ສ.ກູເວດ ຕ້ອງການແຮງງານລາວເປັນຈໍານວນຫລາຍ
ໃນວັນທີ 23 ຕຸລານີ້, ທ່ານນາງ ຣິນອໍ ເຊາະເບຍ ລັດຖະມົນຕີກະຊວງສະຫວັດດີການສັງຄົມ ແລະ ແຮງງານ, ລັດຖະມົນຕີແຫ່ງລັດກູເວດ ວ່າການກະຊວງເສດຖະກິດແຫ່ງລັດກູເວດ ໄດ້ພົບປະກັບທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເພື່ອປືກສາຫາລືຕໍ່ການເພີ່ມທະວີການພົວພັນຮ່ວມມືທາງດ້ານວຽກງານແຮງງານ, ໂດຍສະເພາະໃນປີ 2019 ນີ້, ສ.ກູເວດ ຍິນດີຮັບເອົາແຮງງານລາວຈຳນວນ 1.000 ຄົນ ເພື່ອໄປເຮັດວຽກຂະແໜງການຕ່າງໆຢູ່ກູເວດ ແລະ ຈະເປັນໂອກາດຊ່ວຍຍົກລະດັບຄວາມສາມາດຂອງແຮງງານລາວໃນທຸກສາຂາອາຊີບ, ທັງແມ່ບ້ານ, ກະສິກຳ, ອຸດສາຫະກຳ ແລະ ອື່ນໆ, ພ້ອມດຽວກັນນັ້ນ ກໍຈະສືບຕໍ່ແລກປ່ຽນຂໍ້ມູນຂ່າວສານແຮງງານ ແລະ ການຊ່ວຍເຫລືອຍົກລະດັບສືມືແຮງງານລາວຕື່ມອີກ.
ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ໃນຜ່ານມາ, ສປປ ລາວ ແລະ ສ.ກູເວດ ກໍໄດ້ຮ່ວມກັນລົງນາມໃນບົດບັນທຶກຊ່ວຍຈຳກ່ຽວກັບການພັດທະນາສີມືແຮງງານ ແລະ ອື່ນໆ ແລະ ການພົບປະຫາລືຄັ້ງນີ້ ກໍເພື່ອແນໃສ່ສືບຕໍ່ເພີ່ມທະວີການຮ່ວມມືດ້ານແຮງງານລະຫວ່າງສອງຝ່າຍໃຫ້ຫລາຍຂຶ້ນ, ສ່ວນຄວາມຕ້ອງການແຮງງານລາວຈໍານວນ 1.000 ຄົນໃນປີ 2019 ຈະມາເຖິງນີ້, ທາງກະຊວງແຮງງານ ແລະ ສະຫວັດດີການສັງຄົມ ຈະມີການຄົ້ນຄ້ວາ ແລະ ຈັດສັນ ເພື່ອເຮັດໃຫ້ການຮ່ວມມືດັ່ງກ່າວຂອງສອງປະເທດມີບາດກ້າວໃໝ່.
ກະຊວງແຮງງານ ແລະ ສະຫວັດດີການສັງຄົມ ໃຫ້ຮູ້ວ່າ: ໃນປີຜ່ານມາ, ລາວກໍໄດ້ສົ່ງແຮງງານຂອງຕົນໄປອອກແຮງງານຢູ່ຕ່າງປະເທດເປັນຈຳນວນຫລາຍພັນຄົນ, ສ່ວນໃຫຍ່ແມ່ນຢູ່ປະເທດຍີ່ປຸ່ນ, ສ.ເກົາຫລີ ແລະ ອື່ນໆ, ຊຶ່ງຕົ້ນຕໍແມ່ນໃນຂົງເຂດກະສິກຳ ແລະ ອຸດສາຫະກຳ, ແຕ່ໃນຄວາມເປັນຈິງແລ້ວແຮງງານລາວຍັງຈະຕ້ອງໄດ້ຍົກສູງລະດັບສີມືຂຶ້ນຕື່ມອີກ ເພື່ອຍົກສູງຄ່າແຮງງານຕື່ມອີກ ເພາະຜ່ານມາແຮງງານລາວຍັງເປັນແຮງງານດິບ, ຄວາມຊຳນິຊຳນານງານຍັງອ່ອນນ້ອຍ ແລະ ສະເພາະຢູ່ປະເທດໄທ ກໍເປັນປະເທດໜຶ່ງທີ່ມີຄວາມຕ້ອງການແຮງງານລາວເປັນຈຳນວນຫລາຍເຊັ່ນກັນ, ແຕ່ຈະຕ້ອງໄດ້ປັບສະຖານະຜູ້ທີ່ໄປອອກແຮງງານໃຫ້ຖືກຕ້ອງຕາມລະບຽບກົດໝາຍດີຂຶ້ນ.
