ຊາວພຸດລາວຮ່ວມໃສ່ບາດບຸນອອກພັນສາປະວໍລະນາ ພສ 2561 ດ້ວຍບັນຍາກາດຄືກຄື້ນ
ເຊົ້າວັນທີ 24 ຕຸລານີ້, ຊຶ່ງກົງກັບມື້ຂຶ້ນ 15 ຄໍ່າເດືອນ 11 ພສ 2561 ເປັນວັນບຸນອອກພັນສາປະວໍລະນາ, ໂດຍຊາວພຸດທະສາສະນິກະຊົນລາວໃນທົ່ວປະເທດ ຕ່າງກໍໄດ້ພ້ອມພາກັນໄປທຳບຸນໃສ່ບາດຖວາຍສັງຄະທານແດ່ພະສົງສຳມະເນນຢູ່ຕາມວັດວາອາຮາມຕ່າງໆດ້ວຍບັນຍາກາດຄຶກຄື້ນ ແລະ ຮັບຟັງທຳມະເທດສະໜາ ເພື່ອຍຶດຖືເປັນຫລັກທຳພື້ນຖານໃນການດຳລົງຊີວິດທີ່ຖືກຕ້ອງ ແລະ ປົກປັກຮັກສາຮີດຄອງປະເພນີອັນດີງາມດັ່ງກ່າວໃຫ້ຄົງຢູ່ຄູ່ຊາດລາວຕະຫລອດໄປ ແລະ ໃນຕອນບ່າຍມື້ດຽວກັນ ກໍໄດ້ມີການແຂ່ງຂັນຊ່ວງເຮືອເພດຍິງ ແລະ ຕອນຄໍ່າກໍມີການວຽນທຽນຕາມວັດວາອາຮາມຕ່າງໆ, ພ້ອມດ້ວຍປະເພນີລອຍກະໂທງ, ໄຫລເຮືອໄຟທີ່ສວຍງາມຕາມສາຍນໍ້າຕ່າງໆ.
ອອກພັນສາໝາຍຄວາມວ່າ: ອອກຈາກການເຂົ້າບໍາເພັນກຸສົນ, ຮຽນຮູ້ຫລັກທໍາຕ່າງໆຂອງພະສົງມາເປັນເວລາ 3 ເດືອນເຕັມແລ້ວພະສົງສາມະເນນຈຶ່ງສາມາດໄປນອນຄ້າງຄືນຢູ່ຕາມວັດວາອື່ນໄດ້, ສ່ວນຄໍາວ່າ: ປະວໍລະນາ ແມ່ນການຍືດອາຍຸອອກໄປອີກ, ເຊິ່ງມີຄວາມໝາຍວ່າ: ການບອກໄວ້ລ່ວງໜ້າ ຫລື ຂໍອະນຸຍາດໄວ້ລ່ວງໜ້າ, ແມ່ນການເສີມຂະຫຍາຍມູນເຊື້ອວັດທະນະທຳ ແລະ ຮີດຄອງປະເພນີອັນດີງາມຂອງຊາດ ທີ່ໄດ້ສືບທອດກັນມາແຕ່ບູຮານນະການ, ທັງເປັນການຊຸກຍູ້ສົ່ງເສີມ ແລະ ສາມາດດຶງດູດນັກທ່ອງທ່ຽວເຂົ້າມາທ່ຽວລາວໃຫ້ນັບມື້ຫລາຍຂຶ້ນ.
