດແຫ່ງຊາດຍີ່ປຸ່ນ ແລະ ເປັນສະຖານທີ່ທາງປະຫວັດສາດ ທີ່ດຳເນີນທຸລະກິດການທ່ອງທ່ຽວປະສົບຜົນສຳເລັດດີ. ໃນໂອກາດດັ່ງກ່າວ, ທ່ານຮອງນາຍົກ ໄດ້ພົບປະກັບສະມາຄົມມິດຕະພາບ ໂອກິນາວາ-ລາວ ແລະ ຟຸກຸໂອກະ-ລາວ ທີ່ຈັດງານລ້ຽງອາຫານຄໍ່າຕ້ອນຮັບທ່ານຮອງນາຍົກຢູ່ໃນສອງແຂວງດັ່ງກ່າວ. ຕະຫລອດໄລຍະຂອງການຢ້ຽມຢາມຍີ່ປຸ່ນ, ທ່ານຮອງນາຍົກລັດຖະມົນຕີ ແລະ ຄະນະ ໄດ້ຮັບການຕ້ອນຮັບຢ່າງອົບອຸ່ນຈາກລັດຖະບານ ກໍຄືພາກທຸລະກິດຍີ່ປຸ່ນ ລວມທັງບັນດາສະມາຄົມມິດຕະພາບ ຍີ່ປຸ່ນ-ລາວ ກໍໄດ້ໃຫ້ການຕ້ອນຮັບ ແລະ ສະໜັບສະໜູນຄະນະຜູ້ແທນທ່ານຮອງນາຍົກ ໃນການຢ້ຽມຢາມຄັ້ງນີ້ເປັນຢ່າງດີ. ໃນຕອນເຊົ້າຂອງວັນທີ 10 ມີນາ 2017, ທ່ານຮອງນາຍົກ ແລະ ຄະນະ ໄດ້ເດີນທາງກັບຄືນປະເທດດ້ວຍຄວາມສະຫວັດດີພາບ.