ປາກິດສະຖານຈະຍັງຂໍກູ້ເງິນ IMF ເຖິງວ່າ ໄດ້ເງິນຊ່ວຍຈາກອາຣັບບີ ຊາອຸດິດ 6.000 ລ້ານໂດລາ
ກະຊວງການເງິນປາກິດສະຖານ ຖະແຫລງໃນວັນທີ 24 ຕຸລາວ່າ: ປາກິດສະຖານຍັງຮັກສາແຜນຂໍກູ້ເງິນຈາກກອງທຶນການເງິນສາກົນ (IMF) ເຖິງວ່າ ອາຣັບບີ ຊາອຸດິດ ຈະສະເໜີໂຄງການເງິນຊ່ວຍເຫລືອ 6.000 ລ້ານໂດລາສະຫະລັດ ກໍຕາມ.
ທ່ານ ນູ ອາເໝັດ ໂຄສົກກະຊວງການເງິນ ກ່າວວ່າ: ປາກິດສະຖານຍັງເດີນໜ້າຕາມແຜນການເຈລະຈາກັບ IMF ໃນໄລຍະອາທິດທຳອິດຂອງເດືອນພະຈິກ. ກ່ອນໜ້ານີ້ ທາງການປາກິດສະຖານຖະແຫລງວ່າ: ອາຣັບບີ ຊາອຸດິດ ຕົກລົງເຫັນດີສະໜັບສະໜູນທາງການເງິນລາຍປີແກ່ປາກິດສະຖານ 3.000 ລ້ານໂດລາສະຫະລັດ ແລະ ເງິນກູ້ອີກມູນຄ່າ 3.000 ລ້ານໂດລາສະຫະລັດ ຕາມຂໍ້ຕົກລົງຜ່ອນຊຳລະໜີ້ສຳລັບນຳເຂົ້ານ້ຳມັນ ເພື່ອບັນເທົາວິກິດທາງການເງິນ. ນາຍົກລັດຖະມົນຕີ ອິມຣານ ຂ່ານ ຂອງປາກິດສະຖານ ກ່າວໃນອາທິດນີ້ວ່າ: ປາກິດສະຖານໄດ້ຂໍການຊ່ວຍເຫລືອຈາກປະເທດພັນທະມິດຕ່າງໆ ເຊິ່ງໂດຍທົ່ວໄປໝາຍເຖິງອາຣັບບີ ຊາອຸດິດ, ຈີນ ແລະ ໂຄງການ IMF. ທ່ານ ຂ່ານ ມີກຳນົດເດີນທາງໄປຈີນໃນອາທິດທຳອິດຂອງເດືອນພະຈິກ ໂດຍຄາດວ່າຈະໄປຂໍການຊ່ວຍເຫລືອທາງການເງິນເພີ່ມອີກ.
