ລັດຈະເພີ່ມທະວີການຄຸ້ມຄອງສື່ອອນລາຍ

ລັດຖະບານຈະເພີ່ມທະວີການຄຸ້ມຄອງສື່ອອນລາຍໃຫ້ເກີດປະໂຫຍດສູງສຸດຕໍ່ການພັດທະນາເສດຖະກິດ-ສັງຄົມ, ພາຍຫລັງເຫັນວ່າການນໍາໃຊ້ເຕັກໂນໂລຊີຂໍ້ ມູນ ແລະ ການສື່ສານ (ICT) ມີທັງດ້ານດີ ແລະ ດ້ານລົບ.

ໃນກອງປະຊຸມລັດຖະບານປະຈໍາເດືອນຕຸລາ 2018 ຜ່ານມານີ້, ພາກສ່ວນກ່ຽວຂ້ອງໄດ້ລາຍງານຕໍ່ກອງປະຊຸມກ່ຽວກັບສະພາບການຄຸ້ມຄອງນໍາໃຊ້ອິນເຕີເນັດ ແລະ ສື່ສັງຄົມອອນລາຍ, ເຊິ່ງເຫັນວ່າຈໍານວນຜູ້ໃຊ້ເຄື່ອງມືສື່ສານດັ່ງກ່າວ ເພື່ອບໍລິໂພກຂໍ້ມູນຂ່າວສານນັບມື້ກວ້າງຂວາງ, ໃນຂະນະດຽວກັນ, ກໍມີກຸ່ມຄົນບໍ່ດີຈໍານວນໜຶ່ງມີຄວາມພະຍາຍາມນໍາໃຊ້ສື່ອອນລາຍນີ້ ເປັນຊ່ອງທາງເຈາະລະບົບຄອມພີວເຕີ, ມີການທໍາລາຍຂໍ້ມູນ, ປອມແປງຂໍ້ມູນ, ການລັກເອົາຂໍ້ມູນບັນຊີຂອງທະນາຄານ, ກະຈາຍໄວຣັດຄອມພິວເຕີ, ເຜີຍແຜ່ສິ່ງລາມົກອານາຈານ ແລະ ການໂຄສະນາໃສ່ຮ້າຍປ້າຍສີ ແລະ ບິດເບືອນຄວາມເປັນຈິງ ເພື່ອສ້າງຄວາມບໍ່ສະຫງົບສຸກ ແລະ ບໍ່ເປັນລະບຽບຮຽບຮ້ອຍໃນສັງຄົມເຮົາ. ຕໍ່ບັນຫາດັ່ງກ່າວ, ທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນໃຫ້ຂະແໜງການກ່ຽວຂ້ອງຕ່າງໆເພີ່ມທະວີການປະສານສົມທົບກັນຢ່າງກົມກຽວ ເພື່ອແນໃສ່ຄຸ້ມຄອງການນໍາໃຊ້ອີນເຕີເນັດ ແລະ ສື່ອອນລາຍຕ່າງໆ ໃຫ້ເກີດປະໂຫຍດສຸງສຸດຕໍ່ການພັດທະນາເສດຖະກິດ-ສັງຄົມຂອງຊາດ, ພ້ອມທັງສືບຕໍ່ກວດກາ ແລະ ບັງຄັບໃຊ້ລະບຽບກົດໝາຍຕໍ່ຜູ້ກະທໍາຜິດໃຫ້ເຂັ້ມງວດ.

ໃນກົດໝາຍວ່າດ້ວຍການຕ້ານ ແລະ ສະກັດກັ້ນອາຊະຍາກໍາທາງຄອມພີວເຕີ ມາດຕາ 4 ໄດ້ລະບຸຈະແຈ້ງວ່າ: ລັດສົ່ງເສີມການນໍາໃຊ້ລະບົບຄອມພີວເຕີໃຫ້ມີຄວາມປອດໄພ, ສະດວກ, ວ່ອງໄວ ແລະ ຍຸຕິທໍາ, ພ້ອມທັງປົກປ້ອງສິດຜົນປະໂຫຍດອັນຊອບທໍາຂອງຜູ້ບໍລິການ, ຜູ້ຊົມໃຊ້ຕາມລະບຽບກົດໝາຍ ແລະ ມາດຕາ 8 ໄດ້ລະບຸວ່າ: ພຶດຕິກໍາທີ່ເປັນອາຊະຍາກໍາທາງລະບົບຄອມພີວເຕີມີຄື: ການເປີດເຜີຍມາດຕະການປ້ອງກັນການເຂົ້າເຖິງລະບົບຄອມພີວເຕີ, ການເຂົ້າເຖິງລະບົບທີ່ບໍ່ໄດ້ຮັບອະນຸຍາດ, ການຕັດຕໍ່ເນື້ອໃນ, ຮູບ, ພາບການເຄື່ອນໄຫວ, ສຽງ ແລະ ວີດີໂອ ຕ່າງໆ ໂດຍບໍ່ໄດ້ຮັບອະນຸຍາດ, ການສ້າງຄວາມເສຍຫາຍຜ່ານສື່ອອນລາຍ ລວມເຖິງການເຜີຍແຜ່ສິ່ງລາມົກອານາຈານຕ່າງໆຜ່ານລະບົບຄອມພີວເຕີ ແລະ ມາດຕາ 57 ລະບຸວ່າ: ຜູ້ລະເມີດ ຫລື ກະທໍາຜິດ ຈະຖືກດໍາເນີນຄະດີທາງແພງ ແລະ ອາຍາ, ພ້ອມທັງປັບໃໝແຕ່ 1-50 ລ້ານກີບຕາມກົດໝາຍກໍານົດ.